Amosu8
Ligadürün uénedü: Faniñe tau in funaaru
1Anihán katei le larufudubei Wabureme nun: Ñeinñein aban faniñe tau in funaaru,2aba lariñagun nun:—Ka barihubei Amosu?
Nariñaga lun:
—Aban faniñe tau in funaaru.
Aba lariñagun nun:
—Funaali Ísüraeli; úadigiaali ferudunanani.3Lídanme weyu ligía, lasansiraguba eremuhani palasiurugu lun ayahunime. Hóunweguba saragu gürigia, ábame hachagarún lidan furumiñeguarügü fulasu. Wabureme ariñagubalin.
Layarafadun laguserun Ísüraeli
4Aganba huméi katei le, huguya le íchugubei lidere dan houn ha ǘnabugububaña, ani ñoungua huméi hawaguti lílana fulasu ha gudemebaña,5huguya le ariñagubei: «Ídaba san lásügüra lufedun iseri hati lun gayara lan waluguruni türigu? Ídaba lásügüra luéyuri emeraaguni lun walugurahan seru, lau amisuraagülei luma balansu le íweruhati luagu wafulesein?6Wañoundagubei hawaguti gudemetiña darime lun haluguragun houngua woun keisi idamuni, lun hafayeiruni hadúeihan, íbini ábanrügü tan feru geidi hadúeirun! Walugurubei íbini life türigu!»7Fiñuhali Wabureme luagu luéirigun Hakobu: «Mabulieidúndügü nubéi le hadügübei».8Madadagarunbei san múa ladüga sun katei le? Mayahuahanbaña san lílana fulasu? Lamudeiruba múa rarí ligíame ítara kei lamudeirun ani rarí ligía lidunari Nilu!9Lariñahare Wabureme: «Lídanme weyu ligía, nadügüba lun lálüdün weyu amidirugu, ábame laburigadun wéyuagu ubouagu.10Nasansirubei burí fedu lun ayahunime hárigi hilaaña, nasansiragubei eremuhani lun ayahunime luagu óunweni, nadügüba lun hadaüragun ludu, luma lun hásaruni hídiburi lun harufuduni higarigu. Hayahuba kei le ayahubei lárigi liráü le ábanrügüti, lídanba igifini lagumucha sun katei hun».11Lariñahare Wabureme: «Anitebei weyu lun nóunahan ilamaü ubouagun; mama ilamaü tun fein, ni mágürabu lun duna, ilamaü lun laganbún nererun.12Éibugañahadügübaña gürigia áluaha haganbuni lererun Wabureme; hóudiba lídangiñe barana Hilaali lidoun barana Mediteraniu, luma luéigiñe nórute darí luagun oubaü le ñéingiñe lubéi laboucha weyu, gama lumoun madarihabei.13Lídanme dan ligía würiña nibureintiña ha magadiñetiña hama wügüriña nibureintiña ganigitiña hábürühaba lau falalaü ladüga hamagürabu.14Ha burí áfiñurubaña hawagu liguariuangu Samaria; hariñaga: “Luagu libagari lubungiute Dan; luma luagu habagari lubungiutegu Bérüsewa hábürühaba lun másaarunhaña lan” ».Bible Society of Honduras