Ilawsiti10
1Malya weer alya malaktaayi tibreetee yꞌee rhan. Baruuh bꞌaluukiib kwabaasi. Bariiyooh ugirmaay kehii aree oobrii halꞌi iifi. Ifiiraah tooyin tꞌiiteeba, aree iragadaayaah nꞌeeti aamuuda tꞌiiteeba.2Baruuh dis miksas abkaabu, umiksas wꞌayiib nagaali. Uragadooh umaykwaab ubhariib daasaabu, aree uragadooh utarhagwadiib whaashiib daasaabi.3Baruuh whadhaayt winneet tageega hissii aadhiya. Baruuh waliikiyanihoob, tithiwa tꞌasaramaati hissa hadiidiyaan.4Tithiwa tꞌasarama hadiidiyaanihoob, ani beet toonaati iiktibeet ahariw. Laakiin tibreetee hiss amaasiw, whiss “Tithiwa tꞌasarama idiineet toona kwibisa, aree baakatiiba!” idi.5Malya umalaktaayi ubhariib gadee rhaneebwa whaashiibwa rhaneeb wꞌayooh umaykwaab teebri beeti asti yꞌabik.6Aree baruuh Ukwaasana diimaab udhhaniinaay simii halafooya. Ukwaasana teebreewwa kastooh tehooy teefeetwa idꞌiib, toobuutwa kastooh tehooy teefeetwa idꞌiib, oobharwa tehooy teefeetwa kastooh idꞌiib, bariiyooh oosmii halafooya. Umalaktaayi “Shaawti naat han idleel kitdi.7Laakiin baliit tiyina umalaktaayi wꞌasarama udꞌaayooh kwinhistiib idwilihoob, Ukwaasanaayt kwabas taana timmiimi iyadna, baruuh suur ikishiyaayeeh inabiya sooyaab iiktiyeet iikti tindi.” idi.8Malya whiss tibreetee amaasiweeb masi geebu hadiidiya, “Difaa, been ubhariibwa whaashiibwa ingadiib umalaktaayi ayiib eefeeb umiksas yaksaa!” idi.9Aflaay ani umalaktaayi beeti giigan been umiksas oodis iniiweetu toona barooh raatan. Baruuh anii dehaay, “Yaksaat malya tamaa! Baruuh ufꞌiyook hamiinaayt iikti indi, laakiin uyafiyook tꞌawitiit nafir iikti indi.” idi.10Ani been umiksas umalaktaayi ayii ayhaayt taman. Baruuh uyafiyu tꞌawitiit nafiru, laakiin akwitꞌihoob, ufꞌiyu hamiib iikti.11Malya ani bak soomaman, “Baruuk masi ibakii gwida dehayiibwa, yhasheebwa, ibhaliiyeebwa, yhadꞌaayeebwa, iisrid tindiya.” idi.
The Seed Company