Bulus Sẽkoo yɛnɛ shɔ AFISAWAYI5
Ɔ̃nɛ a Ɗɔsẽsẽ
1Ji nagbete ɔ pɛ Ɗalapa jaa ɔrinɛ, ɔ̃rɔɔtɛ kaka jazɨng a kɔrɔ ɔ ɔ̃ ji naa ukɔ.2Ɔ̃rɔɔtɛ kaka jazɨng a kɔrɔ ɔrinɛ u sãwɔrɛ, ji nagbete Kirisi ɔriuyɛ ãu suru au yuu, naa vinaa ãnɛ sũru-sũru a viyuu ãnɛ gbete Ɗalapa nta tɔ̃vɨntɔ a wuniyɛ.3Ji nagbete ɔ pɛ Ɗalapa shɔbiiyi, ji kɔri ɓa ruu kpantanɛ ko ruu vikɔ̃linɛ ko yuukasinɛ shɔ ɓanɛ ɔ a wuni ɓa.4Ji ɗɔkɔ a ruu kɔ̃linɛ nwanɛ, a ruu gbete yɛ n ti Ɗalapa bassinɛ ɓa, a rãng pɛlinɛni, ji kɔri ɓa shɔ ɓanɛ ɔ awuni ɓa, nɔgbete ɔ si pɛli nam ɔ dɔ̃ri ɓɛɛ ji Ɗalapa.5Ɔ zɛtɔ nɛ shɔ kpantang pɛlinɛ, shɔ vikɔ̃linɛ pɛlinɛ ko shɔ yuu kasinɛ, ( aru shɔ yuu kasinɛ u a shɔgbete gɨn jaɗa ni zali.) yɛ kpaa viwɔɔ ɓa a Kirisi kpati roonɛ a Ɗalapa ɓɛɛni ɓa.6Ɔkɔɔ yaa shɔwɔnɛ u ɗakɔɔrɛ a ruu kɔ̃linɛni; jo aru vigbetemiyikɔ Ɗalapa sisɨn lɛsinɛ yɛ no a shɔgbete i gɨu nyaɓayɛ i yuu.7Aru nankɔ viwɔkɔ ɓasɔnɛ a shɔmiyini.8Siwɔ ɔ̃ pɛ a ɗɔkɨnri, dɔdɔrim ɔ ɔ̃ kɛtɛ Uɓeyelapa shɔbiiyi, ɔ a ɗɔsẽsẽ. Aru nankɔ ɔ̃rɔɔtɛ kaka jazɨng a kɔrɔ ɔ ɔ̃ naa shɔ ɗɔsẽsẽyi,9aru ɗɔsẽsẽkɔ n ti vitɔ̃vɨng jo, tɔ̃vɨn pɛlinɛ a ruu nizɛni.10Ɔ mabiitɔ ɔ mati vigbete Uɓeyelapa kasiyɛ.11Ɔkɔɔ pɛli vi kotipimnɛ naa shɔwɔyi pɛliyɛ, vigbete shɔ pɛli a ɗɔkɨnriyɛ anɔgbete ɔ si pɛli nam ɔ shɛshi a ɗɔsẽsẽ. (12Pɛ kpẽnti viyusẽẽ shɔ sha vigbete i pɛli aɗɔ ɓuzɨnɛyɛ.)13Naa shɔkɛ shɛshi vimiyinɛ piti kpai a ɗɔsẽsẽ, kɛɗɔn shɔyɛ zɛ viu kɛ wasa-wasa nɔgbete i ɔ̃ yɛ;14aru ko-iviya gbete shɔkɛ shɛshinɛyɛ rikɛ ɗɔsẽsẽ. Aru gbetenkɔ shɔ shanɛ,<<Shɔgbete aɗɔ nɔrɔ roonɛm yulapanɛ,yulapanɛ a vɔrɔni,Kirisi yɛ kɔlitɔ aa biini.