Ilawsiti11
1Malya ani kwoolay attiyeewaay, ukwoolay wꞌabaari hindi tꞌiiteebi. Ani bak soomaman, “Difaat Ukwaasanaay udiini gaw abbaraa, tikaraamaati mhiin han abbaraa. Aree baliib udiini gawiib yꞌabid dhigwiya.2Laakiin whoosh barraab eefeeb baaꞌabbaraa, baruuh Ijintiili attiyeewiyaabi. Baraah tumadiina tumugaddas fadhig tamuunwa malu tirga eeti iyadna.3Aree ani aniib ibadehi imalu akrir iyaaw andi, malya baraah alifwa malu sheebwa asagwir tamuunt yina iisrid iyadna, aree baraah shiwaali halak eetkwiin.” idi.4Aan baraah isaytuuni hindi imaloowwa, tilambaati mꞌabaka imalu tubuuti kehii Wꞌankwanaay suurii ingadiinwa ikatiin.5Gaal han bareeh adaatiib jarrabiiniyeek, iyafaayeesoohna nꞌeet yꞌeetiit yꞌashooyeehna tami tindi. Bareeh adaatiib harriiwka aree ibakii bak iyaayi.6Aan aanda teebri haay asseeni akrir ibariina, aflaay baraah isaridnihoob taabri bireeyi kiidiin. Eeyam booy ikwasiinee dehaay han adgireena, aree yhariwni doorka toobuut gwida jinsaayeet nasiibeetee eethꞌaneet toona adgireen.7Oontꞌa baraah tibadehaateehna faayseenihoob, tudhhani been idhoomaayee asti eetniit bareeh iithꞌa tindi, aree bareeh iigrib tindi, aree bareeh idaar tindi.8Igarooyaahna tumadiina toowinnaatiib dhibaa ituuꞌish iyadna, beet tumadiina tꞌalaamaatiib, “Sadoom tari Masir” iyadna. Wꞌankwanaayuusna han beentooy sallabamaabi.9Aanda kasseeh udehayiiwwa, kasteeh tigabiilaateewwa, kasseeh ibhaliiyeewwa, kasseeh yhasheewwa mhay bꞌeewwa tarabwa tikinaajaateehna iigwilal iyadna, aree bareeh oobaas iirib iyadna.10Tubuuti dehay een imalooyeet tooyat hooy afirhi iyadna. Aan inabiya imalu aree tubuuti kehii bareeh lhasaabayt, baraah firhaat kwaastiit taktak miyaaw iyawna.11Laakiin mhay bꞌeewwa tarabi harꞌiiwwa, Ukwaasanaay yꞌiini midhhani hamshuk bareeyooh shuumiyaan. Malya iragadaayeehna kehii ingadna, aree bareeh rhiyaan baliib mirkwaay hooy daaya.12Malya baraah tageega hiss tibreetee iiktiib imaasiwna, whiss “Tooy asti mꞌaana!” idi. Aree baraah asti bꞌaluukiib teebri beeti reewiyaana, aree yꞌashooyaahna bareeh iishbibna.13Beet toosꞌa tookna akraat buutiit katatanaay tiikti, aree tutamnaat takwi tumadiinaatiit katꞌamta. Tubuutiit katatanaay asarama alfa dehay tidaar, aree uudehay yꞌidhhan irkwiiniit Ukwaasana utibreeteenaay umatuun yhamidna.14Igwirha imalya hasamiyaana, aree igwirha aamhay willa yꞌi iyadna.15Umalaktaayi wꞌasarama udꞌaayooh kwinhisiya. Aree tibreeteeb tageega hissa iiktiina, baraah:“Tuduniyaatiit hadꞌaayi, Wꞌankwanaayoonwa Umasiihiitoohwa hadꞌaayi iikti tindi,aree baruuh diimaabwa kassoohoobwa hadꞌaab iikti indi.” idiin.16Isuurkina itagwgwu fadhig Ukwaasanaay suurii tehadꞌaayeetiyoohna iistꞌa aree ifiireeyoohna dehaay dhibiyaaniit Ukwaasana yꞌabidna.17Isuurkina:“Wꞌankwana Ukwaasana Wꞌalyaab, barook nhamid,Oongaal Wꞌeefeebwa suur iifiibwa, hinin barook nhamid.Baruuk yꞌakrireek iwawin tiyhaa,aree whadꞌaamti badoota.18Idehaya yhaseena,aree igadabaak yꞌaaba.Yꞌayaab gaadiimti door yꞌaabu,aree ikishiyaayeek inabiya ijir tiniiwi door han yꞌaabu,aree imugaddasaayeekwa barook ireekw baliibwa,kasseeh iwawinwa idadiswa wꞌijroohna tiniiwi door yꞌaabu,aree baliib toobuut kwidhseen hooy kwidhsi tindiyi door yꞌaabi.” idiin.19Malya Ukwaasanaay udiini gaw tibreeteeb eefi ingal. Udiini gawiib aree bariiyuuh ugaladi sanduuk lawiya. Beentooy aree talaw talawiya, huudtwa, thiwaat thiwiyaana, tuubuut katatta, akra birii inbi han dhadhiyaan.
The Seed Company