Bulus Sẽkoo yɛnɛ shɔ AFISAWAYI6
Jaayi, ɓeye a ɓini
1Jaayi, pɛ ɔ vishonɛ Kirisakɔ ɔ gɨn ɔ meye a miniyi nyatɔ, aru shɔmkɔ ɔ̃rɛ vishonɛ tɔ̃vɨn gbete ɔ pɛliyɛ.2<<Ɔ bassi ɔ meye a miniyitɔ>> n pɛ nya-ãsinɛ gaanɛ gbete shɔ marɛ a pɔ̃ viwɔ ɗɔnyɛ:3<<Nɔgbete a yɛ kpaa ɔ̃nɛ tɔ̃vɨn, nɗa a kpaa ɔ̃nɛ dɔkɔkɔ a koo.>>4Jaɓeyeyi ɔkɔɔ sɨn mɛjaayinɛ i yɛti lɛsirɛ. Ama ɔ basiyirɛ ɔ gɔ̃yi sho a nyaba kirisa a ruugelinɛni.Fooyi a Shɔwɛrɛyi
5Fooyi ɔ gɨn ɔ shɔwɛrɛyi nyatɔ gbeteyi a kotipim ɔ basiyitɔ fɛ̃ɛm; ɔ pɛli a sisɨn gbete, nagbete ɔ pɛli Kirisiyɛ.6Ɔkɔɔ pɛlinɛ aɗagbete shɔ nɔɔ awɔ bikɔ sheeli ɓa, naa shɔgbeteyi kã bɛlinɛyɛ; ama ɔ pɛli jo vigbete Ɗalapa kasiyɛ a sisɨn gbete, naa Kirisi fooyi.7Ɔ pɛlɔɔ vishonɛ a sisɨn puru, naa foo shoshi Uɓeyelapayɛ, ɓa naa ɔ shoshi shɔzɛyi ɓa.8Ɔ kpaa sisɨntɔ nɛ Uɓeyelapa yɛ ã ko-piya viɗɔnwanɛtɔ, ko foo ko jawɛrɛ, aru vishonɛ tɔ̃vɨn gbete pɛliyɛni.9Ɔ shɔwɛrɛyi ɔ pɛlijo ɗɔkɔ awɔ fooyi ni ɔkɔɔ zatiyinɛ. Ɔ kpaa sisɨntɔ awɔ fooyi ni ɔ shɔwɛrɛ gbete a kolapa, shɔgbete au yeeri kopiya ruu zali au tasi yuu vɔsi ɓa.Ɗalapa Fãrã bawaanɛ
10A kɨntiuni kpai, ɔ masi zɔ bitɔ ɔ ɓasinɛ yuu a Uɓeyelapa kaka vishonɛ pẽnɛba.11Ɔ hã fãrã au Ɗalapa ãwɔyɛ gbete yɛ rawɔ a sɨnyɛ a bi piti kpai, nɔgbete ɔ zɛnɔɔ shinɛ a japɛ̃pɛ̃ɛ̃ nyaba shɔɗanɛ.12Aruviya u waaba ɓa a shɔzɛ ɓa ama u waaba a suru kɔ̃linɛ gbeteyi a kotipiyɛ , a kpatiyi, kaka vishonɛyi, a shɔgbete ai sã kpati ɗɔkɨnri jakɨntimiyi ai naa.13Aru nankɔ ɔ tosi visɨntanɛ gbete Ɗalapa ãwɔyɛ dɔdɔrim! naa dii kɔ̃linɛu kaanɛ ɔ zɛnɔɔ shinɛtɔ a sisɨnmanɛni; a knti gbete ɔkɛ waabaunɛyɛ kɛɗɔn ɔ rawɔ tipirɛ.14Aru nankɔ ɔ mabiitɔ, a tɔ̃vɨn u ɔ̃ naa rii gbete ɔ ma awɔ sãnyɛ, tɔ̃vɨn pɛlinɛni u ɔ̃kɛ ɔ fãrã sɨntanɛ,15ɔ bimanɛ u ɔ̃ naa kodɔɔ gbete n ti ruu tɔ̃vɨn ɔ̃nɛbiinyatɔ̃nɛyɛ.16Ko-pi ɗaviya ɔ tuu sisɨn ãnɛ u ɔ̃ naa vigbete yɛ rawɔyɛ ɔ nyo yaa shɔ shɔ-shɔlinɛm awuni.17Ɔ tɛ wayuu lasaka naa viyuu raanɛ, ɔ tuu ruu Ɗalapa naa shala gbete suru ãwɔyɛ.18Ɔ gaki Ɗa kopiɗaviya a nyaba Ɗa suru naapɔ̃nɛ, Aruumkɔ ɔ ɔ̃ a nɔkãkãri, ɔ bi ukɔ vɔnɛ; ɔ gaki Ɗalapa shɔbiiyi Ɗatɔ ko-pileepiya.19Ɔ gaking Ɗa sɔ̃njo nɛ Ɗalapa u ang ruu a nya n kɛ mabiinɛ ntɔ n nwanyayɛ, nɔgbete n nwanya a kakani n tasi shɔ vigbete shɔ ɓusi a ruu tɔ̃vɨnyɛ.20Aruviya jo ruu tɔ̃vɨnkɔ nkɔng ɔ̃rɛ Kirisi janɔɔ, ko dɔdɔrim n a jaahmi. Ɔ gaking Ɗa n kpaa kaka nyanwanɛtɔ aru ruu tɔ̃vɨn naa n si pɛliyɛ.Nyageenɛ Dangdang
21U ɓɛzɔ̃ shɔ ɔrinɛ Taishiku Kirisi jashonɛ, shɔgbete au shoshiu Uɓeyelapa vishoshinɛ sisɨn gbete, ukɔ yɛ gelɔɔ n ruubiirɛ piti kpai, nɔgbete n ɔ̃ yɛ a vigbete n a ɓuzɨnyɛni.22Jo ruukɔ n shou awɔ ɗɔbii u gelɔɔ vigbete u a ɓuzɨniyɛ kpai wɔsɔ̃n u masɔɔbiitɔ.23N shɔbiiyi, Ɗalapa u Ɓeye a Uɓeyelapa Yesɔ Kirisi u ãu Kirisayi ɔ̃nɛbiinyatɔ̃nɛ, ɔrinɛ a sisɨn ãnɛni piti kpai.24Ɗalapa tɔ̃vɨn shonɛ u ɔ̃ a shɔgbeteyi ɔri Uɓeyelapa Yesɔ Kirisi a ɔrinɛ gbete sɔ̃nyaɓayɛni.The Word for the World International