2 Samueli13
Láguragunu Amünón Tamarü
1Ñeinñoun aban litu Abüsalón le liráü Dawidi magadiñetu, gíritu Tamarü. Ábati tínsiñedun Tamarü lun Amünón le giñe liráü Dawidi,2darí lun lasandirun lau íruni, ladüga kei masubudirungiru lubéi Tamarü wügüri, hénrenguti lun Amünón lun lagamaridunu.3Gama lumoun ñeinñein aban lumada Amünón bíbuti gíriti Honadábü, liráü Simá le líbugaña Dawidi.4Luagu aban weyu, aba lariñagun Honadábü lun Amünón:—Ka san suserebei bun liráü urúei? Ka uagu eibu lubéi weyu, eibu badureidun? Mabahüdagun bubéi san nun?
Lariñaga Amünón lun:
—Hínsiñetugu san Tamarü to litu Abüsalón le níbiri nun.5Ábati lariñagun Honadábü lun:
—Rounba bigabananrugu, badügame kamá sándiñadibu. Dánmeti lidin búguchi arihabu, bariñagame lun lun ladügün fulesei bun, lun lóunahanu bitu Tamarü lun tadügün éigini bun ñein, lun barihinu, luma lun béigini le tábougun bun.6Aba larounrun Amünón ligabananrugu, aba ladügün kamá sándiñein. Danti lidin urúei arihei, aba lariñagun Amünón lun:
—Ñǘbuinta nitu Tamarü, lun tadügün bián durudia nun ya, ábame téheraagunu nun.7Ábati lóunahanu Dawidi Tamarü, lariñaga tun:
—Adügabá fulesei nun, beiba lúbiñe Amünón le bati, ábame badügün éigini lun.8Aba tidin Tamarü lúbiñe Amünón le tati, roun liña. Aba tanügün fulúaru, aba tañoundagunu, aba tadügünu durudia ñein ligibugiñe aba tásürahanu;9lárigiñe aba téheraagunu lun; gama lumoun máhati Amünón leigin, aba lariñagun lun háfuridun sun ha ñéinbaña.10Dan furihaña súngubei, aba lariñagun Amünón tun Tamarü:
—Barübei éigini nirumunrugun ábame béheraagun nun.
Aba tanügünu Tamarü durudia lun Amünón lirumunrugun,11gama lumoun dan tayarafadagüdünu lun, lun leigin, aba lárügüdünu aba lariñagun tun:
—Higabu barounra numa nitu.12Tariñaga lun:
—Ua, nati, máguraguabana, ladüga madügǘnti katei le uburugu Ísüraeli. Madügabéi wuribani le!13Haliñounbagia nidin lau nibusigari anhein badüga le nun? Ani hanügübadibu gürigia Ísüraeli keisi aban ibidiougua tau. Amuriahabana luma urúei, mamahanbei nau bun.14Máhati Amünón ladügün gasu tau, keiti here lubéi tuéi, aba lagamaridunu lau éregu.15Lárigiñe aba tiyereegudun lun Amünón, wéiriti tiyereegudun lun sügǘ lau meha tínsiñe lun lubaragiñe lagamaridunu. Aba lubeiti lariñagun tun:
—Saraba, beiba yáagiñe.16Tariñaga lun:
Ua, nati, lugundun wuribatimabei babugunina yáagiñe sügǘ lau wuribani le adüga báalibei nun!
Máhati Amünón ladügün gasu tau.17Ábarüga lagúarun lun lubúein, lariñaga lun:
—Bugaboun würi to yáagiñe, ábame badouruni bena buidu!18Aba labugunu musu múnadagiñe, aba ladouruni bena buidu. Keiti tauñoun lubéi buga aban dúnigu wéndetu Tamarü, dúnigu to hayusuruboun lirahüñü urúei ha máfuridungiña,19aba tíchugun baligi tábulugu, aba taheiridagunu dúnigu to tuáguboun, aba tidin ayahuaheina lau túhabu tábulugu.20Ábati lálügüdünu Abüsalón le tati, lariñaga tun:
—Amünón lubeiti le bati adügübalin katei le bun? Kei ítara liña lubéi, maniba lau, nitu, lugundun bati lira. Madiheridabá saragu luagu katei le.
