1 Urúeigu18
Larufudagunya Elíasi lungua lun Aabü
1Aba lásügürün dan. Ǘrüwa irumu lárigiñe, aba lariñagun Aburemei lun Elíasi:—Beiba arufudagua bungua ligibugiñe Aabü, lugundun náhuyagüda huya.2Aba lidin Elíasi lun larufudagun lungua ligibugiñe Aabü. Hanarimeti buga ilamaü le Samariabei.3Aba lagúarun Aabü lun Abüdíasi le hábuti nadagimeintiña. (Abüdíasiti ligía aban meha wügüri arufuduti inebesei lun Wabureme.)4Danbei meha tagumeserunbei Hesawéli áfaraguaña lani Aburemei profetagu, aba lanügün san hádangiñe, aba ládarun dimí-san hádangiñe lidoun aban lagadábugiñe dübü, dimí-san lidoun aban, ru ligía éigini luma duna le hemegeirubei houn.5Aba lariñagun Aabü lun Abüdíasi:
—Keimoun éibugei fulasu luma sun duna luma lísensen duna ariha wamaamuga ánhawa adarira éigini houn walügüniña gabayu hama mile, rédeiwañein malügüniñaga.6Ábati hafanreinragun, aba lidin Aabü luéigiñe aban üma, Abüdíasi luéigiñe amu.7Luagu üma, aba liabin Elíasi lubaroun Abüdíasi, dan lasubudirunbalin Abüdíasi Elíasi, aba labuluchagun ligibugiñe, aba lariñagun:
—Ma nabureme Elíasi buguya!8Lariñaga Elíasi lun:
—Anha, au. Beiba bariñagame lun Aabü luagu anaha lan ya.9Lariñaga Abüdíasi lun:
—Anhein nariñaga katei le lun urúei láfarubadina.10Fiñutina bun luagu liri Wabureme le Bubungiute, luagu ua lan fulasu ñein lumuti móunahan lan Aabü áluahabu; ani dan le hariñagun áluahatibu lun ua ban ñein, fiñugüda lumutiña luagu madari hamanibu.11Guentoti, busentibu lun nidin ariñaga lun nabureme luagu abuhán lan ya!12Dánmeti nidin búmagiñe, ábame lanügünibu lani Bungiu Sífiri lidoun aban fulasu ibidiñewati. Dánmeti nidin íchigei uganu lun Aabü, madari lubadibu, ábame láfarunina. Au inebeti Aburemei nun lúmagiñe niñüraü.13Mefentibu funagia luagu le nadügübei dan meha táfaraguniña Hesawéli lani Aburemei profetagu. Aramudatina san hádangiñe lidan lagadábugiñe dübü, runéi éigini le hemegeirubei houn.14Babusenrubei nidin ariñaga lun nabureme luagu abuhán lan ya? Láfarubadina!15Lariñaga Elíasi lun:
—Fiñutina luagu Aburemei Suntigabafu, le unbei neseriwida luagu narufudaguba lan nungua ligibugiñe Aabü uguñe.16Aba lidin Abüdíasi áluahei Aabü, lun líchuguni uganu lun, Ábati lidin Aabü adunragua luma Elíasi.17Dan larihini, aba lariñagun lun:
—Buguya san le, le adügübei lun lachagaragun Ísüraeli?18Lariñaga Elíasi lun:
—Machagaraguagüdün numutiña, bachagaraguagüdün buguya hama bumutuniña, ladüga hígiruni lugumadin Bungiu, aba háhuduragun houn ámuñegueinarügü liyawa Baali.19Óunahaba óundaraguagüdaña sun Ísüraelina luagu wübü Karümélu, hau gádürü-san-dimí lani Baali profetagu hama gádürü-san lani Asera profetagu ha tagüriarubaña Hesawéli.
Elíasi hama lani Baali Profetagu
20Aba lóunahan Aabü hawagu Ísüraelina, aba lóundaruniña profetagu luagu wübü Karümélu.21Ábati liabin Elíasi hawagun súngubei, aba lariñagun houn:—Ídaba san hígirei huraraü biánguati le? Anhein Aburemei lubéi Búngiubei le tímatimaati, falá huméi, anhein Baali lubéi, ligialá hafalara.
Móunabun hamuti gürigia.22Aba lasigirun Elíasi ariñaga:
—Áurügaali lani Aburemei profeta wínwanñu, ánhaña lánigu Baali, añaheingua gádürü-san-dimí profetagu.23Rúa hamá bián bágasu wügüriña, ábame hanúadahan lánigu Baali aban, ábame hamurusuhani, ábame híchuguni ligibuagu watu, gama lumoun mébeda haméi watu. Ábame namurusuhani le aban bágasu, ábame níchuguni ligibuagu watu, gama lumoun mébedun nubéi giñe watu.24Ábameti hamuriahan hama hubungiutegu, aume amuriaha luma Bungiu, leme Bungiu le óunabuti lau lóunahan watu gemeti, ligía Búngiubei le tímatimaati.
