1 Urúeigu19
Lanurahan Elíasi lun Orebün
1Aba labahüdaguni Aabü sun katei le ladügübei Elíasi tun Hesawéli, luma luagu ladürühani hachügü lani Baali profetagu.2Ábati tóunahan Hesawéli ariñaga lun Elíasi:—Anhein Elíasi lubéi buguya, Hesawéli nuguya! Bei hamana búngiugu hanarime, ánhana madügün bun kei badüga houn profetagu ha, lumoun haruga kei oura le.3Aba larihini Elíasi luagu dencha lan libagari, aba lidin uburugun Bérüsewa, le lani Hudá, aba lígiruni lumusun ñein.4Lárigiñe aba lidin lidoun fulasu mageirawati, aba léibugun sun weyu; lagumuhóun oura, aba lañuurun tábugiñe aban tídibu wewe. Wéiriti labusenrun lounwen, darí lun lariñagun:
—Buídurügaali, Nabureme! Gidabei nibagari, ladüga mabuiduntina hawéi nagübürigu!5Aba larounrun lábugiñe tídibu wewe ligía, aba larumugun. Gama lumoun aba liabin aban ánheli aguura luagu, aba lariñagun lun:
—Saraba, beiga.6Aba larihin Elíasi tubadu lichügübarari, ñeinñoun lan aban durudia héfeeru ligibuagu leñegura watu, luma aban fudu lau duna. Ábati lásaarun, aba leigin gurá ligía, lárigiñe ábaya larounrun.7Gama lumoun ábaya liabin lani Aburemei ánheli luagu libiaman wéiyaasu, ábaya laguurun luagu, lariñaga lun:
—Saraba, beiga, lugundun dísegili buéiyasun.8Aba lásaarun Elíasi, aba leigin, gurá ligía. Aba lárügüdün erei lárigi éigini ligía lun léibugun bián-wein weyu luma bián-wein áriebu, darí lachülürün Orebü, le luwübüri Aburemei.9Dan lachülürün ñein, aba lebelurun lidoun aban lagadábugiñe dübü, aba lásügürüni áriebu ñein. Gama lumoun aba lariñagun Aburemei lun:
—Ka badügübei ya, Elíasi?10Lariñaga Elíasi lun:
—Wéiriti nemeidin bau Nabureme, Aburemei Suntigabafu, ladüga ígira hamá Ísüraelina bidaradun, fui hamá bani latarü, áfaragua hamaña bani profetagu tau eféin. Áurügaali eredera, ani háluahañadina giñe lun háfarunina.11Lariñaga Aburemei lun:
—Furiba, ábame berederun rara luagu wübü nigibugiñe.
Lidan oura ligía, aba lásügürün Bungiu, aba láfurun aban garabali héreti, aba lagünrinchaguni wübü, abouhaléi burí dübü ligibugiñe Bungiu; gama lumoun úati Aburemei lidan garabali ligía. Lárigiñe garabali ligía, aba ladagarun aban hárabaganali, gama lumoun úati giñe Aburemei lidan hárabaganali ligía.12Lárigiñe hárabaganali, aba liabin aban watu gemeti, gama lumoun úati giñe Aburemei lidan watu gemeti ligía. Gama lumoun lárigiñe watu gemeti ligía, aba laganbún aban amuri hámaruti.13Dan laganbunbalin Elíasi, aba ladouragun lau ligibu tau lidáü, aba láfuridun, aba lararamun lubenari lagadábugiñe dübü. Aba laganbun lariñagun aban umalali lun:
—Ka badügübei ya, Elíasi?14Lariñaga Elíasi:
—Wéiriti nemeidin bau Nabureme, Aburemei Suntigabafu, ladüga ígira hamá Ísüraelina bidaradun, fui hamá bani latarü, áfaragua hamaña bani profetagu tau eféin. Áurügaali eredera, ani háluahañadina giñe lun háfarunina.15Ábati lariñagun Aburemei lun:
—Giribubá le ñéingiñe lubéi biabin lidoun fulasu mageirawati le lani Damasüku, ábame banúadiruni Asaeli lurúeiteme Siria,16Heú le libari Nimüsí kei lurúeite Ísüraeli, huruguabéime Eliséu le liráü Safatü, le lílana Aweli-meolá kei profeta beweñegua.17Ítara, le esefuruti tuéi lefeinte Asaeli, láfarubei Heú, le esefuruti tuéi lefeinte Heú, láfarubei Eliséu.18Ani nígiruba sedü-milu gürigia Ísüraeli, ha máhuduragungiña lun Baali machú haméi.
Laguarúniwa lun Eliséu
19Aba lidin Elíasi ñéingiñe, aba ladariruni Eliséu awouha. Ñéinñanu duusu feru bulu bágasu lubá lubá, ligía lau le lagumuhóun feru. Aba lidin Elíasi luagun, aba ladourunu lidáü luagun.20Furese furese aba lígiruniña Eliséu bágasu, aba léibaagun lárigi Elíasi, aba lariñagun lun:—Ígiraba lun nidin ayouragua houn nagübürigu, lárigiñe ábame nafalarunibu.
Lariñaga Elíasi lun:
—Beiba, gama lumoun haritaguabei le nadügübei bun.21Aba lidin Eliséu, aba lanügün bián bulu bágasu, aba láfaruniña, aba lásürahaniña laumeme luéwena awouhagülei, aba líchuguniña houn gürigia lun heigin. Lárigiñe aba lidin lárigi Elíasi, aba lerederun eseriwida lun.
Bible Society of Honduras