Kei tadariragun Tamarü tungua ítara, aba terederun lúbiñe Abüsalón le tati.21Dan laganbunbalin urúei katei le asuseredubei, aba lagañidun saragu; gama lumoun madeinhanti lun Amünón ladüga, kei ligía lan íbugañaünbei hadan lirahüñü, wéiriti línsiñe lun.22Mariñagunti giñe Abüsalón ni kata lun Amünón luéigiñe láguragunu litu, gama lumoun aba liyereegudun lun luéigiñe katei le.
Láfaruni Abüsalón Amünón
23Bián irumu lárigiñe, ñéinñanu lumutuniña Abüsalón ásahaña lilügüniña mudún uburugu Baali-asoru, lurugabu lumúan Éfürain, aba lamisurahaniña Abüsalón sun lirahüñü urúei lun heigin luma;24aba giñe lidin lumoun urúei, aba lariñagun lun:—Guentó kei hásahañanu lubéi numutuniña nilügüniña mudún, busentina hamuga lidin urúei hau lani úfisigu ñein.25Lariñaga urúei lun:
—Ua, niráü, siñati woudin sun wagía, luéi bagastarun saragu.
Lau sun léredun yebe Abüsalón luagu, máhati urúei lidin, gama lumoun ru lumuti labiniragüle lun.26Ábati lariñagun Abüsalón:
—Kei siñá lubéi bidin, rubei bererun lun lidin Amünón wama.
Lariñaga urúei lun:
—Kámegia babusenra lidin Amünón buma?27Gama lumoun héreti Abüsalón luagu, aba lánharun urúei lun lidin Amünón hama híbiri lirahüñü urúei luma.
Aranseli bugati Abüsalón aban adineruni le ladüna aban urúei,28ani ariñagaali buga houn lubúeingu:
—Danme bacharuaali Amünón buidu, danme nariñagun hun lun háfaruni, ábame háfaruni. Manufudeda humá hadügüni lugundun au ariñagubalin hun lun hadügüni. Ganigi humá lubeiti.29Lau lererun Abüsalón, aba háfaruni lubúeingu Abüsalón Amünón. Ábati hásaarunga sun lirahüñü urúei, aba hawarirun hawagun halügüniña mile, aba hanurahan.30Dan ǘmadarugugiña, ligía lachülürün uganu lun Dawidi luagu áfaraguala lan Abüsalón sun lirahüñü, luagu merede lan ni aban hádangiñe wínwanñu.31Ábati lásaarun urúei, aba laheiridagunu ladaüragun le ligarigu, aba lachüüragun lungua múarugu. Sun lani úfisigu ha ñéinbaña, aba giñe haheiridagunu hadaüragun;32gama lumoun aba lárügüdüni Honadábü le liráü Simá le líbugaña Dawidi dimurei, aba lariñagun:
—Maritagua humá urúei luagu áfarawagua lan sun hirahüñü, Amünónrügüñein afarúa, ladüga ítara liña laranseruni Abüsalón laritagunrugu lúmagiñe weyu le láguragunbarun Amünón Tamarü to litu.33Maritagua humá lubeiti urúei luagu hilagua lan sun hirahüñü. Amünónrügüñein ounwe.34Dan anihán lan Abüsalón anuraha, aba larihin wügüri le óunigirubei haragachun saragu gürigia luéigiñe lémeri Oronaímü lóubawagugiñe áraabu. Ábati lidin ariñaga lun urúei luagu arihaali lan gürigia aragacha luéigiñe lémeri Oronaímü.35Aba lariñagun Honadábü lun urúei:
—Añatén lirahüñü urúei, ítara kei buga naritaguni.36Lásuruña ladimurehan, ligía hachülürün lirahüñü urúei, aba hagúarahan ayahuaha. Ayahuati giñe urúei saragu hama lani úfisigu.37Ánheinti buga Abüsalón, aba buga lanurahan, aba lidin lumoun Talümái le liráü Amiudu le lurúeite Gesuru, aba lerederun ǘrüwa irumu ñein. Ságütiha weyu layahun Dawidi lárigi Amünón le liráü,39gama lumoun dan lárügüdagunbei lungua lárigiñe lounwen Amünón, aba labusenrun larihini Abüsalón.
Bible Society of Honduras