Bulus Sẽkoo yɛnɛ shɔ AFISAWAYI4
Shɔ sisɨn ãnɛ i Gbete a Kirisi
1N gakɔɔtɔ n shɔgbete n a jaahm aru gbete n gɨn Uɓeyelapayɛ: n masɔɔ bi ɔ pɛli ji tɔ̃vɨn naa shɔ sisɨn ãnɛ Ɗabiiyi pɛliyɛ nɔgbete Ɗalapa shayɛ kɛ ɓawɔ nyanɛyɛ.2Ko-pi ɗaviya, ɔ ɔ̃ shɔgbeteyi ɗeyuu ɓa, shɔgbeteyi laki yuu ɓa, shɔgbeteyi mɛɛsisɨntɔyɛ. Ɔ tasi zɔ ɔrinɛtɔ a zɔ ɓasinɛni.3Ɔ mabiitɔ fɛ̃ɛm ɔ sã yuɓasinɛ gbete Ɗa suru ãwɔtɔ a nyaba ɔ̃nɛbiinyatɔ̃nɛ a kopiyani.4Bi ji gbete Ɗa suru sɔ̃n ji gbete, ji nankɔ sisɨn pɔ̃nɛ ji gbete a Ɗalapa ɓawɔ nya a yuuniyɛ.5Uɓeyelapa ji gbete, sisɨn ãnɛ gbete, batizima sɔ̃nji gbete;6Ɗalapa ji gbete, ukɔ ɔ̃rɛ shɔ Ɓeye piti kpai, ukɔ ɔ̃rɛ Uɓeyelapa kpai, shovi a shɔ yuu piti kpai, u a shɔsisɨn piti kpai.7Ama ko-piya Kirisi ãu vi-ãnɛ tɛttɔ totot nɔgbete i pɛliu vishonɛyɛ.8Nagbete Ɗanyaruubii shayɛ nɛ,<<Aɗagbete gẽ lapa feefee ye,tu shɔgbete sãyi yɛ a naani;a ã shɔ vi-ãnɛyitɔ.>>9Dɔdɔrim <<u yɛnɛ lapau>> tasi kɛnɛ iviya? tasinɛ au gaanɛ noo arɛ a tɔ̃ɔ̃ tipidii.10Shɔgbete au noo arɛ lapa sɔ̃n dijo ukɔ gẽ laparɛ, a koo gbete tɛɛ kolapayi yɛ, aruviya u yisi kolapa a kotipini piti kpai au ɔ̃nɛ.11Si Kirisikɔ ã <<shɔ vi-ãnɛrɛ>>; Yesɔ lɔ zɔ gãsiyi nɛ ɔ̃ jashonɛyi, shɔwɔyi nɛi ɔ̃ janyagadi, shɔwɔyi nɛi ɔ̃ shɔgbete i gɔ̃ shɔ nɛi rii kirisayɛ, shɔwɔyi nɛi ɔ̃ shɔgbeteyi nwari shɔ Ɗanyaruubii a shɔmalayi.12Yesɔ Pɛli vim piti kpai aru masi shɔ Ɗalapa gɨnnɛyi bi i pɛli shɔ sisɨn ãnɛyi vishonɛ. Nɗa shɔ Ɗalapa gɨnnɛyi kpai i ɔ̃ a kakani ai sisɨn ãnɛ.13Aru nankɔ u piti kpai u ɓasi yuu a ɗɔzɔɔ u ɔ̃ gbete a yɛti sisɨn ãnɛ, au ruu zɛnɛ aru Ɗa jaa; u ɔ̃ shɔgbeteyi batɛtɔyɛ, u kpaa nya aɗɔgbete Kirisi banɛ doonyayɛ.14Kɛɗɔn u ɔ̃ tɔkɨn naa jabẽrẽti ɓa, naa sɔrɔ kɛ shɛnɛ u tuurɛ u gisiurɛ a nyaba gbete shɔ-shɔɗakinɛyi mati shɔyɛ, shɔgbeteyi i ɗashɔ ai sẽrẽniyɛ.15Ama ukɛ sha vitɔ̃vɨng nɛ a suru zɔ ɔrinɛ, ɔ̃riutɛ kaka jazɨng a kɔrɔ u ba a Kirisini shɔ gbete ukɔ ɔ̃rɛ yupɛ̃ni.16A Yesɔ nakɔ ko-pi gboki bi gbete piya ukɔ sãrɛ a baasiyi a ɗɔzɔ, bi gbete shɔ sãu gbokiyi a ritiyi a ɗɔzɔɔ nɔgbete shɔ pɛliyiyɛ. Naa ko-pi gboki gbetepiya kɛ shovinɛ nagbete shoyɛ, biwu piti kpai barɛ a ma yuu a ka ɔrinɛ.Suru Sɔɔ a Kirisi a Bi