>>15N gelɔɔtɛ ɔ kɔyuutɔ awɔ ɔ̃nɛni. Ɔkɔɔ ɔ̃nɛ a shɔgbeteyi rãng-yini, ama ɔ ɔ̃ jo naa shɔruukpẽnɛyi.16Ɔ pɛli vishonɛ a ɗagbete ɔ kpaayɛni tɔ̃vɨn, aruviya dii mi pɛ dii kɔ̃linɛ.17Ɔkɔɔ ɔ̃nɛ rãng-yi, ama ɔ mabii ɔ kã jo vigbete Uɓeyelapa kasinɛ ɔ pɛliyɛ18Ɔkɔɔ ɓoo mii inabinɛ u tɛwɔ kakarɛ, au yɛ lɛsɔɔyɛnɛ; Ama ɔ yaa Ɗa suru u rauwɔ birɛ.19Ɔ nwari zɔ nya a ruu Zabura, ɔ tɔ̃ɔ̃ soo beelinɛ a soo wɔsɔ-wɔsɔyini; ɔ tɔ̃ri Uɓeyelapa soo ɓeline a Zaburani a ɓelinɛni awɔ sisɨn.20A Uɓeyelapa Yesɔ Kirisi nii, ɔ dɔ̃ri Ɗalapa u Ɓeye ko-pi leepiya ayuu vi piti kpai.Shɔwɛrɛyi a Suwɛrɛyi
21Ɔ ã yuu a zɔbii ɔ pɛli nankɔ a Kirisi setintanɛni22Suwɛrɛyi ɔ ã yuu a mɛvɔyiyi bi naa ɔ ã Uɓeyelapayɛ.23Aruviya vɔshɔ u kaka a ɓɛso yuuni, jo nagbete Kirisi u kaka a shɔ Ɗa gɨnnɛyi biiyɛ; Kirisi au yuu ukɔ ɔ̃ jo shɔgbete ã sisɨn a Ɗabii i shɔ-shɔraanɛ.24Ji ɗɔkɔ suwɛrɛyi ɔ ã yuu a mɛvɔyi bi kpai ji nagbete shɔ sisɨn ãnɛ a Ɗabiiyi i ã yuu a Kirisi biiyɛ.25Ɔ Shɔwɛrɛyi ɔ ɔri mɛsoyitɔ ji nagbete Kirisi ɔri shɔ gbeteyi ã sisɨn a Ɗabiiyɛ a ãu suru ai yuuni.26Pɛli vim aru gbete kasinɛn pɔ̃rɛ nɛu ɔ̃ wɔsɔ-wɔsɔ a Ɗalapa ɗɔbii, a nyaba u nyanwanɛ a knti gbete sɔki a mii tɛpɛ-tɛpɛyɛ,27pɛli vim a ɗagbete ã shɔ gbeteyi ãsisɨn Ɗabii i yuu, aru i kɔritɔ tɛpɛ-tɛpɛ, ruuvini ɓa, i ɔ̃ wɔsɔ-wɔsɔ ko shɔ ɓau nii ɓa a vikɔ̃linɛni ɓa.28Shɔwɛrɛyi ɔ ɔri mɛsoyitɔ ji nagbete ɔ ɔrɔɔ biiyɛ. shɔwɛrɛ gbete kɛ ɔri ɓesonɛ ɔri jo u yuu. (29Shɔwɔ jo bɛ̃ɛ̃ u bi ɓa legbeteni ɓa. Anɔgbete u si pɛli nam u shaari biyitɔ, u kɔyirɛ, ji nagbete Kirisi pɛli a shɔ gbeteyi ãsisɨn Ɗabiiniyɛ;30Aru u pɛ jo u gboki bikɔ.)31Nagbete Ɗanyaruubii shayɛ nɛ,<<Aru gbetenkɔ vɔshɔ yɛ yaa u ɓeye a ɓinini u rɛɛ zɔ a ɓeso, i zitimiyi i yɛ ɔ̃kɛ gbete.>>32Shɔmpɛ ruuɓusinɛ gbikiri-gbikiri gbete shɔ ɓeli a Ɗanyaruubiiyɛ, gbete ang zɛrɛ shɔ sha a Kirisi yuu a shɔ gbeteyi ãsisɨn a Ɗabiiyɛ.33Ama ruum ɗiwɔ naatɛ jo a biini: ɔ̃rɔɔtɛ kaka jazɨng akɔrɔ ko-pi shɔwɛrɛ gbetepiya u ɔri ɓesotɔ naa u yuu, ɔ̃tɛ kaka jazɨng akɔrɔ ko-pi so shɔpiya u bassi ɓɛvɔtɔ.The Word for the World International