Ruka 21 ਪੜ੍ਹੋ

Ruka21

Morobise kaiwai tanaro beda sosoro ra

¹Iesu Tarena Moto ato na-gomidiro nou idomari na-giwawota nou ro namabu sirio urubia nato giwia Godi sapuwo to mani na-gibiti-rimo mani bokose to. Nu edi mani bokose ro nou gomo ato gomidiro.²Ina nou ro ibose ta-gowea ata garamu orobo nu auna mani iopu teibo ibiria-ma pua, auna namabu neito komidai modobo pua.³Nou ro ibo kowasoro urubia aboto, ‘Nio mo ro morobise owera mimowapotai-ro, nedi namabu tato garamu orobo ro nou ro ata nakomu ata emeserai pua moto goro ato. Nou kaiwai tanaro ibo pua namabu sirio urubia sosoro.⁴Neio abato paease beda mani ro iamo io neio ro nou iaremo-dumo. Ina nedi garamu orobo ro nu namabu tato orobo ie, kaupoti nou abato beda mani kainai ro owamotiti ohona imade na nou ro momuo se noti iedea.’

Iesu ro Tarena Moto sapuwo to gimowauti

⁵Iesu arua kowasoro urubia Tarena Moto ibo gemowagomea-rimo. ‘Nedi Tarena Moto ro meamea nadi to gididi-rimo. Ina arua urubia ro mea sosoro namabu ta-giaiwo-rimo.’
Kaupoti neio Iesu ro na-gimororowai nou ro ibo,⁶‘Saiki ata, ata nadi ata otomaidiro-ri pua nedi Tarena Moto ro nato neio imese goto to amadime-erebeduti-ri.’

Womu tau ato ubauba tanaro amadimo-ororosioidiro-ri

⁷Ina kowasoro urubia ro Iesu nato gemodowa-rimo, ‘Nimo oro ro ma-dimowapotai-ro nedi tanaro ro Tarena Moto to beda tau ato amadimo-ororosioidiro-ri? Ina etou tanaro anamadidimi-iauri-ri kororosioidiro aboto?’

⁸Taie neio Iesu ro ibo gimowameai, ‘Nio modobo ie keremowotoi mea se ba-dirarowo-mo, modobo pua nio amia urubia ro kisaubuti. Mabu arua urubia tou-dioumo, mo to amadima-aratigi-ri. Neio ro ibo amadima-aro-ri, “Mo Iesu nou se ie.” Ina neio ro karasaubuti owera amadima-aro-ri ibo, “Womu tau ta-gorowateai-die abora tanaro noto-ororosioidiro-dumo.” Kaupoti nedi urubia ro neio owera aise irowidiro ate.

⁹Ina ibose nio ro amadimi-irowidiro-ri boso owera erere duriomoro ato namadimo-ororosioidiro-ri ibose urubia amadimo-ororohoio-ri, karado aise ama-ou-ri, kaupoti nio nato tere oi ate. Nedi tanaro ro keba se amadimo-ororosioidiro-ri, kaupoti womu tau saro rido amadi-ereredea-ri.’¹⁰Iesu ro ina ibo, ‘Ata duriomoro urubia ata duriomoro urubia mutu neitiro boso ibo keremedea ie. Ina ata gabamani ata gabamani mutu neitiro serawo ibo keremedea ie.¹¹Ibose erere duriomoro ato, awawo sopu momuruwo ro duriomoro neio ro amadimo-omuruwouti-ri. Ina erere duriomoro ato auna sogoi tau ro ama-araremo-ri, ibose urubia sirio erere temeteme ro ama-iwotodai-ri. Ina tere tanaro amadimo-ororosioidiro-ri toboro ato urubia sirio umoro oi ri ibo womu tau aupise tou-die.¹²Kaupoti nedi tanaro ro keba se amadimo-ororosioidiro-ri, nio etio ra kimibiria urubia nio urubia ro amadimi-irobo-ri ubauba mino to amadimi-iworohuti-ri. Nio Iu urubia karadabu moto to amadimi-iworoho-ri koto iato amaidimi-iwaititi-ri, ina nio dibura to aise amadimi-iaremo-ri, mabu nio mo kowasoro urubia ie. Eputa urubia gabamani mutu neio sosoro gabo ato amadimi-iwotoburio-ri nio koto owera nato amadima-aro-ri.¹³Kaupoti nio abato meamea tau ama-iamotiti-ri mo sapuwo to iedi awawo urubia ro imowauti ri.¹⁴Ina abora modobo ie nio mea se kimaragoidiro, nio modobo pua auna se kimaragoidiro ibo nio ro beda owera amadimu-utura-ri.¹⁵Kaupoti mo umoro ie nio muro mo ro anama-imio-ri koto abato beda owera to amadima-aro-ri. Ina nio amia urubia ro koto abato owera karo mutu neio ro nio iwameduti-ri pua.¹⁶Ibose nio mamio abeamio, naminiramio, namuturubi, gu urubia, nio aboto amadime-erewesegerai-ri nio arua neio ro amadimi-iasouti-ri arua urubia aboto iopiauti ri.

