2 Samueli14
Lagiribudun Abüsalón
1Subudi lumuti Hoabü le liráü Seruiá luagu áluga lan Dawidi luagu Abüsalón,2aba lubeiti lóunahan Hoabü tuagu aban würi bíbutu Tekoagiñe. Lariñaga tun:—bafamura kamá hamuga galamiseruntibu, ábame badaüragun ludu, lun barihín kei aban würi to lǘharu amuisera lárigi aban óunweti.3Ábame barufudagun bungua ligibugiñe urúei, bariñageime sun le lunbei nariñaguni bun lun.
Lárigiñe lariñaguni Hoabü le lunbei tariñaguni würi tuguya lun urúei,4aba tidin arufudagua tungua ligibugiñe urúei, aba tabuluchagun dagá terebe múarugu arufudei tinebenehabu, aba tariñagun lun:
—Íderagua humana urúei!5Lariñaga urúei tun:
—Ka suserebei bun?
Tariñaga lun:
—Mámaritina, hilá meha númari,6aba hageindagun bián nirahüñü hámagua áraabu; keiti ua lan kaba lan afanreinraguaña, aba láfaruni aban le aban hilagubei.7Guenleti garabaguaaña sun niduheñu nuagun, busentiñati lun nederegeruni le áfarahabei houn lun hafayeiragüdüni luéigiñe le láfarubei, lun hagidaruni labureme alagan ubouagugiñe ítara. Ítarati nerederuba maraüga ani madügawagunhalime númari lun lasigirun liri ubouagu.8Ábati lariñagun urúei tun:
—Beiba búbiñoun, níchuguba dimurei luagu bufulesein.9Tariñaga lun:
—Nurueite, anhein lunti lubéi lafayeihóun luagu duru nuguyalá hau niduheñu luéigiñe núguchi afayeiha luagu, lerederame urúei hau liduheñu madurunga.10Lariñaga urúei tun:
—Le adimurehati buagu, barübei nun ñahoun, mañawarihanhalime bun.11Gama lumoun ábaya tariñagun lun:
—Ayumuraguatina lun urúei lun lafurieidun lun Wabureme hawagu iduheñu ha busenbaña háfaruni niráü, maweiridun láamuga wuribani lau háfaruni niráü luéigiñe láfaruni líbiri.
Lariñaga urúei tun:
—Fiñutina bun luagu Wabureme luagu mafarúnbei lan biráü!12Gama lumoun ábaya tariñagun:
—Ru humá üma nun urúei lun nariñagun ábanraüya dimurei.
Lariñaga urúei tun:
—Badimureha.13Ábati tariñagun lun:
—Kati uagu laritagua urúei ladügüni káteimeme ligía houn lánigu Wabungiute? Según le lariñagubei urúei, gadurunti lau lamaharun lagiribudun liráü le bóugudibei luéi lageira.14Inarüni luagu sun lan wagía, wóunweguba; ítara waña kei duna le áturuti múarugu, siñaali labudun. Lau sun lira, magida lumuti Wabungiute libagari ni aban, rúrügüti lébuna lagiribudun le adisedubei luéi lárigoun.15Guenleti, niábinbei ariñagei katei le lun urúei, ladüga hádarun gürigia anufudei nidoun. Aba lubeiti nariñagun: Nadimureha lun urúei, fagua ladügüni le namuriahabei luma.16Anhein ladüga le namuriahabei luma, lesefurubadina luéi le busenbei lagidarunina lau sun niráü ligibuagugiñe ubóu le, le lani Wabungiute.17Agurabatina nasandirun darangilaü lau hóunabagüle, urúei, lugundun ariha humuti le buídubei lumoun le wuribabei, keisi aban lani Wabungiute ánheli. Rédeila Wabungiute le Wabureme huma, urúei!18Lariñaga urúei tun:
—Nálügüdaadibu luagu aban katei, amuriahatina buma lun maramudun ban ni kata nuéi.
Tariñaga lun:
—Hadimureha urúei.19Ábati lariñagun urúei tun:
—Ma Hoabü ádarubalibu lidoun sun le?
Tariñaga lun:
—Fiñutina huagu urúei luagu ítara liña lan. Hoabü, le lani urúei úfisi ariñagubei nun lun niabin humoun, ligía giñe ariñagubalin sun le nariñagubei hun.20Gama lumoun ladügünbalin lira ladüga labusenrun lasansiragun katei. Gama lumoun chuti hau, urúei, huguya keisi aban lani Wabungiute ánheli, subudi humuti sun le asuseredubei fulasurugu.21Aba lubeiti lariñagun urúei lun Hoabü:
—Aranse naali katei le. Beiba, giribugüdabei Abüsalón.22Ábati labuluchagun Hoabü dagá lerebe múarugu le linebenehabu, aba labiniruni urúei, aba lariñagun lun:
—Ariha naali uguñe luagu fulesei humanina, urúei, lau hadügüni le lamuriahabei hubúein huma.23Lárigiñe aba lásaarun Hoabü, aba lidin uburugu Gesuru anügei Abüsalón lun Herusaléun.24Gama lumoun ariñagati urúei lun lidin Abüsalón sügülügü lúbiñoun, lun marufudagun lan lungua lun; aba lubeiti lidin Abüsalón lúbiñoun marihingaléi urúei.25Lidan sun Ísüraeli, úati buga ni aban wügüri magadiñeti kei Abüsalón. Lúmagiñe luéigiñe lugudi dagá lumoun lábulugu úati mégeiti luagu.26Danha le lásaruni lídiburi sagü irumu, ladügaha berese lan lun, hǘrüti ídiburi ligía lóugiñe bián kilu.27Ǘrüwañanu lirahüñü Abüsalón wügüriña tuma aban würi, gíritu Tamarü, magadiñetu meha.28Bianñein irumu lau Abüsalón Herusalén marufudagunga lungua ligibugiñe urúei,29aba lubeiti lamuriahan Abüsalón luma Hoabü lun lidin arihei urúei lun; gama lumoun máhati Hoabü lidin.30Ábati lariñagun Abüsalón houn lubúeingu:
—Fadagu liña lichari Hoabü luma nichari, ani bunagua laali lau sebada; heiba ábame háguduni!
Aba houdin lubúeingu Abüsalón, aba háguduni lichari Hoabü,31aba lidin Hoabü furese furese lúbiñe Abüsalón, aba lariñagun lun:
—Ka uagu hágudei bubueingu nichari?32Lariñaga Abüsalón lun:
—Óunahatina ariñaga bun lun biabin nun, lun nóunahanibu ariñaga lun urúei luagu mala lan niabin Gesurugiñe, luagu buítima lan hamuga meha nun lun nerederun ñein. Au busentina narihini urúei anhein gadurun nubéi, áfaralana hilagubei.33Ábati lidin Hoabü arihei urúei, aba lariñaguni le lariñagubei Abüsalón lun, aba lóunahan urúei luagu Abüsalón. Dan lachülürünbei Abüsalón ligibugiñoun urúei, aba labuluchagun dagá lerebe múarugu. Ánheinti urúei luéigiñe lóubadina, aba leresibiruni lau aban chuuti.
Bible Society of Honduras