Ilawsiti9
1Malya umalaktaayi wꞌayya udꞌaayooh kwinhisiya. Aree hayuukw tibreetee tubuuti kehii dhibaab rhan. Whayuukw idhoomaayi miftaah attiyeewiyaabi.2Baruuh been idhooma ingilihoob, akra kwaraar firmii tifirꞌa toonaatiit, kwaraar haay eeya. Been idhoomaayee itfirꞌa ukwaraar tooyinwa teebreewwa thibin iikwsi.3Aree ukwaraarii yaaweet toobuuti kehii nꞌati eeyaana, aree bataah italꞌanooya tꞌiiteena whaashi kehii akrir attiyeewiyaata.4Baliit tiyaawi tubuuti oosiyaam biiꞌadaayayneet toona soomamaata, tari udaruur tari yhindi biiꞌadaayayneet toona soomamaata. Laakiin baliin oodehay Ukwaasanaay khatim tibiitiyaateeb baabariin bareeh eebhat adaayeen.5Bareeh haay eedirni akrir attiyeewiyaat kiikeena, laakiin bareeh ay tirga eebhat jasaayiineet toona soomamaata. Baraah been ujasaay lhameeneet tilhanay utalꞌanooy finuukii ikatiin tilhanay tꞌiiteeta.6Baliit tiyina uudehay tooyat yhariwna, laakiin imaar kiidiin. Baraah tooyat minniimi iyadna, laakiin tuuyat bareeh hooy dhaabi tindi.7Tiyaawi yhatay oofinaay dehaay gadhꞌamaab tꞌiiteeta. Igirmaayeehna kehii dimꞌaraay taj tꞌiiteena daasaata, aree ifiiraahna wꞌaadami fiir tꞌiiteeba.8Tehamootaahna timꞌateet tehamu tꞌiiteeta, aree tikwileetaahna yhadhaayeet kwili tꞌiiteeta.9Bataah iginhi gwibi iibriina, diiti gwibi tꞌiiteeba. Yꞌambireeyaahna hiss aree gwida hatayeet kadhawtiiwwa itambil oofinaay dehaay ashshigeenwa tꞌiiteeba.10Bataah niiwaabwa utalꞌanooyt toodiinwa tꞌiiteena iibriin. Iniiwaayaahna han ay tirga ookiik oodehay haay lhasiini akrir iibriin.11Bataah bateeyooh kehii yhikim hadꞌa ibariina, aree baruuh idhooma abkaab umalaktaayi ikati. Barooh oosmooh Yꞌaraami bhaliiyee, “Abaddoon” iyadna, aree Iyoonaani bhaliiyee “Aboolyoon” iyadna.12Igwirha yꞌawwali hasamiyaana, malu wari gwirha aree masi yꞌaa iyadna.13Umalaktaayi wꞌasagwira udꞌaayooh kwinhisiya, aree been Ukwaasanaay suurii iifiib idimꞌaraayt karaamaati mhiini idꞌaayee kwinhi hiss amaasiw.14Whiss been umalaktaayi wꞌasagwira oodꞌa iibriinaay dehaay, “Oobhar Furaat oowinnaay hakwar imalak ifadhig fidiga!” idi.15Aree imalak ifadhig ifdagna, toon toosꞌa tookna, oon oombꞌi ookna, oon ootrig ookna, oon whawil ookna dehaay atoomraaba. Udehayiit mhayaat takwi eedirni jillaay ifdagna.16Uudheesh igadhꞌamaab yꞌadadaahna malu shi milyoona iiktiin. Yꞌadadeehna han amaasiw.17Yhataywa bareeh oomamaabwa ani rhaneeb bak tꞌiiteeba. Iginhi kehii diiti gadhꞌi gadhꞌamaaba, tunꞌeetiit adarooyaaba, hadalaaba, kirkimiyaay tikwirbi tꞌiiteeba. Yhatayi girma yhadhaayi girma tꞌiiteeba. Aree iyafaayeesoohna nꞌeet farꞌamti, kwaraar farꞌami aree kwirbiit farꞌamti.18Mhayaat takwi wꞌaadamiit, mhayt nasiibeetee itoodaarna. Baraah aree toonꞌeewwa, ukwaraarwa, tukwirbiiwwa iiktiina aree yhatayi yafaayee farꞌamiin.19Yhatayi akrir iyafaayeebwa iniiwaayeebwa iifiin. Iniiwa ikwakwara tꞌiiteeba, girmaab oodehay haay lhasiineeb iibriin.20Uudehay aaraw baliit tinasiiba daaraat biikaayneeb masi yꞌayaahna idꞌiineet toona hooy tuubaab kiikeen. Baraah ijineet ibaada ishaab kiikeena, aree dimꞌaraay sanamaayeet ibaada ishaab kiikeen. Tꞌashteewwa, ibaloowwa, yꞌaweewwa, yhindiyeewwa daamaab isanamaayeet ibaada ishaab kiikeen. Aan isanama karhiyaana tari kiimaasiwna tari kahiireeriyaan.21Baraah imadaree han tuubaab kiikeena, tooseharwa, oojkuunwa tari toogwiharwa hooy tuubaab kiikeen.
The Seed Company