Galatia5
1Nɔ kə bɛ mbɔ tʉkə-ʉʼʉ lʉ́ʉ bʉʼʉ ndə Klai kə fyúhə tʉkə-ʉʼʉ, nɔ b̈ii tə́nə shʉ́əshʉ́ə, təmə leʼ bʉ̀nə gɛ̀ mɔ̀ʼ lʉʉ-fʉəhə-kə mii-bii fɛ.2B̈ii yʉ́, mbəŋ-ɔŋ Bɔɔ nɔ tʉʼ shyíi bii mbɔ, kaʼ a bɛ́ŋ mbɔ b̈ə fɔ̀ʼ a, i nɔ dʉ̀ʼ mbɔ Klai leʼ kie nubɛʼkə ndə məkwáa a chɔ fɛ.3Mɔ nɔ tʉʼ kʉ́ʉ bìʼ gìe tʉ wotəmiyɔŋ ndə ɔ bɛ́ŋ mbɔ b̈ə fɔʼɔ-ɔ, mbɔ ɔ nɔ kie ndə mətʉ́ʼ nuʼ inchəŋ.4Bii nɔʼ fɔ̀ʼ ŋwɔŋ-yii mbʉə-Klai, mbəŋ-yii ndə bii tʉʼ kʉ́ʉ tə́nə ndyʉndyʉ bəshʉ-Nyii bɛ nə mətʉ́ʼ nuʼ, bii nɔʼ fyúhə ŋwɔŋ-yii hə ndəŋ buuŋjyu-Nyii.5Bɔŋ mbəŋ-yaʼ nɔ yʉ́əʼnə ndəŋ Nyii mbɔ ɔ bu chìi baʼa bɛ ndyʉndyʉ tʉ ɔŋ. Nɔ bɛ nukə nɔ ndə baʼa tʉʼ chyìi shʉ́əshʉ́ə nə ghʉəʼ-kəLyʉʉhəNyii-kə ndə ɔ tʉʼ fɔ̀ʼ bɛ mu mbʉə-baʼa tíŋ hə bɔ̌ŋ məmɔʼfyiihə-aʼ ndəŋ Klai.6Bʉʼka mbɔ ndʉʉ ndə baʼabə Klai Jiso bɛ nukə imɔʼ, bə kyinə túhə shʉ ndə wo ndə bə nɔʼ fɔ̀ʼ ɔ ndəŋ wo ndə bə gòʼ təmə nɔʼ nə fɔ̀ʼ ɔ fɛ, fɔŋ-kənu nɔ bɛ ndə məmɔ̀ʼfyii ndəŋ Jiso Klai, ndə ĩ dʉ̀ʼ ŋwɔŋ-ɛŋ ndəŋ ŋkʉ̂ʉ tʉ bəbɛʼbʉə.7Bii nɔ fəŋ kə́ tòʼ jyujyu, bʉ̀nə byùutə nda byùutə bii ndə mətə́nə ndəŋ shʉəŋ?8Ntɛ ndoʼtə-ɔ̄ŋ mə gwè hə kəghɔ-Nyii ndə ɔ kə tíi bii fɛ.9Ñɔ bʉ́əhə haʼ mbyu kəkʉʼ bʉəbʉə imɔʼ bʉ́əhə kyʉʉ-kəkʉʼ. 10Fyii-ɔ nɔ tə́nə ndəŋ Tiekətʉ mbɔ bii kʉʉ lʉ̀ ŋgie-kədɔŋ-kə tə tíŋ hə ndəŋ yi-yə ndə mɔ nɔʼ kə gìe tʉ bii fɛ, wotəmiyɔŋ ndə ɔ tʉʼ chɔ́ŋhə bii bu nyíɛ ŋgʉəʼ kəghɔ-Nyii kaʼ kʉ̀ʉ bɛ nda.11Bɔŋ ndə mbəŋ-ɔŋ, bəliŋ-bɔŋ, mɔ kʉ̌ʉ kə́ bíe lɔ̀ʼ mbɔ b̈ə kə́ fɔ̀ʼ bʉə, təmə bə kə́ bíe chɔ́ŋhə mɔ mbuka? Kaʼ kʉ̌ʉ bɛ nɔ təmə ŋkyʉʉhəkə ndə tyʉntɔɔnəkə tʉ́ʼ bəshʉ bʉə nɔʼ kə chóʼnə.12Mɔ nɔ tʉʼ kʉ́ʉ mbɔ bʉə-bɔ̄ŋ ndə bɔ̂ŋ tʉʼ chɔ́ŋhə bii nɔ bu sáa buuhə-ʉə nə mbəŋ-yʉə fyúhə!13Bʉʼka mbɔ bə nɔ nə tíi bii mbɔ tʉkə-ii lʉ́ʉ bii, bəliŋ-bɔŋ. Nɔ haʼ nduɔ mbɔ ndə tʉkə-ii nɔʼ lʉ́ʉ bii nɔ, kə bii məlʉ̀ yɔ̄ŋ-yə ndə mə-kə́-chìi nu-bʉəbʉə-bə ndə i bʉ̀ʉ tʉ bii fɛ. Bɔŋ b̈ii lʉ̀ ŋkʉ̂ʉ kwáa ŋwɔŋtə-ii nə yɔŋ.14Bʉʼka nchəŋnchəŋ bənu ndə nuʼ kə gìe nɔ bɛ mbyu kənu imɔʼ mbɔ, “Kʉ̀ʉ wo-kətoʼ-a ndə a kʉ̀ʉ ŋwɔŋ-aŋ.”15Bɔŋ kaʼ bii kə́ lə́ŋtə bɔŋleʼ kwó ŋwɔŋtə-ii nə nyaahə, b̈ii láa mbɔ bii məyítə ŋwɔŋtə-ii fɛ.16Bɔŋ mɔ nɔ tʉʼ ghɔ̀ŋ mbɔ b̈ii kə́ chí mbi nə ghʉəʼ-kəLyʉʉhəNyii-kə, kaʼ bii chìi nɔ, bii leʼ kə́ fɔ̀ʼ bə nubə ndə mbʉə-yii tʉʼ kʉ́ʉ fɛ.17Bʉʼka nubə ndə mbʉə-a kʉ̀ʉ kaa nubə ndə LyʉʉhəNyiikə kʉ̀ʉ fɛ, bɔŋ nubə ndə LyʉʉhəNyiikə kʉ̀ʉ kaa nubə ndə mbʉə-a kʉ̀ʉ fɛ, bʉʼka bɔ̂ŋ nɔ bàa nə shʉtə-ʉə, mbɔ i chʉʼ chìi a mɛ̀ʼtə ndə məchìi nubə ndə fyii-a tʉʼ kʉ́ʉ mbɔ a kə́ chìi.18Kaʼ a, bɔŋ kə́ tòʼ haʼ ndə LyʉʉhəNyiikə tʉʼ dʉ̀ʼ fia tʉ a, a leʼ kie ndə mə-yá nuʼ tʉ́ʼ fɛ.19Ñubə ndə mbʉə-woməsʉʉ tʉʼ kʉ́ʉ, nɔ dʉ̀ʼ ŋwɔŋ-ɛŋ ntaa ndəŋ fia tʉ ɔŋ, bəsəŋ ntɛntɛhə, nu-nyàatəŋwɔŋ-bə leʼnə ŋkwɔʼtə-bəsəŋ,20məgháa bənyii, məfʉ́ʉ fê, bàa, bəfyuʼ, túunə bəfyuʼ, tʉʉbʉə, məshʉ́nə mbi, ŋkʉʉŋkʉʉ, məfúu nuɔ bʉəbʉə21məbàabʉʉ, ndʉʼbúumə, mətʉ́ʼ kie-bəsəŋ-tə leʼnə ntɛ-bənu-hə ndə yɔ̄ŋ-yə. Mɔ nɔ tʉʼ shyùu tyunəkə-ii haʼ ndə mɔ nɔʼ kə fəŋ shyùu hə bəshʉ mbɔ bʉə ndə bɔ̂ŋ kie ntɛ məchimbi-ɔ̄, Nyii mə kə́ sɔ́ʼ bɔŋ fɛ.22Bɔŋ L̃yʉʉhəNyiikə nɔ kʉ́ʉnə ŋkʉ̂ʉ, tʉʉjyu, fyiighʉ́ənə, məyá fyii, nuʼ jyujyu, məfɔ̀ʼ bʉʉ, məgìe shʉəŋ,23mbuɔnəbə leʼnə məyá ŋwɔŋ, ndəŋ nubə-ɔ̄ŋ nuʼ-Nyii kaa ghɔ ndə i tɛ́ŋ fɛ.24Bɔŋ bʉə ndə bɔ̂ŋ bɛ tʉ Klai Jiso nɔʼ kwɛ̀ŋ bɔŋleʼ yí nubə ndə mbʉə-yʉə tʉʼ kʉ́ʉ ghɔŋbə ntɔmə-i leʼnə jyʉʉ-i ndə i bɛ fyii-bɔŋ.25Kaʼ bʉʼʉ kə́ chí mbi bʉʼka LyʉʉhəNyiikə, b̈ʉʼʉ kə́ tòʼ haʼ ndə LyʉʉhəNyiikə tʉʼ dʉ̀ʼ fia tʉ bʉʼʉ.26Kə bʉʼʉ mə kə́ chìi tʉʉ gʉənə fɛ, təmə kə́ chìi tʉʉ bəbɛʼbʉə kə́ byʉ́ʼ fɛ, təmə kə́ bàabʉʉ bəbɛʼbʉə fɛ.
Wycliffe Bible Translators, Inc.