Aba hariñagun súngubei:
—Buiti daradu le!25Ábati lariñagun Elíasi houn lani Baali profetagu:
—Anúadaha humá aban hádangiñe bágasu, ábame haranseruni furumiñe, kei gibe hubéi. Ábameti hagúahan hawagu hubungiutegu, gama lumoun mébeda huméi watu.26Aba lubeiti hanügüni bágasu le ichugúbei houn, aba haranseruni, aba hagúahani Baali lúmagiñe binaafin chülǘ lumoun amidirugu. Hariñaga:
—Baali, óunababawa!
Aba hachubahan geyegua lau latarü le hadügübei, gama lumoun móunabun lumutiña Baali.27Luagun amidirugu, aba ladaagun Elíasi bula hau, lariñaga houn:
—Héretimala hagúarahan. Máfuna bereseguñein, o aningira lan lábuogua ódime aningira adüga wéiyaasu. Máfuna larumuguña ani gasu hagagudahani!28Aba hasigirun agúaraha, áfiuragua houngua tau gusiñu kei hagaburi, darí hágawahani hata.29Aba lásügürün amidi, ani lau sun hasigirun agúaraha, luma achubaha kei lülü tau, darí lachülürün oura lun adagaragüdüni, mounabúntiña Úati óunabutiña ni aganbutiña!30Ábati lariñagun Elíasi houn gürigia:
—Yarafa humá nun.
Aba hayabin súngubei lubadun, aba laranseruni lani Aburemei latarü le buga héiguaalibei.31Aba lanügün duusu dübü, kei hibe türibu ha lani Hakobu, le lasansirubei Aburemei iri aba líchugun Ísüraeli luagu;32aba ladügün aban latarü lun Aburemei lau duusu dübü ligia; lárigiñe aba lachigin aban kineli geyegua lau latarü le ñein lumuti gabara lan kei burí wein líturu lila nadü,33lárigiñe línchaguni watu, aba lamurusuhani bágasu, aba líchuguni ligibuagu watu.34Aba lariñagun:
—Buíngüda humá gádürü diná duna, ábame héseruni luagun adagaragüdüni gudawarügüti luma luagun watu.
Ábaya lariñagun houn lunya hadügüni biama luma ǘrüwa wéiyaasu, aba hadügüni ítara.35Ábati léibaagun duna geyegua lau latarü, aba giñe labuinchun kineli.36Dan lachülürün oura lun ladagaragüdün Elíasi adagaragüdüni gudawarügüti, aba liabin, aba lagúaragun:
—Bungiu, Lubungiute Abüraámü, Isaakü luma Hakobu: Subudigüdabei uguñe luagu buguya lan Lubungiutebei Ísüraeli, au bubuein, ani nadügünbalin sun le, ladüga lan bariñagun nun lun nadügüni!37Óunababana Bungiu, óunababana, subudi hamaamugei gürigia ha luagu Aburemei lan buguya, ani agunbirahabaniña lun hagiribudun bun!38Lidan oura ligía aba lábürühan watu gemeti le lóunahabei Bungiu, aba láguduni adagaragüdüni gudawarügüti, watu luma dübü lau sun kaliki, mábeigüdalei duna le lídanbei kineli.39Dan harihinbalin gürigia katei le, aba habuluchagun súngubei dagá herebe múarugu, aba hariñagun:
—Aburemei Búngiubei, Aburemei Búngiubei!40Ábati lariñagun Elíasi houn:
—Ragügua humaña lani Baali profetagu! Mesefuralá ni aban hádangiñe!
Aba hárügüdüniña, aba lanügüniña Elíasi luagun liraüraü duna le Kisón aba ladürühani hachügü ñein.
Lafurieidun Elíasi lun láhuyun huya
41Lárigiñe aba lariñagun Elíasi lun Aabü:—Beiba eiga gurá buguyame, lugundun aganbúaali lamuri huya.42Aba lidin Aabü eiga gurá ligía. Gama lumoun aba lawarirun Elíasi lábulugun wübü Karümélu, aba láhuduragun múarugu, aba labuluchagun darí lerederun ligibu labadinagua bián ligachürügü,43aba lariñagun lun lumusun:
—Beiba barihame luagun barana.
Aba lidin aba larihin, aba lariñagun:
—Úati ni kata.
Lariñaga Elíasi lun:
—Beiba ariha sedü wéiyaasu.44Le lisedün lidin musu ariha aba lariñagun:
—Arihatina aban liraüraü huánriñu amudeireina baranahagiñe, ñǘraüraüti kei aban úhabu.
Lariñaga Elíasi lun:
—Beiba ariñaga lun Aabü lun lidin lubaragiñe léserun huya, siñayaliñeinme lidin.45Aba ládinun Aabü tidoun likarün, aba lidin Hesüreelin. Aba laburigadun sielu lau huánriñu luma garabali, aba lábürühan aban huya gárati.46Aba líchugun Aburemei erei lun Elíasi; lárigiñe laranserunu ladaüragun luougua, aba léibaagun chülǘ Hesüreeli, aba lachülürün lubaragiñe Aabü.
Bible Society of Honduras