1 Urúeigu21
Aabü luma lani Nawotu beibei-agei
1Átiri dan lárigiñe, ñeinñein aban wügüri Hesüreelina gíriti Nawotu, ganadüriguti beibei fulasurugu, tubadu lani Aabü palasiu.2Luagu aban weyu, aba lariñagun Aabü lun Nawotu:—Rubei bichari tau beibei nun lun nábunagun nadü ñein, kei tóubagiñeñein lan nuban. Níchuguba aban ichari tau beibei buítimati bun leweñegua; o ánhabu busén fáyeineime bun.3Lariñaga Nawotu lun Aabü:
—Mígiralana Aburemei lun níchuguni nalagante hárigi nagübürigu bun.4Aba lidin Aabü lúbiñoun lau íruni luma igañi luagu lóunabagüle Nawotu, ladüga lariñagun lun luagu michu lubéi lan lalagante hárigi lagübürigu lun. Lachülürün lúbiñe, aba larounrun ligabananrugu lau ligibu tóubawagun muna, máhati ni lun leigin.5Ábati tiabin Hesawéli to lúmari luagun, aba tariñagun lun:
—Ka uagu bírunbei, ani maha buguya beigin?6Lariñaga Aabü tun:
—Ladüga namuriahan luma Nawotu le Hesüreelina lun laluguruni lichari le taubei beibei nun o lun lan hamuga níchugun amu ichari tau beibei lun leweñegua. Gama lumoun máhati líchuguni nun.7Ábati tariñagun Hesawéli lun:
—Ma funagia buguya agumadihabei Ísüraeli? Saraba, beiga, ani darangilubá. Nibihubei lichari Nawotu bun!8Aba tabürühan gárada lidan liri Aabü, aba tíchuguni liseyun urúei tuagu, aba tóunahanu houn wéiyaaña mutu, hama ábutigu ha aganóubaña lidan fulasu le ñein lubéi laganawa Nawotu.9Lariñahare tidan gárada burí tuguya:
—Ariñaga humá houn gürigia lun hayunarun, ábame hañuuragüdüni Nawotu hagibugiñe lílana fulasu.10Ábameti hañuuragüdün bián gefentiña yéetiña ligibugiñe, lun hariñagun luagu íñaragua laali lan Nawotu Aburemei labu sun urúei. Ábameti hasagaruni, ábame hachamuragun dübü luagun lun lounwen.11Aba hadügüni lílana lageira Nawotu, úara hama wéiyaaña mutu hama ábutigu le tariñagubei Hesawéli houn tidan gárada:12Aba hariñagun houn gürigia lun hayunarun, aba hañuuragüdüni Nawotu hagibugiñe lílana fulasu.13Ábati hayabin bián gefentiña yéetiña, aba hariñagun hagibugiñe sun lílana fulasu luagu íñaragualani Nawotu Aburemei labu sun urúei. Ábati hasagaruni uburugugiñe, aba hachamuragun dübü luagun, aba lounwen.14Lárigiñe aba hóunahan ariñaga tun Hesawéli luagu hilá lan Nawotu lárigi hachamuragun dübü luagun.15Dan taganbuni Hesawéli, aba tariñagun lun Aabü:
—Beiba barübei lichari Nawotu le Hesüreelina bánime, le aubei lamahara bun. Hilá Nawotu.16Kei lasubudiruni Aabü luagu hilá lan Nawotu, aba lanügüni lichari lánime.17Ábati lariñagun Aburemei lun Elíasi, le Tísübena:18—Beiba lumoun Aabü, le lurúeite Ísüraeli, le aganóubei Samaria. Anihein licharirugu Nawotu le lagidarubei luéi reiti guentó.19Bariñagame lun: “Lariñahare Bungiu: Kei áfaraba lubéi Nawotu lun bagidaruni lumegen luéi, lememe ñein lubéi héheluhei ounli lita Nawotu, ñeinba giñe héheluhei bita”.20Lariñaga Aabü lun Elíasi:
—Darí baadina san, nágani?
Lariñaga Elíasi lun:
—Anha, ladüga lérügüñein wuribabei badüga ligibugiñe Bungiu.21Ariñagaali lubeiti Bungiu: “Nanüga lamiselu buagun, nagumuchaguagüdaaña badügawagun, nagumucha hau sun wügüriña ha badügawagun ha Ísüraelina.22Nadügüba giñe houn biduheñu kei nadüga houn liduheñu Heroboamü le liráü Nabatü, luma houn liduheñu Baasá, le liráü Aíasi, ladüga hagañidagüdünina lau hafigougüdüniña lílana Ísüraeli”.23Ariñagaali giñe Aburemei tuagu Hesawéli: Héigiboun ounli Hesawéli áraabu Hesüreeli.24Biduheme le óunweti uburugu, héigibei ounli, le óunweti áraabu, héigibei dunuru áraabuna.25(Úati bugaha ni aban adügüti wuribani kei Aabü; tadundehan Hesawéli to lúmari, káteirügüñein wuribati ladüga ligibugiñe Wabureme.26Adügati aban lanarime wuribani lau láhuduragun houn guáriua, kei meha hadüga Amoruna ha lachagarubaña Aburemei hañúarürugugiñe Ísüraelina.)27Dan laganbuni Aabü sun le, aba laheiridagunu ladaüragun, aba ladaürün tagübüri daüguaü, aba layunarun. Aba tau lan tagübüri daüguaü larumuga, híruñaha ligía.28Ábati lariñagun Aburemei lun Elíasi:29—Ariha baali san lǘnabudaguagüdün Aabü lungua nigibugiñe? Ladüga ladügüni ítara, manügün nubéi wuribani hawagun liduheñu sun wínwangili lan, lídanba lidaani liráü nadügei.
Bible Society of Honduras