1 Samueli6
Háguyugüdünu Filistéana bágüsi
1Sédüñein hati tau lubagüsina lidaradun Wabureme hamúanrugu Filistéana.2Aba hóundaruniña Filistéana fádirigu hama garíaahatiña, hariñaga houn:—Kaba funa san wadüga tau lubagüsina lidaradun Aburemei? Ariñaga huméi woun ida luba lan ligaburi wáguyugüdünu tárigoun.3Hariñaga houn:
—Anhoun háguyugüda lubagüsina lidaradun Lubungiute Ísüraeli, óunaha humá aban idewesei úara tuma keisi lafayeiruaha wuribati le hadügübei lun Aburemei. Ítara luba hareidagun, ábame gunfuranda humani ka lan lébubei labeichunün.4Aba hariñagun Filistéana:
—Kaba funa san wedeweha lun lafayeiruahame wadurun?
Hariñaga fádirigu houn:
—Seingü liyawa tumoru le lauti golu, aba luagu kada ábuti Filistéana; hama seingü hayawa garadun golu, kei ábanmeme lubéi hige hama hábutigu.5Adüga huméi lubeiti liyawa burí tumoru luma hayawa garadun ha adaagubaña wuribani uburugu, ábame híchugun uéiriguni lun Lubungiute Ísüraeli; fagua ítara luba lerederun labeichagunün hau sun lubungiutegu hageira.6Kábagia uagu tederera hanigi kei buga hadüga Ehiptuna luma harúeite, ha agurabahabaña darí lasufuriragüdüniña Wabungiute saragu lubá hígiragüdüniña Ísüraelina?7Adaagüda humá aban karü iseri; ábame hanügün bián bágasu ha garahüñütiña ñǘbürigiña, ha michugúngili yugu hawagu ni aban wéiyaasu, ábame hadahirunu karü hawagu; gama lumoun mígira humá lun houdin harahüñü bágasu hagía hárigi háguchugu.8Ábameti hanügünu lubagüsina lidaradun Wabureme ábame híchugunu tidoun karü, híchigeime idewesei lauti golu le lunbei hedewehani tidoun aban gafu, ábame híchugunu tóubagiñe. Ábame hígirunu karü lun tidin tungua.9Gama lumoun ariha humatia: Anhoun árügüda karü uburugun Betü-sémesi, Lubungiute Ísüraeli abeichubaliwa; anhoun márügüdün ñeinhin, mama ligía abeichubaliwa.10Aba hadügüni wügüriña hagía ítara. Aba hanügüniña bián bágasu garahüñütiña hagía, aba hádaruniña harahüñü lidoun hafarügan, ábati hadahirunu karü hawagu bágasu hagía;11lárigiñe aba híchugunu lubagüsina lidaradun Wabureme tidoun karü, tau sun gafu to ñein habéi hayawa garadun láutiña golu luma liyawa tumoru.12Lárigiñe aba hagumeserun bágasu hagía éibuga, aba hárügüdüni lémeri Betü-sémesi, amuuheina, afalareina aban üma suruti megeyedunga luagun ni aban oubaü. Éibugatiña Filistéana hárigi hárigi darí lumoun láfadaragun Betü-sémesi13Ñéinñanu Betü-sémesina lidan fulasu wayati alubaha türigu, dan le harihinbarun bágüsi, aba habuinchun lau ugundani.14Dan tachülürün karü licharirugu Hosué le Betü-sémesina, aba tararamun. Ñeinñein aban óunwenbu dübü. Ábati háfuragun Betü-sémesina watu lau tufulansuna karü, aba háfaruniña bágasu lun hadagaragüdün lun Wabureme.15Rarigüda hamaaruti buga Lewitagu bágüsi tuma gafu to lauboun ílagu golu, aba híchugunu luagu óunwenbu dübü ligia; aba hadagaragüdün Betü-sémesina lun Wabureme luagu weyu ligía.16Lárigiñe harihini seingü ábutigu Filistéana katei le, weyuméme ligía aba hagiribudun uburugun Ekürón.17Seingü liyawa tumoru golu le hadügübei Filistéana lun híchuguni lun Wabureme, hámagiñeti Asüdódu, Gasa, Asükalón, Gatü luma Ekürón;18ha seingü garadun, luagu haburugute seingü ábutigu Filistéana hagía, uburugu burí le baríeiruati luma lirahüñü fulasu le mabarieirúnti. Aniheingua óunwenbu dübü le uágubei híchigoun lubagüsina lidaradun Wabureme, aniheingua licharirugu Hosué le Betü-sémesina.19Gama lumoun áfarati Wabureme hádangiñe Betü-sémesina ladüga haríaahan tidoun bágüsi. Áfarati ǘrüwa-wein-diisi wügüriña, aba hayahuahan lílana fulasu luagu láfaragun Wabureme hádangiñe.20Ábati hariñagun Betü-sémesina:
—Kaba gayara lararamun ligibugiñe Wabureme, ligibugiñe Wabungiute le Sándubei? Kaba funa san uagun lidin lídanme ladireirun wawéi?21Aba hóunahan ariñaga houn lílana Kiriatü-hearimü:
—Águyugüda hamá Filistéana lubagüsina lidaradun Wabureme, ñübuin humá lubeiti anügoun.
Bible Society of Honduras