Galatia4
1Nukə ndə mɔ tʉʼ gìe nɔ bɛ mbɔ kaʼ nju bɛ vaambuɔ, ɔ bɛ ŋkʉʉ ndəŋ fʉə fɛ, bɔŋ ndə nɔ, nɔ kie haʼ ɔ kie fɔbə inchəŋ2ɔ bɔŋ kie bʉə ndə bɔ̂ŋ tʉʼ lɛ́nə ɔŋ bɔŋleʼ lɛ́nə fɔbə-i tə chîkə yi kʉ̀ʼnə ndə tie-e nɔʼ kə kɔ̀ʼnə.3Nɔ bɛ haʼ nɔ, vɛʼ ndə mbəŋ-yʉʼʉ kə bíe vâambuɔ bʉʼʉ nɔ kə bɛ fʉəhə ndə ntɛhə ndə bə kə́ fəŋ chìi nubə kəwʉʉnəmbi-fɛ̄ŋ.4Bɔŋ ndʉʉ ndə mbʉ ŋgwɔʼmbi kə kʉ̀ʼnə, Nyii tə́ŋ vaa-ɛ, woke bí ɔ, vɛʼ ndə bə nə kə́ bíe tʉ́ʼ nuʼ-Mushi,5mbɔ ɔ chʉʼ chʉ̀ʼ tʉ-bʉə-kə hə ndəŋ nuʼ ndə i tʉʼ yá bɔŋ, mbɔ Nyii chʉʼ lʉ̀ bʉʼʉ ndə vâanchinə-bi.6Bʉʼka bʉʼʉ bɛ vâa-bi, mbʉ Nyii nɔʼ tə́ŋ Lyʉʉhə-vaa-ɛ-kə kɔ́ mu mbʉə-bʉʼʉ, ɔ tʉʼ tíi mbɔ, “Baba, Baba-Tie-yaʼ.”7Nɔ, a leʼbie fʉə fɛ, bɔŋ a nɔ vaa-ɛ, kaʼ bɛ mbɔ a bɛ vaa-ɛ, təmə a nɔ bɛ nju-i tíŋ bɔ̂ŋ Nyii.8Vɛʼ bəshʉ ndə bii kə gòʼ təmə kínə Nyii fɛ, fɔbə ndə bɔ̂ŋ gòʼ təmə bɛ bənyii fɛ, nɔ nə lʉ́əŋ bii.9Bɔŋ nduɔ, ndə bii nɔʼ kínə Nyii nɔ, byuunɔ mbɔ mbəŋ-ɛŋ Nyii nɔʼ kínə bii, bəkɔ bii bʉ̀nə kíahə ŋwɔŋ-yii tʉ fɔbə ndə bɔ̂ŋ lʉ́ʉtə bɔŋleʼ bɛ njʉnjʉ kəwʉʉnəmbi-fɛ̄ŋ, kə́ kʉ́ʉ mbɔ bii bʉ̀nə bìʼ bɛ fʉəhə-ʉə təka?10Bii nɔ tʉʼ búu chîmbibə ghɔŋbə bəchi, kə́ búu ləŋkə ghɔŋbə byʉʉkə, kə́ leʼ búu ŋgʉʼʉmbihə!11Mɔ nɔ tʉʼ fàa mbɔ ndʉʉbɛʼ mɔ nɔʼ nyíɛ ŋgʉəʼ kətʉ-bii njʉnjʉ.12Bəliŋ-bɔŋ, mɔ nɔ tʉʼ fʉ̀ʉtə bii, b̈ii bɛ nə mɔ, bʉʼka mɔ nɔʼ bɛ nə bii. Bii chʉʼ chìi bʉ̂ʼʉ tʉ mɔ fɛ.13Bii nɔ kínə mbɔ nɔ bɛ bʉʼka mbʉə-ɔ kə bʉ̀ʉ fɛ, ndə i chìi mɔ buŋ lɔ̀ʼ ntəŋjyujyu tʉ bii fəŋ.14Buŋ ndə nɔ, ntɛhə ndə mɔ kə bɛ muŋgɔ, nɔ kə kə́ kʉ̌ʉ chìi bii kie tʉ-kwú-kə ndəŋ mɔ, bìe mɔ mɛ̀ʼ, bii bɔŋleʼ lʉ̀ mɔ nə wontəŋNyii byuunɔ nə Klai Jiso.15Ntɛ tʉʉjyu-i ba ndə bii kə fəŋ kie le? Mɔ nɔ nə kínə mbɔ kaʼ i kʉ̌ʉ kə yùhə təmə bii nɔ nə chóʼ shʉtə-ii kɔ́ tʉ mɔ.16Mɔ bʉ̀nə bə̀ŋ wobàa-yii nduɔ bʉʼka shʉəŋ ndə mɔ gìe tʉ bii mɛ?17Bʉə-Juu-bɔ̄ŋ ndə bɔ̂ŋ tə́nə ndəŋ nuʼ nɔ, nɔ tʉʼ kʉ́ʉ bə ndə məlʉ̀ bii kɔ́ mbʉə bɔŋ, bɔŋ təmə mu fyiihə-ʉə kə bɛ jyujyu