17Kɛɗɔn a Kirisi nii n gɔ̃wɔ yusho: ɔkɔ ɔ̃nɛ naa shɔgbeteyi gɨn Ɗalapa ɓayɛ toti, shɔgbete i lɛri a yuuvi waati18shɔgbete i sisɨn a ɗɔkɨnri. i yɛ kpaa suru gbete Ɗalapa ã shɔyɛ ɓa, i sisɨn piti kpai yɛ zɛ viɓa ai ruu yulakinɛ.19I sisɨn yusẽe ntanɛ ɓa ko fẽe; i ã yuutɛ a ko-pi vikɔ̃linɛ gbetepiya pɛlinɛ, i pɛli vikɔ̃linɛ gbɔgbɔ, naa kpangtang, i bɛ̃ɛ yaanɛtɔ.20N ɓa vigbete ɔ mati a Kirisi yuuyɛ ɓa!21N zɛ tɛttɔ shɔ gelɔɔ u ruubiitɛ, ji nagbete ɔ siu jadɔɔ shɔ matiwɔɔ tɔ̃vɨn gbete a Yesɔ yuuyɛ.22Aruukɔ ɔ yawɔ nyaba gbaali kati, gbete pɔ̃ɔrɛ ɔ ɔ̃ nagbete ɔ ɔ̃ siyɛ, au vishɔ ɗakinɛ lɛsi tɛttɔyɛ.23Ɔ̃tɛ kaka jazɨng a kɔrɔ, ɔ sisɨn a lɛrinɛni ɔ kɔsitɔ u ɔ̃ sɔɔ kpai,24ɔ̃tɛ kaka jazɨng awɔ kɔrɔ ɔ tuu sisɨn sɔɔ, gbete Ɗalapa shɛshi au shẽbiiyɛ naa u ɓɛɛyɛ, a tasiu yuu a shonɛ tɔ̃vɨn a ɔ̃nɛ Wɔsɔ-wɔsɔ.25Nyayelinɛ tɔɓa, kɛɗɔn ko-piya ɔ̃riutɛ kaka jazɨng a kɔrɔ u geli shɔgbete i ã sisɨn Ɗabii ruu nizɛ tɔ, aruviya u ji gboki bikɔ Kirisi bi kpai.26Naa ɔ sisɨn kɛ lɛsinɛ, ɔkɔɔ yawɔ sisɨn lɛsinɛ nɛ u n-tɔɔ ruuvinirɛ, ɔkɔɔ ɔ̃nɛ ɗau yisɔɔrɛ a sisɨn lɛsinɛni.27Ɔkɔɔ yaasi japɛ̃pɛ̃ɛ̃ nyabanɛ.28Akɛ ɔ̃nɛ shɔ ɓɔɔ ɓɔnɛ, ɔ̃raatɛ kaka jazɨng a kɔrɔ a yaa kati a gaa vishonɛ pɛlinɛ, aru a kpaa vigbete ɔ̃ a yuu tɔ̃vɨn, nɔgbete a yɛ pɔ̃si shɔraayi naa joyɛ.29Ɔkɔɔ shɛshi ruukɔ̃linɛ nɛ awɔ nyani, ama ɔ shɛshi jo ruu tɔ̃vɨn. Ruugbete masi shɔbii a vishonɛ tɔ̃vɨn gbete yɛ ãwɔ vigbete ɔ kasiyɛ, nɔgbete ɔ kɛ shanɛ u ɔ̃ ji vitɔ̃vɨng a shɔgbete i wesho awɔ nyayɛ.30Ama ɔkɔɔ lɛsi Ɗa Suru sisɨnnɛ; aruviya Ɗa suru ukɔ ɔ̃rɛ Ɗalapa vitasinɛ awɔ yuuni, lewu yɛ atɔ nyamasinɛ ɓa gbete Ɗalapa yɛ yawɔ naa.31Ɔ yaa gãgãshaanɛ kati, sisɨn kɔnɛ, a sisɨn lɛsinɛni. Marinɛ ko zɔ dãnɛ tɔkɨn ɓa, ɔkɔɔ bɛ̃ɛ̃ zɔnɛ tɔkɨn.32Anɔgbete ɔ pɛli nankɔ ɔ pɛli zɔ vitɔ̃vɨngtɔ, ɔ yaasi zɔ ruuvinitɔ nagbete Ɗalapa yasɔɔ ruuvini a Kirisi kabiiyɛ.The Word for the World International