1 Urúeigu20
Lagañeiruniña Aabü Síriana
1Aba lóundaraguniña Ben-adadü le lurúeite Siria lisudaranigu hama darandi-biama urúeigu lumadagu, hau ligabayun tuma likarün to lánina wuribu, aba lidin uburugu Samaria, aba legeyedaguni uburugu, aba lábürühan luagun.2Aba lóunahan ariñaga lun Aabü, le lurúeite Ísüraeli:—Lariñahare Ben-adadü: “Yuuti birisin nun, búmarigu hama habuidun-agei birahüñü”.4Lariñaga lurúeite Ísüraeli lun:
—Kei bariñaguni urúei, bani au lau sun le númabei.5Ábaya houdin óunagüleigu lumoun Aabü, aba hariñagun lun:
—Lariñahare Ben-adadü: “Óunahaadina ariñaga bun luagu gasu lan bíchuguni birisin nun, hau búmarigu hama birahüñü.6Ani haruga kei oura le, nóunahabaña nani úfisigu lun hasagarahanu bani palasiu tuma haban bani úfisigu, ábame hanügüni sun le hínsiñeti houn hánime”.7Ábati lóunahan lurúeite Ísüraeli hawagu sun ábutigu fulasurugu, aba lariñagun houn:
—Kei harihini, láluahaña wügüri le ladügün wuribani nun, lau sun mamahan nan nederegeruniña númarigu lun hama nirahüñü luma nirisin.8Hariñaga wéiyaaña mutu hama híbiri gürigia lun:
—Madügabá gasu lau.9Ábati lariñagun Aabü houn lóunagülegu Ben-adadü:
—Ariñaga humá lun urúei luagu nadügübei lan sun le uágubei lariñaga nun furumiñe, anhein lan le uágubei lariñaga guentó, siñá lan nadügüni.
Aba houdin óunagüleigu lau lóunabagüle Aabü lun Ben-adadü,10aba lóunahan Ben-adadü ariñaga lun Aabü:
—Bei hamana búngiugu hanarime, anhein buídurügü kaliki le Samariabei lun lichugún murusun lun kada aban hádangiñe nánigu.11Aba lóunahan lurúeite Ísüraeli ariñaga lun:
—Meremuhabátia agañeiruni lubaragiñe dan.12Dan laganbubalin Ben-adadü lóunabagüle Aabü, látaguña hama fiu urúeigu tidan dibasein to hadügüboun. Ábati lariñagun houn lani úfisigu:
—Aranse humá!
Aba haranserun lun hábürühan luagun uburugu.13Aba liabin aban profeta lumoun Aabü le lurúeite Ísüraeli, lariñaga lun:
—Lariñahare Bungiu: “Lau sun hibe áganiñu ha, nederegerubaña búhaburugun uguñe, lun basubudiruni luagu au lan Búngiubei”.14Aba lariñagun Aabü lun:
—Ida lubagia luwuyeri lederegeruniña nun?
Lariñaga profeta lun:
—Ariñagaali Aburemei luagu hádangiñeba lan nibureintiña ha íderagubaliña agumadihatiña fulasu.
Lariñagaya Aabü:
—Kábagia achüüra furumiñe?
Lariñaga profeta lun:
—Buguya.15Ábati labahüdüniña Aabü nibureinhaña ha íderagubaliña agumadihatiña fulasu, bián-san-darandi-biama, hama súdaragu Ísüraelina ha sédübaña-milu wügüriña.16Aba háfuridun amidirugu, sun anihamémegua lan Ben-adadü átagua hama darandi-biama urúeigu ha lumadagu tidan dibasein,17aba hawanserun ha íderagubaliña agumadihatiña fulasu furumiñe. Dan laganbunbei Ben-adadü luagu furiha lan fiu wügüriña Samariagiñe,18aba lariñagun:
—Lau lan yebe darangilaü hayabin, lun yebe wuribu, busén numutiña wínwanñu!19Aba háfuridun ha íderagubaliña agumadihatiña fulasu uburugugiñe, súdaragu hárigi hárigi.20Aba láfarun kada aban hádangiñe aban ágani, aba héibaagun Síriana. Aba héibaahaniña Ísüraelina, gama lumoun aba lesefurun Ben-adadü éibaagueina gabayuagu hama fiu súdaragu ha hawagutiña gabayu.21Ábati lawanserun lurúeite Ísüraeli, aba lanügüniña halügüniña gabayu tuma burí hakarün to lánina wuribu, aba ladügün aban óunwenbu áfarahani hadan Síriana.22Lárigiñe aba liabin profeta lumoun lurúeite Ísüraeli, lariñaga lun:
—Ruba hanwoun bisudaranigu, saminabéime le lunbei badügüni buidu, lugundun lageindaguayaba lurúeite Siria buma aban irumu lárigiñe le.23Aba hariñagun lani lurúeite Siria úfisigu lun:
—Búngiugu lánina wübü habungiutegu Ísüraelina, ligía weferidirunbalin wuribu hama. Gama lumoun ánhawa ageindagua hama lidan fulasu mawübüriti, chóuruti wagañeiruniña.24Le lunbei badügüni guentó, bagidaruniña urúeigu lídangiñe habara, ábame bíchugun úfisigu heweñegua,25ábayame bóundarun heweñegua súdaragu ha áfarawagubaña, gabayu leweñegua gabayu, karü teweñegua karü. Ábameti wageindagun hama lidan fulasu mawübüriti, chóuruti luagu wagañeirubei lan wuribu.
