2 Samueli12
Lébechuni Natán Dawidi
1Aba lóunahani Wabureme profeta Natán arihei Dawidi. Dan lachülürünbei Natán lumoun, aba lariñagun lun:—Ñéinñanu bián wügüriña lidan aban uburugu, rísiti aban hádangiñe, le aban, gudemeti.2Le rísibei, galügüniñati saragu mudún hama bágasu,3ánheinti le gudemebei, ábanrügüñoun tiraüraü mudún lilügün, lagañeihan. Ligía guánarügü agüriahabarun, aba taweiridun tiraüraü mudún tuguya luma hau lirahüñü, le leigin ligía téigibei, lidan likopun tata, laniguagu tarumuga. Hínsiñetu lun kei aban liráü!4Luagu aban weyu, aba lachülürün aba chülüdügüti lúbiñoun le rísibei, gama lumoun máhati rísiti ligía láfarun ni aban hádangiñe lilügüniña mudún o bágasu lun laranserun éigini lun chülüdügüti ligía, barürügülóun lilügün le gudemebei mudún luéi, aba láfarunu lun leigin le achülürübei.5Aba lagañidun Dawidi saragu lun wügüri ligía, aba lariñagun lun Natán:
—Fiñutina bun luagu Wabungiute, luagu le lan adügübalin katei le, lunti lan lounwen.6Lunti giñe lafayeiruni tebegi tiraüraü mudún tuguya gádürü wéiyaasu lugundun magudemenihabuti!7Ábati lariñagun Natán lun:
—Buguya wügüri ligía! Ani anihán lererun Wabureme le Lubungiute Ísüraeli: “Anúadira numutibu lurúeiteme Ísüraeli, ani sefu numutibu luéi lubafu Saulu;8ru numutu lani Wabureme palasiu bun hau lúmarigu, runéi arúeihani Ísüraeli luma Hudá bun. Lun hamuga lougua lan sun lira, níchuguña hamuga saragu amu katei bun.9Ka uagu bíchiga mebereseni lau nererun, aba badügüni le aubei magundan nan? Áfaraba Uríasi le Étüna, lau báfaragüdüni houn Amonna, aba banügünu lúmari.10Keiti rúhadibu lubéi mebereseni nau, lau banügünu lúmari Uríasi lun búmarime, magumuchadibei lanarime igañi búbiñegiñe.11Nariñahare, au Aburemei: Nadügüba lun liabin wuribani buagun hámagiñe guánarügü biduheñu, ábame nanügüniña búmarigu, ábame níchuguniña lun aban hádangiñe biduheñu, ábame lagamariduniña wéyuagu.12Aramudaguarügü badügei le badügübei, ánheinti au, nadügübei wéyuagu, ligibugiñe sun Ísüraeli”.13Aba lariñagun Dawidi ligibugiñe Natán:
—Afigouhaadina ligibugiñe Wabureme.
Lariñaga Natán lun:
—Mabeichun lubadibu Wabureme luéigiñe bifigoun, ani móunwenbadibu giñe luéigiñe.14Gama lumoun kei anabagua baali lan Wabureme, lóunweba biráü le figigilibei.15Dan lagiribudunbei Natán lúbiñoun, aba lasandiragüdüni Wabureme irahü le tagaraüdübei lúmari Uríasi lau Dawidi.16Ábati layumuragun Dawidi lun Wabungiute luagu irahü ligía, aba layunarun, aba lásügürüni burí áriebu roun múarugu.17Ábaha houdin ábutigu ha aganóubaña tidan lani palasiu ayumuragua lun lun lásaarun múarugugiñe, gama lumoun máhati lásaarun; méiginti giñe hama.18Sedü weyu lárigiñe, aba lounwen irahü ligía, hanufudetiña yebeti lani Dawidi úfisigu hariñaguni lun, ladüga hariñagun hóunguarügü:
—Anhein meha madügün lubéi gasu wau dan le wadimurehan lun dan meha le wínwangili irahü, ida lubati wariñagun lun guentó luagu hilá lan irahü le? Gayaraabei ladügün aban lanarime katei!19Gama lumoun dan larihini Dawidi ligaburi hayanuhan lani úfisigu hámagua, aba gunfurandalani luagu hilá lan irahü; aba lubeiti lálügüdüniña, lariñaga houn:
—Ma hilá irahü?
Hariñaga lun:
—Anha, hilá.20Ábati lásaarun Dawidi múarugugiñe, aba lagoun, aba líchaagun ibiñein luougua, aba lasansiragun, aba lebelurun ténpulurugun lun láhuduragun lun Wabureme. Lárigiñe aba lidin lúbiñe, aba lamuriahan éigini, aba leigin.21Ábati hariñagun lani úfisigu lun:
—Ka san ladügübei urúei? Dan buga wínwangili irahü, aba layunarun, ayahuaha ligía luagu; guentoti dan le hilaali, aba lásaarun urúei, aba leigin!22Lariñaga Dawidi houn:
—Dan meha wínwangili irahü, ayunaratina ayahua au luéidügü yebe nagudemedagun lun Wabureme, aba hamuga lígiruni lun labagaridun.23Ánheinti guentó kei hilá lubéi, Kábati uagu nayunara, siñabeigu náguyuguagüdüni? Nídiba lun nóundaragun luma, anhein ligía magiribudúnbei lun lóundarun numa!
Lágurahoun Salomón
24Lárigiñe aba lámalihanu Dawidi Betüsawé to lúmari. Aba lidin ebeluha tumoun, ábaya lagamaridunu aba tagaraüdün aban wügüri irahü, aba líchugun Dawidi Salomón lírime. Hínsiñeti irahü ligía lun Wabureme,25aba lasubudiragüdüni lun Dawidi lídangiñe profeta Natán. Aba lubeiti láchuni Dawidi irahü ligía Hedidíasi, ladüga hínsiñeti lun Wabungiute.Lagañeiruni Dawidi uburugu Rabá
26Sunti dan le, aba lábürühan Hoabü luagun haburugute Amonna le Rabá, dan yebe yarafaali lun lárügüdüni uburugu,27aba lóunahan ariñaga lun urúei:—Ageindaguaadina hama lílana Rabá, ani ragüna uburugu le ñein lubéi duna.28Óundaralaña lubeiti urúei híbiri súdaragu, ábame lábürühan luagun uburugu, ábame lárügüdüni, mama láamuga au adügei luéi lichugún niri luagu.29Ábati lóundaruniña Dawidi sun lisudaranigu, aba houdin ageindagua hama lílana Rabá, aba lárügüdüni uburugu.30Lárigiñe aba hagidaruni ridi golu le gawagubei dübü fínuburiti, le hǘrübei darandi-ǘrüwa kilu lábulugugiñe lurúeite Rabá aba hadaürüni luagu Dawidi. Sagati giñe Dawidi saragu burí katei gebegiti lídangiñe uburugu ligía,31hati gürigia ha erederubaña uburugu, aba lasagaruniña, aba líchuguniña awadigimarida lau siyara, reeka, harawa luma lidan burí régigi le lauti ladiríyu. Ligiaméme giñe ladügübei lun sun haburugute Amonna, lárigiñe aba lagiribudun hau sun lisudaranigu Herusaléun.
Bible Society of Honduras