2 Krónikasi19
Ladeinhan Profeta Heú lun urúei Hosafátü
1Aba lagiribudun Hosafátü le lurúeite Hudá lau magadiñein tidoun lani palasiu Herusalén.2Gama lumoun aba liabin profeta Heú le liráü Ananí lubaroun, aba lariñagun lun:—Ka uagu bíderaguei le wuribabei ani gamadagua buguya hama láganiñu Wabungiute? Gáñihali Wabungiute buma luagu katei le.3Lau sun lira, anihein amu katei buiti luagu bufulesein, ladüga günringuabá liyawa burí Asera to fulasuruguboun, ani rúguaadibu bungua lun báluahani Wabungiute.
Lanúadiruniña Hosafátü aguseragüdütiña
4Herusalén bugaha laganawa Hosafátü, gama lumoun súnwandan lidin ebeluha hamoun lumutuniña, lúmagiñe Bérüsewagiñe darí luagun burí luwübüri Éfürain, lun lagiribudagüdüniña lun Aburemei le Habungiute wagüchagu.5Ruti giñe aguseragüdütiña lidan sun burí luburugute Hudá le baríeiruabei.6Aba lariñagun houn aguseragüdütiña:—Ariha humeitia buidu ka lan hadügübei, lugundun mámaba lidan hiri wügüriña haguseragüda, lídanba liri Wabungiute, ani ñeinbei Wabungiute huma danme haguseragüdün.7Inebelá lubeiti Wabureme hun, góunigi humeime le hadügübei, lugundun mínsiñeti marichaü lun Aburemei le Wabungiute, ni múarani ni lun hárügüdün seinsu lun hadügün irichaü.8Ruti giñe Hosafátü fiu Lewitagu, fádirigu hama hábutigu haduheñu Ísüraelina Herusalén, lun heseriwidun kei aguseragüdütiña lidan burí lasiadihan Wabungiute luma lidan hawuribun lílana Herusalén.9Aba lariñagun houn:
—Lunti hadügüni sun katei lau inebesei lun Wabungiute súnwandan, lau úarani luma arumani.10Danme hayabin hupaisanun, ha lílana ámuñegueinarügü uburugu humoun lun harihini lébuna óunweni, o lun lan hadügüni ámuñegueinarügü lúrudu, luma gumadi, ariñaga humá houn lun madügün hamá duru ligibugiñe Wabungiute luéi lagañidun huma luma hama. Adüga huméi ítara, ábame mama lan hidurun duru.11Amaríasi, le fádiri le íñugutimabei, ligíaba hábuti lidan sun katei le tani ténpulu, Sewadíasi le liráü Ísümaeli, le hábuti lani Hudá türibu, ligíaba ábuti lidan burí katei le mama tani ténpulu, Lewitaguba íderaguaün lidan eseriwiduni tidan lúbaana aguseragüdüni. Gaguraasun humá lubeiti, huádigimarida! Ñeinlá Wabungiute hama ha adügüti buidu!
Bible Society of Honduras