¹⁷Imese sirio urubia nio neio ro masawe amadimi-iwia-ri mabu nio mo ubi tanaro isioidirotiti-dumo.¹⁸Kaupoti nedi tanaro ro namadimo-ororosioidiro-ri nio ohu takamai neio ro amadimi-iwasomai-ri. Nio urio neio ro iwasomai-ri pua.¹⁹Nio koko se namadimi-iwotoi-ri nio ro womu tato womu tato keremiro nato amadimo-owea-ri.’

Ierusarema sabowa boso urubia ro amadimo-osamodorowado-ri

²⁰‘Ibose nio ro amadimi-iwia-ri boso urubia Ierusarema sabowa namadime-emowaperai-ri. Nio umoro nato ba-doi-mo ibo Ierusarema sabowa neio ro amadimo-opisiamuti-ri.²¹Iedi tau ro nato beda urubia ro ama-orowomidiro-ri Iudia duriomoro ato, neio modobo ie korowodau podo duriomoro to. Ibose Ierusarema sabowa ato etio ro ama-orowomidiro-ri neio modobo ie kosuruwo ata moro to korowadau. Ina ibose beda urubia ra aupi sabowa ato nama-orowomidiro-ri neio ro modobo pua auna sabowa kara goro to kodoro. Mabu neio ro mea koropirowa moro ata iato owea-ri pua.²²Mabu iedi tau ro nato Ierusarema urubia Godi ro ubauba wisa ama-imio-ri. Iedi ubauba wisa ro namadimi-iwia-ri, Tarena Buka ato beda owera gisioidiro-rimo nou sapuwo to nedi tanaro ro morobise to amadimo-ororosioidiro-ri.

²³Iedi tau ro nato niro mutu mamio ibose bamuai mutu mamio neio beda sosoro to amadimo-orowati-ri? Nirimagare babio tanaro patu iedi mamio ro neio sapuwo to imese koko ia se ama-iamo-ri. Nedi tau ro nato urubia sirio auna ia ubauba ro amadi-iwia-ri. Nedi tau ro nato Godi auna serawo nato amadi-emagagai-ri nedi duriomoro urubia ro neio aboto.²⁴Nedi urubia ro neio boso urubia ro giri to amadimi-iopiauti-ri arua neio ro amadimi-irobo-ri ina erere daimodaimo duriomoro to amadimi-imudidiro-ri. Ierusarema sabowa wagoha to Iu owera karo tato urubia ro amadimo-oturai-ri simara se womu tato Iu owera karo tato urubia tau nama-oroporeai-ri.’

