2 Kɔlɛŋ2
1Bʉʼka mɔ nɔʼ shʉ̀tə mu fyii-mɔ mbɔ mɔ kʉʉ gwè bìʼ mɔ̀ʼ dyʉʼkə fyii-bii fɛ.2Bʉʼka kaʼ mɔ mɔ̀ʼ dyʉʼkə fyii-bii, bɛ nda ndə ɔ bu leʼ kɔ́ tʉʉjyu tʉ mɔ, yaʼkɛŋ bii ndə mɔ nɔʼ mɔ̀ʼ dyʉʼkə fyii-bii?3Nɔ bɛ luu-i ndə mɔ kə nyɔ̀ʼ ndə ntɛ ndə mɔ nyɔ̀ʼ, mbɔ mɔ chʉʼ yi gwè nɔ təmə kie dyʉʼkə fyii-mɔ hə kəghɔ-bʉə ndə mɔ kie ndə məkie tʉʉjyu yɔ́ŋyɔ́ŋ hə kəghɔ-bɔŋ fɛ. Mɔ nɔ kínə leʼ shʉəŋ te bii bənchəŋ mbɔ ndʉʉ ndə mɔ kie tʉʉjyu nɔ, ndʉʉmɛ bii bənchəŋ bu kie tʉʉjyu.4Mɔ nɔ tʉʼ nyɔ̀ʼ tʉ bii nə mbʉə liŋnə yɔ́ŋyɔ́ŋ ghɔŋbə mu fyii chʉ́ʼnə ghɔŋbə shʉ-yɔ́ŋyɔ́ŋ-mə, təmə bɛ ndə məmɔ̀ʼ dyʉʼkə fyii-bii fɛ, bɔŋ bə mbɔ bii kínə ntɛ ŋkʉ̂ʉ yɔ́ŋyɔ́ŋ ndə mɔ kie tʉ bii.5Kaʼ mɔ ghɔ̀ŋ mbɔ wo ndə ɔ mɔ̀ʼ dyʉʼkə, ɔ mɔ̀ʼ bə haʼ fyii-mɔ tətɛʼ mɔ fɛ bɔŋ kaʼ yì ka ɔ nɔ mɔ̀ʼfyii-bii bənchəŋ ghɔ, təmə mɔ tʉʼ bìʼbìʼ fɛ.6Njɔŋnjɔŋ yii nɔ kə nyʉ́ʉ bɔ̌ŋ ɛŋ, maa-yɔ̄ŋ nɔ kʉ̀ʼnə ndə ntyʉʉ ŋgʉəʼ ndə bəkɔ ɔ nyíɛ.7Nɔ, i nɔ bʉ̀ʉ nduɔ mbɔ b̈ii bənchəŋ kíahə ŋwɔŋ-yii tʉ ɔŋ, sʉ̀fyiihə-ii hə ndəŋ bʉ̂ʼʉ-e, yá fyii-i, kaʼ byuunɔ təmə i bu dìenə mbʉə-ɔ tə chàa ghʉəʼkə-i.8Bɔŋ nɔ, mɔ nɔ tʉʼ fʉ̀ʉtə bii mbɔ b̈ii chìi ɔ kínə mbɔ bii nɔ kʉ̀ʉ ɔ.9Nɔ kə bɛ luu-i nɔ ndə mɔ kə nyɔ̀ʼ, ndə məyúotə b̈ii nyíɛ mbɔ bəkɔ bii yʉ́ tʉ̂ʼ-ɔ inchəŋ mɛɛ.10Wotəmiyɔŋ ndə bii sʉ̀fyii hə ndəŋ bʉ̂ʼʉ-e, mɔ nɔ sʉ̀fyii-ɔ hə ndəŋ bʉ̂ʼʉ-e ghɔ. Bʉʼka ndʉʉ ndə mɔ sʉ̀fyii hə ndəŋ bʉ̂ʼʉ-wo, kaʼ nukə bɛ ghɔ ndə mɔ kie ndə məsʉ̀fyii-ɔ chɔ, təmə mɔ nɔ sʉ̀ yie-bii bəshʉ Klai,11mbɔ Sata mə yi lóʼtə bʉʼʉ fɛ, bʉʼka bʉʼʉ bɛ tʉŋkwɔŋ ndə fiatə-i fɛ.12Ndʉʉ ndə mɔ kə gwè Tɔlɔs ndə məlɔ̀ʼ ntəŋjyujyu-Klai, Tiekətʉ nɔ kə ŋɔ́ʼhə fia tʉ mɔ.13Bɔŋ fyii-ɔ nɔ kə́ chɔ́ŋhə mɔ bʉʼka mɔ kə nyíɛ liŋ-ɔŋ Tatu chɔ fɛ. Nɔ, mɔ tíŋhə bɔŋ lɔ̀ gɛ̀ Masɛdonia.14Bɔŋ ndɔ nɔ bɛ tʉ Nyii, bʉʼka ɔ nɔ bɛ ntəŋbəshʉ-yʉʼʉ ndə bʉʼʉ fúu ŋwɔŋ bʉʼʉbə Klai ndə məgɛ̀ sɛ́ʼ ŋgʉʼʉ. Nyii nɔ tʉʼ wɔ̀ʼhə bəsɔʼka te Klai bəyəŋbəyəŋ tíŋ hə bɔ̌ŋ bʉʼʉ, i kə́ bɛ nə ŋgwo-lamənda-mə ndə yɔ̂ʼkə-i bʉ̀ʉ daa.15Bʉʼka bʉʼʉ nɔ bɛ nə yɔʼ-lamənda-Klai-kə tʉ Nyii mu bʉə ndə bɔ̂ŋ tʉʼ kie ŋkwaaNyii ghɔŋbə bʉə ndə bɔŋ tʉʼ kwú bɛ́.16Tʉ bʉə ndə bɔ̂ŋ tʉʼ kwú bɛ́, bʉʼʉ nɔ tʉʼ lùŋ nə yɔ̂ʼkə ndə ĩ gwè nə kwu, bɔŋ tʉ bʉə ndə bɔ̂ŋ tʉʼ kie ŋkwaaNyii, bʉʼʉ nɔ tʉʼ lùŋ nə yɔ̂ʼkə ndə ĩ gwè nə məchímbi. Kʉ̀ʼnə nda ndə nubə-ɔ̄ŋ?17Bʉʼka bʉʼʉ bɛ nə bʉə buŋmbi ndə bɔ̂ŋ nɔʼ lʉ̀ ŋgieNyiikə ndə məchìi sii-yʉə nə yɔŋ fɛ, bɔŋ bʉʼka Nyii nɔʼ tə́ŋ bʉʼʉ, bʉʼʉ nɔ tʉʼ kwə́ʼ nə ŋgie-shʉəŋ-kə bəshʉ ɔ, nə vâafɔʼɔ-Klai.
Wycliffe Bible Translators, Inc.