Gúndaati Ben-adadü lau saminaü le, aba lafalaruni.26Aban irumu lárigiñe, aba labahüdüniña Ben-adadü Síriana, aba lánhiñuragun uburugun Afekü, lun lageindagun luma Ísüraeli.27Aba giñe habahüdüniña Ísüraelina hasudaranigu, aba híchugun éigini houn, aba háfuridun habaroun Síriana. Hagibugiñe Síriana ítara haña Ísüraelina kei fiu gábara, ánhañati Síriana gíbetiña.28Ábati liabin aban profeta lumoun lurúeite Ísüraeli, lariñaga lun:
—Lariñahare Bungiu: “Kei ariñagaaña lan Síriana luagu Aburemei lan lánina wübü au, mama nan Aburemei lánina fulasu wayati, nederegeraaña saragu gürigia ha búhaburugun. Ítara luba basubudiruni luagu au lan Aburemeibei”.29Rédeitiña Síriana hama Ísüraelina aganawa gagibugu luagu sedü weyu, luagu lisedün weyu ligía lagumeserun wuribu. Lidan weyu ligía, áfaratiña Ísüraelina san-milu súdaragu Síriana ha eibu-umutiña.30Ha híbiri súdaragu aba hanurahan uburugun Afekü, gama lumoun aba lábürühan lubarieirun uburugu hawagun wein-sedü-milu wügüriña ha yebe éibaagubaña. Anurahati giñe Ben-adadü, aba lachülürün uburugun, aba laramudagun tídangiñe aban muna tidoun aban.31Ábati hariñagun lani úfisigu lun:
—Aganbaadiwa luagu gúnfuli hamani lurúeitegu Ísüraeli hadaradun; daü wamá lubeiti tagübüri gamisa wawougua luma aban gúrudu luagu wagiina, ábame woudin lumoun lurúeite Ísüraeli, ariha wamaamugei anhein feruduna lan wabagari.32Ábati hadaüragun tagübüri gamisa luma aban gúrudu hagiinawagu, aba houdin lumoun lurúeite Ísüraeli, aba hariñagun lun:
—Lóunahañadiwa Ben-adadü ayumuragua hun, urúei, lun feruduna humani libagari.
Lariñaga Aabü houn:
—Wínwangili san? Ítara liña nun kei aban íbiri!33Aba harihini wügüriña hagía katei le kei seini buiti, aba giñe hadimurehan kei ladimurehan, hariñaga:
—Líbiri urúei Ben-adadü!
Lariñaga urúei houn:
—Heiba anügei!
Ábati larufudagun Ben-adadü lungua ligibugiñe Aabü, aba ládinagüdüni Aabü tidoun likarün.34Lariñaga Ben-adadü lun:
—Náguyugüdübei uburugu burí le lagidarubei núguchi luéi búguchi bun; ani gayaraabei gamarasun ban Damasüku, kei meha gamarasun lan núguchi uburugu Samaria.
Lariñaga Aabü lun:
—Au luagu nóubadina, ígira numutibu lun bidin.
Ítara liña ladügün Aabü umadaguaü luma Ben-adadü, aba lígiruni lun lidin.35Aba lariñagagüdün Aburemei lun aban hádangiñeti profetagu lun lariñagun lun louba:
—Bagayuaha nuagu!
Gama lumoun máhati le aban ladügüni.36Ábati lariñagun profeta ligía lun:
—Ladüga madügün ban gasu lau le lariñagubei Bungiu, lachubaruba aban liñún buagun danme bidin nuéi.
Ani ítara liña lasuseredun, kei lidin le aban lúmagiñe profeta, aba liabin liñún lubaroun aba láfaruni.37Lárigiñe aba ladunragun profeta luma ábanya wügüri, aba giñe lariñagun lun lun lagayuahan luagu, aba lagayuahan wügüri ligía luagu, aba labuleseiruni.38Ábati lagüraguni profeta lagu, aba lidin agurabei urúei luagu üma.39Dan lásügürün urúei, aba lagúaragun profeta lun:
—Arihabá san urúei, aba nidin wuriburugu, aba liabin aban súdara lau aban adaürǘti, aba lariñagun nun lun narihin lau, gama lumoun anhein lan anura nuéi, láfarubadina lan hilagubei o nafayeirun lan ǘrüwa-milu murusun pülata.40Keiti nerederun etenira lun amu katei; aba lanurun adaürǘti nuéi.
Lariñaga lurúeite Ísüraeli lun:
—Buguya guánarügü ariñaga baali luagu gadurun ban, ani siádiguaadibu bungua.41Aba lagidaruni profeta lidáü lagu, aba larihini urúei luagu aban lan hádangiñe profetagu.42Ábati lariñagun profeta lun:
—Lariñahare Bungiu: “Ladüga bígiragüdüni wügüri le nasiadirubéi lun lounwen, bafayeiha luagu libagari lau bibagari, luma hau bumutuniña hawagu lumutuniña”.43Ábati lidin lurúeite Ísüraeli Samarioun lau íruni luma igañi, aba lebelurun tidoun lani palasiu.
Bible Society of Honduras