fɛ. Nukə ndə bɔ̂ŋ tʉʼ kʉ́ʉ nɔ bɛ haʼ ndə məbyùutə bii mbʉə mɔ, mbɔ bii chʉʼ kɔ́ ŋwɔŋ-yii tʉ bɔŋ.18I nɔ bʉ̀ʉ ndə məkie ntɛ fyii-jyujyu-maa-ɔ̄ŋ təvɛʼtəvɛʼ kaʼ luu-i bɛ jyujyu, kaa bə haʼ mbɔ i bɛ ndʉʉ ndə bʉʼʉ bɛ mɔʼɔ fɛ.19Vâa-bɔ̄ŋ, i nɔ bɛ fi nə mɔ bʉ̀nə bìʼ bɛ ndəŋ yɔʼ-Nyii-kə nə bii, ndə i bu gɛ̀ nə shʉbə tʉ nuʼ-Klai yú mu mbʉəhə-ii.20Mɔ nɔ tʉʼ gwìa mbɔ bʉʼʉ kʉ̌ʉ bɛ nduɔ mɔʼɔ, təmə mɔ nɔ kwɛ́nə gyʉʉ-ɔ, bʉʼka mbɔ fyii-ɔ tʉʼ chɔ́ŋhə mɔ te bii.21B̈ii shyíi mɔ, mbəŋ-yii ndə bii kʉ̀ʉ ndə mətə́nə ndəŋ nuʼ-Mushi, bii nɔʼ kə yʉ́ nukə ndə nuʼ kə ghɔ̀ŋ fe?22Bə nɔ nyɔ̀ʼ mu ŋwɔʼnə-Nyii mbɔ Ablahaŋ nɔ nə kie vâabələŋ bəbûu, bí fʉə-e bí imɔʼ ibɛʼ-yə bí ŋkɛŋ vi-i.23Bɔŋ vaa ndə bí woke ndə ɔ kə bɛ fʉə le, bə bí ɔ ndə ŋkʉʉnə tʉʉ woməsʉʉ, bɔŋ vaa ndə bí ŋkɛŋ vi-i, bə bí ɔ bʉʼka Nyii nɔʼ kə kɔ̀ʼnə.24Nduɔ, bəkɔ bə lʉ̀ nukə-ɔ̄ŋ ndə fʉʼkənu mbɔ bəke-bɔ̄ŋ bəbûu nɔ bɛ cheʼ-məŋkaa-bə ibûu. Fəŋ woke, Haga, nɔ bɛ nə Kwɔŋ Sina, ndə ɔ kə́ bí vâa ndə bɔ̂ŋ bu bɛ fʉəhə.25Nduɔ, Haga nɔ bɛ nə Kwɔŋ Sina mu Alabia, kə́ bɛ nə Jɛlosalɛŋ laa, ɔ nɔ tʉʼ fɔ̀ʼ fʉəhə ghɔŋbə vâa-bi.26Bɔŋ Jɛlosalɛŋ ndə i bɛ yuo kaa fʉə fɛ, ɔ bɔŋ-kə́-leʼ bɛ naa-yʉʼʉ.27Bʉʼka bə nɔ nyɔ̀ʼ mu ŋwɔʼnə-Nyii mbɔ,“T̈ʉʉ-a kə́ bʉ̀ʉ, woke ndə a gòʼ təmə kə́ bí fɛ.Gwía bɔŋleʼ tíi nə ghʉəʼkə nə tʉʉjyu mbəŋ-aŋ ndə yɔʼ-Nyii-kə gòʼ təmə nɔʼ nə byùu a fɛ.Bʉʼka vâa-woke ndə bə nɔʼ ké ɔ bu nə yɔ́ŋ tə chàa vâa-woke ndə ɔ fʉ̀ʼ woləŋ.” 28Nduɔ, bəliŋ-bɔŋ, bii nɔ bɛ nə Aisi, vâa ndə bə nɔʼ kə kɔ̀ʼnə.29Bɔŋ nɔ nə bɛ vɛʼ bəshʉ, vaa ndə bə kə bí ɔ ndə ŋkʉʉnə tʉʉ woməsʉʉ, chɔ́ŋhə vaa ndə bə kə bí ɔ nə LyʉʉhəNyiikə, nɔ bɛ haʼ ndə i bɛ laa.30Bɔŋ ŋwɔʼnə-Nyii ghɔŋ mbuka? “Jə̀ŋ woke ndə ɔ bɛ fʉə ghɔŋbə vaa-ɛ bʉʼka mbɔ vaa-woke ndə ɔ bɛ fʉə mə yú fɔ-tie-yʉə-bə ghɔŋ vaa-woke ndə ɔ gòʼ təmə bɛ fʉə fɛ.”31Nɔ, bəliŋ-bɔŋ, bʉʼʉ kaa vâa-woke ndə ɔ bɛ fʉə fɛ, bʉʼʉ nɔ bɛ vâa-woke ndə ɔ gòʼ təmə bɛ fʉə fɛ.
Wycliffe Bible Translators, Inc.