Galatia6
1Bəliŋ-bɔŋ, kaʼ wo mu bii chìi bʉ̂ʼʉ təmiyɔŋ, m̈bəŋ-aŋ ndə a tə́nə shʉ́əshʉ́ə mu LyʉʉhəNyiikə bʉ̀nə chɔ̀ʼhə ɔŋ sê nə mbuɔnəbə, bɔŋ kə́ láa bʉʼka a məgwù ghɔ.2B̈ii kwáa bəliŋ-bii ndə məbɛ̀ʼ bɛʼkə-ʉə, bʉʼka kaʼ bii chìi nɔ bii tʉ́ʼ nuʼ-Klai.3Bʉʼka mbɔ kaʼ wo kə́ kwɔ̀ʼtə mbɔ ɔ bɛ fɔkə təmə bɔŋ bɛ yɔŋ fɛ, təmə ɔ nɔ tʉʼ fə́ʼhə ŋwɔŋ-ɛŋ.4Ẅo kə́ lɛ́nə yi-yə fɔ̀ʼ, kaʼ ɔ fɔ̀ʼ jyujyu ɔ kwɛ̀ŋ fyii-i bə ndə nukə ndə ɔ tʉʼ fɔ̀ʼ, təmə kə́ lɛ́nə bə yi-ibɛʼ-wo-yə fɛ.5Bʉʼka wotəmiyɔŋ nɔ kie ndə məbɛ̀ʼ yi-yə bɛʼkə.6Wotəmiyɔŋ ndə bə tʉʼ dàhə ɔŋ nə ŋgieNyiikə, nɔ kie ndə məgyʉ̀ə fɔ-jyujyu-bə inchəŋ ndə ɔ kie ghɔŋ wo ndə ɔ tʉʼ dàhə ɔŋ.7Kə bii mə fə́ʼhə ŋwɔŋ-yii fɛ, wo mədʉ̀ʉhə Nyii fɛ, bʉʼka ntɛ ŋgwie ndə wo shùɔ sê, nɔ bɛ haʼ yɔŋ ndə ɔ bu kwɛ̀.8Wo ndə ɔ tʉʼ shùɔ kə́ kʉ́ʉ mbɔ i kʉ̀ʼnə bə ndə nukə ndə mbʉə-e kʉ̀ʉ, fɔkə ndə ɔ bu kie ndəŋ ŋkʉʉnə tʉʉ-i bu bɛ kwu, bɔŋ wo ndə ɔ tʉʼ shùɔ ndə ntɛ ndə LyʉʉhəNyiikə kʉ̀ʉ bu kie məchímbi təmə liʼ-i ghɔ fɛ, kəghɔ-LyʉʉhəNyiikə.9Kə bʉʼʉ mə káa ndə mə-kə́-fɔ̀ʼ bʉʉ fɛ, bʉʼka mbɔ ndʉʉ bu yi kʉ̀ʼnə nɔ, bʉʼʉ kwɛ̀ ntɔŋmə-i, kaʼ bʉʼʉ gòʼ təmə káa fɛ.10Nɔ, kaʼ bʉʼʉ kie fia, b̈ʉʼʉ fɔ̀ʼ bʉʉ tʉ bʉə bənchəŋ, fɔŋ ɛŋ kə́ bɛ tʉ bʉə ndə bɔ̂ŋ mɔ̀ʼfyiihə-ʉə ndəŋ Nyii.11B̈ii nyíɛ ntɛ shʉ ŋwɔʼnəkwɛʼtəŋ ndə mɔ tʉʼ nyɔ̀ʼ nə yɔŋ tʉ bii nə yɔŋ-yə ghɔkə.12Bʉə ndə bɔ̂ŋ tʉʼ kwɛ̀ŋhə mbɔ b̈ii fɔ̀ʼ ŋwɔŋ-yii, nɔ bʉə ndə bɔ̂ŋ tʉʼ kʉ́ʉ ndə mə-kə́-dʉ̀ʼ ŋwɔŋ-yʉə nə ntɛ nuʼ-yʉə, bɔ̂ŋ nɔ tʉʼ chìi bʉʼka bə mə-yi-chɔ́ŋhə bɔŋ bʉʼka tyʉntɔɔnəkə ndə Klai kə kwú chɔ.13Buŋ bʉə-ghɔ̄bə ndə bə nɔʼ fɔ̀ʼ bɔŋ tʉʼ tʉ́ʼ nuʼ fɛ, bɔŋ bɔ̂ŋ kə́ kʉ́ʉ mbɔ b̈ə fɔ̀ʼ bii bɔ̂ŋ chʉʼ kə́ dʉ̀ʼ ŋwɔŋ-yʉə te nə bii ndə bə nɔʼ kə fɔ̀ʼ bii.14Tə Nyii byʉ̀hə nu-maa-kə-ɔ̄ŋ bɔ̌ŋ mɔ, mbɔ kə mɔ mə nə dʉ̀ʼ ŋwɔŋ-ɔŋ ndə nubɛʼkə fɛ, yaʼkɛŋ kwú Jiso Klai Tiekətʉ, ndəŋ tyʉntɔɔnəkə, ndə bə nɔʼ kwɛ̀ŋ nuʼ kəwʉʉnəmbi-ɔ̄ ndəŋ ghɔ yí tʉ mɔ, mbəŋ-ɔŋ bɔŋleʼ kwú ndəŋ ghɔ tʉ wʉʉnəmbikə.15Bʉʼka məfɔ̀ʼ wo byuunɔ məgòʼ təmə fɔ̀ʼ wo fɛ, bɛ nubɛʼkə fɛ, fɔŋ-kənu nɔ bɛ mbɔ a bɛ wo fefe mu Jiso Klai.16Bʉə bənchəŋ ndə bɔ̂ŋ tə́nə ndəŋ ŋgiekə-ɔ̄ŋ, Nyii kie fyiighʉ́ənə bɔŋleʼ dʉ̀ʼ buuŋjyu tʉ bɔŋ, bɔŋleʼ kie ghɔ ndəŋ bʉə-Isilɛ ndə bɛ yi-Nyii-yə.17Nɔ, lʉ̀ hə nduɔ gɛ̀ nə shʉbə, kə wobɛʼ mə kə́ leʼ chɔ́ŋhə mɔ fɛ, bʉʼka cheʼ-ŋgwɔŋ-bə nɔ nʉ̀ʉtə mbʉə mɔ, yie-Jiso.18Bəliŋ-bɔŋ, tʉ Jiso Klai Tiekətʉ-yʉʼʉ, dʉ̀ʼ buuŋjyu-i tʉ bii bənchəŋ mu fyii-bii. Ï bɛ haʼ nɔ.
Wycliffe Bible Translators, Inc.