2 Krónikasi21
Larúeihan Horamü
1Aba lounwen Hosafátü, aba labunún luburuguterugu Dawidi, aba larúeihan Horamü le liráü leweñegua.2Anihán hiri líbirigu Horamü, lirahüñü giñe Hosafátü: Asaríasi, Heieli, Sakaríasi, Mikaeli luma Sefatíasi. Sun ha, lirahüñü Hosafátü le lurúeite Hudá.3Edewehati bugaha háguchi saragu ílagu lauti golu luma pülata houn luma amu burí katei le gebegiti. Ruti giñe uburugu burí baríeiruati lun Hudá lun hagumadihan ñein, gama lumoun lun Horamü lederegerei arúeihani ladüga ligía lan íbugañaünbei.4Gama lumoun lárigiñe lachoururagun Horamü lungua luagu lálana larúeihan lúguchi, aba láfaraguniña sun lamulenu hama fiu ábutigu Ísüraeli.5Darandi-biama irumu lau dan le lagumeserunbei arúeiha, arúeihati widü irumu Herusalén.6Gama lumoun falá lumuti hémeri lurúeitegu Ísüraeli luma hémeri ladügawagun Aabü, hádangiñetu bugaha giñe ladügawagun Aabü lúmari; wuribati lubeiti bugaha lóuserun ligibugiñe Wabungiute.7Gama lumoun mabusenrunti bugaha Wabungiute lagumuchaguagüdüniña liduheñu Dawidi lídangiñe arúeihani luma daradu le meha ladügübei luma, le unbei füramase lan dandu lun kei houn lirahüñü luagu súnwandan lan ñeinbei lan aban hádangiñe arúeiha.8Lidan lidaani larúeihan Horamü, aba liñuragun Edomu lungua luagun lagumadihan Hudá, aba líchugun lurúeite lungua.9Ábati lidin Horamü hau lani abuguhatiña karü luma tau sun likarün to lánina wuribu, aba hásaarun áriebu aba hageindagun hama Edomuna ha buga egeyedagubaliña.10Gama lumoun furiti Edomu lábugiñegiñe lugumadin Hudá chülǘ lumoun dan le. Lidan giñe dan ligía, furiti giñe uburugu Libüná lábugiñegiñe Hudá, ladüga lígiruni Horamü Wabureme le Habungiute lagüchagu.11Lanwoun lira, bunaguati haligilisin gibe tubungiutegu luagu burí luwübüri Hudá, ani ladüga Horamü múaran habéi lílana Herusalén luma Wabureme, chararagüda laaña lílana Hudá.12Gama lumoun aba leresibirun Horamü aban gárada lúmagiñe profeta Elíasi, lariñahare tidan gárada tuguya:«Ítara liña lariñagun Wabungiute le Lubungiute Dawidi le bagücha bun: “Mafala bumuti lani Hosafátü le búguchi hénpulu, ni lani Asá le lurúeite Hudá,13lubaragiñe lira, aba bafalaruni hani lurúeitegu Ísüraeli hénpulu, ani badüga múaran habéi Hudaana hama lílana Herusalén luma Wabungiute kei hadüga liduheñu Aabü. Bóugudin luéi lira, áfaragua baaña bamulenu ha meha buídubaña igaburi sügǘ bau.14Ligía lábürügüdüba lubéi Wabungiute aba óunwenbu lamiselu hawagun bumutuniña, birahüñü, búmarigu luma luagun sun bumegen.15Lábürügüdüba saragu sandi buagun. Basandiruba burageirugugiñe lau aban sandi lüti darime láfuridun bisasa” ».16Ábati ladügün Wabureme lun hagañidun Filistéana hama Arawiana ha habesinanigu lánigu Kusu luma Horamü;17Aba houdin luagu Hudá aba hebelurun lau erei, aba hanügüni sun buiti le hadarirubei tidan lani urúei palasiu, barǘ hamaña lirahüñü hau sun lúmarigu. Hoakasirügüñein le amuleñein eredera.18Lárigiñe sun le, aba labeichuni Wabureme Horamü lau aban sandi le mareidaguati lurageirugu.19Sügüti dan, lárigiñe kei burí biama irumu, aba láfuridun lisasa ladüga sandi ligía, aba lounwen labadinagua lueirin gáriti. Máfuragungubeitiña lumutuniña watu lárigi lounwen kei bugaha hadüga hárigi lagüchagu.20Darandi-biama meha irumu lau dan le lagumeserunbei arúeiha, arúeihati widü irumu Herusalén. Úatiña írudagutiña luagu lounwen. Aba hábununi luburuguterugu Dawidi, gama lumoun mama lidan hamúaha urúeigu.
Bible Society of Honduras