1 Samueli2
Teremun Ana
1Aba tafurieidun Ana, tariñaga:«Nabureme gúndaatina buma tau sun nanigi, lugundun rútibu iseri erei nun. Gayaraati nadimurehan hawagu náganiñu lugundun íderagua báadina Gúndaatina!2Úati ni aban sánduti kei buguya, Nabureme! Úati óunigiruti kei buguya! Wabungiute! Úati amu buéi!3Madimurehalá ni aban lau pantaü, ualá ni aban anaaguti lungua saragu, ladüga Wabureme, ligía Búngiubei le subudihabúbei lun sun katei, ani ligía asubudirubalin ani aguseragüdaléi sun le hadügübei gürigia.4Günringua lumutu hagimaran gabafutiña, ru ligía ubafu houn ha mabafubaña;5Ha meha gámabaña darí lun lígiragun hama, guentó háhayaguña houngua tuagu murusun fein, ánhaña ha meha lamabaña, malamaaña guentó. Würi to meha maraüboun, sédühali wéiyaasu tagaraüdün; anhoun to meha gíbebaña tirahüñü, magaraüdünharu.6Wabureme íchugubei ibagari, ligía agidarei, rarigüda lumutiwa lidoun umúahaü, iñuragualawa ñéingiñe.7Gudemegüda lumutiwa Wabureme, rísigüdalawa; Ábürügüda lumutiwa, saragüdalawa.8Iñuragua lumutiña Bungiu gudemetiña múarugugiñe, sagaláña arihadihatiña hímerugugiñe lun lañuuragüdüniña hadan wügüriña wéirigutiña, lun lidan hamá ubaraü íñuguti; ladüga Wabureme laburemebei lebu múa, ani ligibuagu ebu ligía líchigei ubóu.9Góunigi lumuti héibugun ha gúnfulibaña luma, ánhaña ha salufuribaña, hilaguatiña lidan luburiga, ladüga úati agañeiruti lau lere lábua.10Lagünrinchagubaña Wabureme láganiñu, lóunahaba wayuhuru hawagun siélugiñe. Laguseragüdübaña Wabureme sun lílana ubóu, líchuguba ubafu lun urúei le lanúadirubei, ábame laganwoundagüdüni lubafu».11Lárigiñe, aba lagiribudun Elikaná lúbiñoun uburugun Ramá, ánheinti irahü, aba lerederun eseriwida lun Wabureme, lábugiñe lererehan fádiri Elí.
Hasalufurin lirahüñü Elí
12Salufuritiña meha lirahüñü Elí, meberesentiña lau Wabureme,13meberesen hagía lun hadügüni le yuubei lun hadügüni fádirigu lun fulasu, dan le burí liabin aban gürigia adagaragüda, ábaha liabin aban lubúein fádiri lau aban fígiedu lúhaburugu, danti le anihán lan úi ábouagua,14ábaha ládaruni fígiedu lidoun sóudieru, sunti le ladigin lau fígiedu, aba líchuguni lun fádiri. Ítara liñaha hadüga houn sun Ísüraelina ha achülürübaña Siló.15Bóugudin luéi lira lubaragiñeha lagudún lagüle animaalu luagu latarü, ábaha liabin lubúein fádiri, aba lariñagun lun le lunbei líchuguni adagaragüdüni: «Ruba úi nun lun násürahani lun fádiri; lugundun meresibirun lubéi úi héfeeli búmagiñe, íñeugaba bíchigei».16Ánheinti ariñaga gürigia ligía lun luagu gasu lan láguduni agülei furumiñe, lárigiñeme lan gayaraahalime lanügüni le labusenrun, ábaha lariñagun musu: «Gasu bíchuguni nun guentó! Anhein míchugun ban nun, nanügübei buéi lau néregu».17Wéiriti lubeitiha figóu le hadügübei irahüñü ha ligibugiñe Wabureme, lugundun kei ni kata hanügüni idewesei le yuubei lun Wabureme.18Sunti dan le, anihánti buga Samueli tau aban tidáü dúnigu to tautu linu luougua eseriwida lun Wabureme.19Ságütiha irumu dan le houdin lagübürigu ténpulurugu adagaragüda lun Bungiu, tanügübaha lúguchu aban tiraüraü lidáü to táhüchün.20Ábatiha labiniruni Elí Elikaná tau sun lúmari ítara:—Fáyeilabu Wabureme lau líchugun isaanigu bun tau würi to, leweñegua le tanúadirubei lun.
