2 Kɔlɛŋ3
1Baʼa nɔ̂ʼ chʉ́ʉhə ndə məbʉ̀nə bìʼ dʉ̀ʼ ŋwɔŋ-yaʼ tʉ bii ndə məbɛ bʉə jyujyu mɛ? Bəbɛʼbʉə nɔ kie ndə məkie ŋwɔʼnə ndə mədʉ̀ʼ mbɔ bɔ̂ŋ nɔ bɛ bʉə jyujyu ndə bəbɛʼbʉə nyɔ̀ʼ kɔ́ tʉ bii byuunɔ ndə bii nyɔ̀ʼ kɔ́ tʉ bɔŋ, təmə i bɔŋ bɛ nɔ tʉ baʼa fɛ.2Bii nə mbəŋ-yii nɔ bɛ ŋwɔʼnə-yaʼ ndə mədʉ̀ʼ mbɔ baʼa nɔ bɛ bʉə jyujyu, ndə bə nyɔ̀ʼ mu fyii-baʼa, ndə bəkɔ bʉə bənchəŋ kínə bɔŋleʼ tíi.3Bii bɔŋ nɔʼ dʉ̀ʼ mbɔ bii nɔ bɛ ŋwɔʼnə ndə i lɔ̀ hə kəghɔ-Klai ghɔ-fɔ̀ʼ-kə-aʼ təmə bə nyɔ̀ʼ nə vaakətyʉ-ŋwɔʼnə fɛ, bɔŋ nə LyʉʉhəNyiikə. Bə nyɔ̀ʼ ndəŋ via-ŋgoʼhə-bə fɛ, bə nyɔ̀ʼ ndəŋ fyii-bʉəməsʉʉ-hə.4Baʼa nɔ tʉʼ gìe yɔ̄ŋ-yə nə fyii shʉ́əshʉ́ə bʉʼka fyii ndə baʼa kie ndəŋ Nyii tíŋ hə bɔ̌ŋ Klai.5Kaa bə bʉʼka baʼa kwɔ̀ʼtə mbɔ baʼa kʉ̀ʼnə ndə məchìi nukə təmiyɔŋ nə yaʼ-yə ghʉəʼkə fɛ, baʼa bɔŋ kʉ̀ʼnə bʉʼka ghʉəʼkə-aʼ tʉʼ gwè hə kəghɔ-Nyii,6Nɔ bɛ mbəŋ-ɛŋ ndə ɔ chìi bʉʼʉ, bʉʼʉ kʉ̀ʼnə ndə məfɔ̀ʼ nə ŋkaa-fefe-mə ndə bə nyɔ̀ʼnyɔ̀ʼ fɛ, bɔŋ kə́ bɛ yi-yə LyʉʉhəNyiikə. Bʉʼka ñuʼ ndə bə nyɔ̀ʼnyɔ̀ʼ, nɔ gwè nə kwu, bɔŋ LyʉʉhəNyiikə kə́ gwè nə məchímbi.7Nduɔ, kaʼ fɔ̀ʼ nduɔŋ nuʼ-Mushi ndə ĩ gwè nə kwu ndə bə kə nyɔ̀ʼ ndəŋ ŋgoʼ gwè nə ntɛ məgʉə-maa-ɔ̄ŋ mbɔ bʉə-Isilɛ kə mətʉ́ʼ shʉ-yʉə ndəŋ mbe shʉ-Mushi fɛ, bʉʼka məgʉə-Nyii ndə i kə báa ndəŋ mbe-shʉ-i kə́ bɛ məgʉ́ə ndə shʉ-i nɔʼ kwùhə,8məgʉ́ə ndə i gwè hə ndəŋ fɔʼɔ-kəLyʉʉhəNyii bu bɛ ntyʉʉ təka?9Kaʼ fɔʼɔ ndə i chʉ̀ə njɔ bətɔ wo kə gwè nə məgʉ́ə, fɔʼɔ ndə i chìi wo bɛ ndyʉndyʉ tʉ Nyii bu gwè nə məgʉ́ə ntyʉʉ təka?10Ndə ŋgie-shʉəŋ-kə, fɔkə ndə i nɔʼ kə fəŋ kie məgʉ́ə, nɔ bʉ̀nə bɛ nduɔ təmə kie məgʉ́ə məniʼ fɛ, bʉʼka məgʉ́ə ndə i leʼ chàa ɔ.11Bʉʼka kaʼ fɔkə ndə i kie ndə məlìʼ gwè nə məgʉ́ə, fɔkə ndə i kie ndə məbɛ vɛʼ mɔʼɔ bu kie məgʉ́ə ndə i yɔ́ŋ daa.12Bʉʼka baʼa kie yəŋkə ndə məyʉ́əʼnə chɔ ndə yɔ̄ŋ-yə, fyiihə-aʼ nɔ kɛŋ bɛ tə̀ŋnə,13kaa ndə Mushi ndə ɔ kə mɔ̀ʼ bɔŋ shʉ-ɔ mbɔ bʉə-Isilɛ mətʉ́ʼ shʉ-yʉə nyíɛ məgʉ́ə ndə bɛ məgʉ́ə ndə shʉ-i tʉʼ kwùhə bu yi mì fɛ.14Bɔŋ i shʉ́əhə fyiihə-ʉə bʉʼka tə gwè dàa laa, ndʉʉ ndə bɔ̂ŋ tíi mu nduɔŋ məŋkaa nɔ, mbʉ bɔŋ bʉ̀nə káa haʼ ndəŋ ndaahə-ʉə, bʉʼka nɔ bɛ haʼ ndʉʉ ndə wo bɛ́ŋ Klai ndə bɔŋ-ɔ̄ŋ chóʼnə shʉ́ə-ɔ̄.15Ɔŋ, tə gwè dàa laa-ɔ̄, ndʉʉtəmiyɔŋ ndə bə tíi nuʼ-Mushi nɔ, mbʉ bɔŋ kwóhə ŋkwɔʼtə-yʉə.16Bɔŋ ndʉʉ ndə wo kíahə ŋwɔŋ-ɛŋ tʉ Tiekətʉ nɔ, bə chóʼ mbʉ bɔŋ.17Nduɔ, mbʉ kəŋgie mbɔ, “Tiekətʉ” mu kəyəŋ-fɛ̄ŋ nɔ bɛ mbʉ Lyʉʉhəkə, yəŋkə ndə LyʉʉhəTiekətʉkə bɛ chɔ, t̃ʉ-wo-kə nɔ lʉ́ʉ ɔ chɔ fɛ.18Bɔŋ bʉʼʉ bənchəŋ ndə bə nɔʼ chóʼ mbʉ bɔŋ hə shʉ-bʉʼʉ, bʉʼʉ nɔ tʉʼ nyíɛ mbʉ məgʉə-Tiekətʉ, bə kíahə bʉʼʉ ndə finə-i, bʉʼʉ kə́ lɔ̀ hə ndə ntɛ məgʉ́ə imɔʼ, gɛ̀ dàa ndəŋ ibɛʼ-yə ndə i gʉ́ə. Bʉʼka yɔ̄ŋ-yə nɔ gwè hə kəghɔ-Tiekətʉ ndə ɔ bɛ Lyʉʉhəkə.
Wycliffe Bible Translators, Inc.