2 Krónikasi20
Hagañeiruniwa Moabü luma Amón
1Átiri dan lárigiñe, aba hóundarun Moábüna hama Amonna hamoun Meunitagu aba houdin lun hageindagun luma Hosafátü;2ábati lariñawagún lun:—Añate saragu súdaragu Edomugiñe luma loubafurugugiñe barana hilaali lun hageindagun buma! Añaheinhaña Asesón-tamarü lememe En-gadü.3Aba lasandirun Hosafátü anufudei, aba laranserun lun lidin lumoun Wabungiute. Aba lubeiti lagúarun aban ayunaruni lidan sun Hudá,4aba hóundaragun lílana Hudá lun hamuriahan luma Wabungiute lun líderaguniña.5Aba lararamun Hosafátü hamidangua lílana Hudá ha óundaragubaña Herusalén ligibugiñe iseri tibürürün litenpulun Wabureme,6aba lariñagun:
—Wabureme, Habungiute wagüchagu, buguya Búngiubei sielu, buguya agumadirubaliña sun néchanigu! Búhaburuguñein erei luma ubafu: Úati ni aban lun gayara lan lageindagun buma!7Wabungiute, bugá bumutiña lílana fulasu le hagibugiñegiñe Ísüraelina ha bumutuniña, aba bíchuguni houn ladügawagun Abüraámü le bumada lun súnwandan.8Lárigiñe haranseragun houngua ya, aba hábunagun aban ténpulu bun, aba hariñagun:9“Anhein ñübuin somu wuribani wawagun keisi abeichúni, kei burí wuribu, o sandi o ilamaü, wayabinba tigibugiñoun ténpulu to, lugundun abunhein tidan ténpulu to, ábame wamuriahan ídemuei buma lidan wasufurirun, ábame baganbuniwa sefubáwame”.10Guentó lubeiti, añahán Amonna ya, Moábüna hama ha lílana wübü Seirü, ha umúanrugunbaña bamahara lun hebelurun Ísüraelina dan le meha hayabin Ehiptugiñe, díreirügütiña hawéi, magünrinchagun hamutiña.11Guentó hábürühaña wawagun lun hasagaruniwa lídangiñe fulasu le bíchugubei woun wánime.12Wabungiute, mabeichunbubaña san? Wagía lóuguati were lun wageindagun hama saragu súdaragu ha, ha ageindagubaña wama. Ibidiñeti woun kaba lan wadüga; ligía wagúarunbei buagu!13Rara haña buga sun lílana Hudá ligibugiñe Wabungiute hau sun hámarigu, harahüñü hama irahüñü ha ñǘbüritimagiñabaña.14Dan añahán lubéi lílana fulasu óundaragu, aba lebelurun lani Wabungiute Sífiri lidoun Haasieli, le liráü Sakaríasi, libari Benaíasi, le bugaha liráü Heieli libari Mataníasi, aban lewita ladügawagun Asafü15aba lariñagun:
—Aganba humá lílana Hudá hama lílana Herusalén, buma, buguya urúei Hosafátü. Lariñahare Wabungiute hun: “Manufudeda humá, malouchun huguyame hagibugiñe saragu súdaragu ha, lugundun mama huwuribun wuribu le, luwuribun Wabungiute.16Ragá humá haruga ageindagua hama. Añate amudeireina luéigiñe luwübüri Sisü, hadunraguba hama lígirugu liraüraü duna le ligibugiñebei fulasu mageirawati le lani Herueli.17Mámaba huguya ageindaguei wuribu le. Deregüdagua humá, harihubei ida luba lan lesefurunün Wabungiute. Lílana Herusalén luma sun Hudá, manufudeda humá malouchun huguyame, heiba ageindagua hama haruga, lugundun anihein Wabureme huma”.18Ábati láhuduragun Hosafátü, aba labuluchagun dagá lerebe múarugu, aba háhuduragun lílana Herusalén hama lílana Hudá ligibugiñe Wabureme lun híchugun uéiriguni lun.19Aba hagumeserun Lewitagu ha ladügawagun Keatü hama ladügawagun Koré agúaraha íchiga uéiriguni lun Wabureme le Lubungiute Ísüraeli.20Larugan binaafin, aba saragia hamá lun houdin lidoun fulasu mageirawati le gíribei Tekóa. Dan lóurate háfuridun, aba lararamun Hosafátü, aba lariñagun houn:
—Aganba humana lílana Herusalén luma Hudá: Hemenigi humá luagu Wabureme le Hubungiute, ábame hachoururagun hungua; hemenigi humá hawagu hani profetagu, ábame buidu lan lasalirun sun katei hun.21Lárigiñe lálügüdagun lungua hama lílana fulasu, aba líridun fiu eremuhatiña lun hadaüragun daüguaü sagüráutu lun hamarücharun habá habá gürigia eremuheinei uremu le gíribei:
«Ru humá eteingiruni lun Aburemei ladüga magumuchaditi línsiñehabu».22Dan le hagumeserunbei eremuha lau ugundani lun Wabungiute, aba ládarun Wabungiute chagaguaü hadoun Amonna, Moábüna hama lílana luwübüri Seirü, ha yebe ñǘbuinbaña lun hageindagun kóntüra Hudá aba heferidiruni wuribu.23Aba hábürühan Amonna hama Moábüna hawagun lílana luwübüri Seirü, aba hagumuchun hau sunsuinagubei, lárigiñe hagumuchun hau, aba hageindagun hámagua.24Dan hachülürünbei lílana Hudá lidoun fulasu le ñéingiñe lubéi larihúa fulasu mageirawati, aba harihin hawagun háganiñu, hilaguaañarügüñanu hariha roun múarugu mesefurunti ni aban!25Ábati lidin Hosafátü habu lumutuniña abudahei le hígirubei háganiñu, aba hadarirun saragu ibiñani, áruma, daüguaü luma burí ílagu gebegiti, aba herederun lau sun le hadarirubei. Gíbeyati katei le hadarirubei darí lun siñá lan hanügüni súngubei. Gíbeyati darí lun herederun ǘrüwa weyu abudaha katei.26Luagu ligadürün weyu, aba hóundaragun lidan fulasu wayati le gíribei Beraká, aba habiniruni Wabungiute ñein. Ligía háchubalin fulasu ligía liwayatin Beraká, ligiamémegili liri fulasu ligía.27Lárigiñe aba hagiribudun sun lílana Hudá hama lílana Herusalén Herusaléun lau Hosafátü habá habá sun hagía lau saragu ugundani, lugundun rúhali lan buga Wabungiute lébuna ugundani houn lau láfaraguniña háganiñu.28Dan hachülürünbei Herusalén, aba houdin litenpulunrugu Wabungiute áfareina árüpa, gidara luma íñaaheina fidu.29Dan hasubudirunbalin híbiri néchanigu luagu ageindagua lan Wabureme hama háganiñu Ísüraeli, aba habuinchun lau anufudei luéi Wabungiute.30Ítara liña lubeiti lasigirun larúeihan Hosafátü darangilu, lugundun ruti bugaha Wabungiute darangilaü lun hama lubesinanigu.
Lagumuchun larúeihan Hosafátü
31Arúeihati lubeitiha Hosafátü Hudá. Darandi-seingü meha irumu lau dan le lagumeserunbei arúeiha, arúeihati wein-seingü irumu Herusalén. Asubá bugaha tíribei lúguchu, ani liráü Silí.32Éibugati Hosafátü lau úarani kei bugaha Asá le lúguchi. Úaraguati bugaha lóuserun ligibugiñe Wabureme.33Gama lumoun, magidarúntu burí sanduariu to luáguboun fulasu íñuburiti, lugundun mederebugudungiña bugaha lílana fulasu lidan haritagun lun hafalaruni Habungiute hagüchagu.34Líbiri luáguti Hosafátü lúmagiñe furumiñeti darí lumoun lagumuhóun, anihein bürüwañu tidan liliburun Heú to lánina asusereduti, le liráü Ananí, anihein giñe tidan haliburun lurúeitegu Ísüraeli.35Lárigiñe aba ladügün Hosafátü, le lurúeite Hudá umadaguaü luma Okosíasi le lurúeite Ísüraeli, le bugaha wuribabei óuserun.36Aba lúaradun luma lun hadaagun ugunei lun tidin Tárüsisi, aba hadaagunu ugunei tuguya Esión-géberü.37Ábati lariñagun Elieserü le Maresáana le liráü Dodawau profesía le kóntüra Hosafátü:—Lagünrinchagubei Wabungiute le badügübei ladüga búaradun luma Okosíasi.
Ani susereti ítara, aba tagünrinchagunga ugunei, siñaaliti buga tidin Tárüsisi.
Bible Society of Honduras