Lárigiñe le, ábaha hagiribudun hábiñoun,21aba labinirunu Wabureme Ana, aba tadageinadun. Ítara liña tagaraüdün Ana ǘrüwa wügüriña irahüñü hama bián würiña, aweirideina ligíati Samueli ligibugiñe Wabureme.22Ánheinti buga Elí, wéiyaali, gama lumoun gefenti luagu sun le hadügübei lirahüñü houn Ísüraelina, luagu giñe gámari hamaniña würiña ha eseriwidubaña tubenari kianpu to lánina óundaruni luma Wabungiute.23Aba lubeiti lariñagun houn:
—Adimurehatiña sun gürigia nun luagu luriban hóuserun huguya nirahüñü. Ka uagu ítara lubéi hóuserun?24Nirahüñü, mabuidunti katei le habahüdagubei lánigu Wabureme huagu.25Anhein adüga aban gürigia wuribati lun aban gürigia líledi, gayaraabei lafansehani Wabureme katei luagu lufulesein le unbei ladügǘwa wuribati; gama lumoun anhein lanabagua aban gürigia Wabureme, kábagia anüga fulasu luéigiñe gürigia ligía.
Gama lumoun madügüntiña gasu lau le lariñagubei háguchi houn, lugundun haritaguaali lan buga Wabureme lagidaruni habagari.26Aweirideinameme ligíati buga Samueli, ani hínsiñeti lóuserun dandu lun Wabureme kei houn gürigia.27Lidoun dan ligía, aba lachülürün aban profeta bisidei Elí, aba lariñagun lun:
—Anihán lererun Wabureme: “Dan meha le Ehiptuñanu lubéi bagüchagu eseriwida lun urúei Ehiptuna, arufudaguatina nungua houn furangu.28Aba nanúadiruniña hádangiñe sun lani Ísüraeli türibu lun hagíaba lan nufadirinigu, lun hanügün adagaragüdüni gudawarügüti luagun nani latarü, lun hágudahan kupali, luma lun hanügünu tidáü dúnigu niñúarün. Bóugudin luéi lira, ru numuti sun edewehani le hágudahabei Ísüraelina lidan liri Wabureme houn bagüchagu.29Kati uagu hanügünbalin adagaragüdüni luma edewehani le uágubei nariñaga lun ladügün kei ni kata? Kagia uagu himei bubaliña birahüñü nuéi, adibunedagüdaña lau sun lubuidun-agei hedewehan Ísüraelina ha nánigu?”30Ítara liña lubeiti, Wabureme le Lubungiute Ísüraeli, le buga ariñagubei luagu beseriwiduba lan lun hau sun biduheñu hama liduheñu búguchi súnwandan, lariñahare guentó: “Máhabadina lun ítara luba lan katei le, níchuguba uéiriguni houn ha íchugutiña uéiriguni nun, ánhaña ha únbaña niyereeguda hanügǘba lun búlame. Au, le Aburemei ariñagubalin.31Yarafaali dan lun nagünrinchaguni bubafu luma habafu bagüchagu, ani úabei ni aban hádangiñe biduheñu aweiyaduti.32Barihubei lau íruni luma gimugaü sun buiti le lunbei nadügüni lun Ísüraeli, ani úabei hádangiñeti biduheñu aweiyaduti.33Gama lumoun nígiruba aban hádangiñe biduheñu lubadu nani latarü lun lagumuchagun lagu lau gimugaü, gumuguame luani lau igarigu, hámeti híbiri badügawagun, háfarawaguba.34Le lunbei lasuseredun houn birahüñü Ofuní luma Fineesi, leseriwiduba bun kei aban seini: Hóunweguba biángubei hagía lidan ábanmeme weyu.35Lárigiñeme, ábame níchugun aban fádiri le uáguti nemenigida, le nadagimeinti úaragua luma nugundan, ábame ladügawagun lan eseriwida lun urúeime le lunbei nanúadiruni súnwandan.36Súnmeti ha wínwangiñabaña hádangiñe biduheñu, hayabinba abuluchagua ligibugiñe lun libihin aban seinsu pülata o tuagu lan murusun lan fein lúmagiñe, layumuraguame lun lun líchugun wadagimanu lun kei fádiri lun lawinwandun”.
Bible Society of Honduras