Iesu korowameai aupiaupi nama-orobai-ri aborabora tanaro nato amadimo-ororosioidiro-ri

²⁵‘Saiki ra sagana ra kiboni mutu neio abato aborabora tanaro amadimo-ororosioidiro-ri urubia sirio umoro koi sapuwo to ibo womu tau ta-norobai-dumo. Urubia sirio nedi sopu duriomoro gebari ro nato na-orowomidiro neio auna tere ro ama-iwati-ri ina amadima-aradoruti-ri. Mabu buru oromo ato auna gawia ro ama-araremo-ri bukopu gebarigebari nou ro ama-iwouburio-ri toboro gururu beda sosoro ra idaibo sosoro ie.²⁶Iedi tau ro nato urubia tere ri sapuwo pamo amadimo-orowaburo-ri. Mabu duriomoro ato beda tanaro namadimo-ororosioidiro-ri neio kimaragoidiro ro ama-iopia-ri. Mabu toboro sopu momuruwo ro pupuwo to ama-omuruwouti-ri ina kiboni sirio simara moro ato orowotoi-ri pua.

²⁷Ina iato tuturu to owamo-ri pua urubia ro amadimo-owea-ri Imese Urubia Kiauri Dubu nu simara woroworo pupuwo korosa mutu tema ohu rido amadi-orowapotai-ri tema.²⁸Nedi tanaro ro kororosioidiro aboto namadima-araratamuai-ri nio modobo ie koko se korowotoi ina sirio tau kamade ro kiwati mabu tau aupi se ta-gorobai-die nio Godi ro ubauba aboudo nato amadi-iapopo-ri.’

Erere tau sapuwo to dewao ota ro urubia umoro kiwaititi ie

²⁹Iesu ro kowasoro urubia nedi totomu ro nou gimowauti. ‘Nio ro ma-diauri-mo arua ota dewao ota mutu.³⁰Neio orio puara kisuwoduti ato, nio umoro samo to koi ie ibo surama tau aupise ie.³¹Ina idaibo sosoro tanaro neio ro amadimo-ororosioidiro-ri. Nio ro namadimi-iauri-ri nedi koko tanaro ro namadimo-ororosioidiro-ri, nio umoro amadimo-oi-ri ibo Godi ro kiwaboi tanaro aupiaupi ro ta-gorobai-die.³²Ina nio mo ro morobise ia owera nama-imowapotai-ri, nedi tanaro ro namadimo-ororosioidiro-ri urubia abora na-orowomidiro nedi duriomoro ro nato nedi tanaro ro neio abato amadimo-ororosioidiro-ri.³³Nedi duriomoro gebari ro, toboro, sopu ato imese sirio namabu patu neio imese amadima-araraseperai-ri. Kaupoti mo ro beda owera niarotiti araraseperai-ri pua, ibose to ama-iamotiti-ri.’

Sirio tau aise gi-eremododiai-ri

³⁴‘Mea se deremowotoi-mo! Nio ro modobo pua sirio tau kidio kiworohuti, ina kidio daradara koroho, ibose auna se kimaragoidiro duriomoro tanaro sirio aboto. Nedi tanaro peteibi ro nio ro namadimi-isioidiro-ibiri, ina mo korowameai saiki namadi-apimaidiro-ri nio nou ro poinai sosoro ama-irobai-ri.³⁵Mabu mo korowameai saiki namadi-apimaidiro-ri, imese urubia sirio nedi duriomoro gebari ro nato neio nou ro amadi-imuhia-ri.³⁶Ina noudo ie nio modobo ie sirio tau keremododiai. Abera Godi nio ro modobo ie kararatoro nedi ubauba ro namadimo-ororosioidiro-ri nio neido karagarewado aboto. Ibose Abera Godi nio ro modobo ie kararatoro nio Imese Urubia Kiauri Dubu nou sosoro gabo ato, garegare tato orowotoi-ri.’³⁷Iesu sirio tau ibo irowatititi, nou ro urubia Tarena Moto ato itamudirotiti. Ina duwo nagi-ereredea-ri nu auna sabowa rido aise isuwodutititi Oribi Podo ohu ato imidirotiti.³⁸Iesu ina kowaroho duwoduwo korowameai ie Tarena Moto to, ina urubia sirio nou aboto aise irohotiti-mo Tarena Moto to nou owera irowidiro ri.