Read Ruka 20

Ruka20

Iu eputa urubia ro Iesu a-gemodowa-rimo nou korosa boido gowai

¹Ata saiki Iesu Tarena Moto ato gomidiro nou ro urubia iato gitamudiro, ibose mea owera nou simara sapuwo to gimowauti. Ina iato Godi ra Urubia ra turituri awawo urubia, Mose sabi kitamudiro urubia, Iu duriomoro kiauri urubia mutu, neio atu se nato gou-rimo Iesu emodowa ri.²Neio ro ibo, ‘Nimo ma-dimowapotai-ro oro ro edi tanaro na-isioidiro beda pupuwo korosa to isioidirotiti? Boido gowai oro ro?’

³Ina neio Iesu ro ibo gimowameai, ‘Ina nio mo ro ibose anama-imodowa-ri,⁴Ioane ro urubia obo to na-iwarumiautiti edi pupuwo korosa to na-isioidirotiti nou ro Godi aboudo a-gomidai ra o urubia aboudo ra?’

⁵Taie neio nakara se iato geremowagomea-rimo. Neio ro ibo, ‘Nimo ro nu ibo namadime-emowameai-ri, “Nu pupuwo korosa Godi aboudo gomidai-ro”. Ina Iesu ro ibo ama-utura-ri nimo aboto, “Ina mabu boira nio ro Ioane owera imibiria tato?”

⁶Ina nimo ro ibo namadimu-utura-ri, “Ioane pupuwo korosa urubia aboudo gomidai-ro”, iedi urubia sirio ro na-orowotoi-die, nimo neio ro nadi to anamadimi-ibo-ri. Mabu neio ibo timaragoidiro-dumo Ioane Godi ipusu owera dubu e.’

⁷Taie neio ro Iesu wisa ibo gemowameai-rimo, ‘Nimo umoro pua nou ro idaibo pupuwo korosa boido gowai.’

⁸Ina neio Iesu ro ibo gimowameai, ‘Ina mo edi tanaro sirio ro na-nisioidiro mo ro pupuwo boido nowai? Nio aboto mo ro owapotai-ri pua.’

Pari ubauba urubia ro emeaurititi-mo nou totomu e

⁹Iesu ro urubia nedi totomu ro nou gimowauti, ‘Ata dubu auna gereipi pari gosioidiro. Taie nou ro aise giapoi emeauri ri pari kemeauri urubia aboto. Nou ro ibo, “Nedi pari ro mea mino to ba-demeauri-rimo, nio aboto niapoi. Awawo namadimo-oi-ri, arua nio do ie, arua mo do ie.” Taie nu iato imese gasiriai ata muso duriomoro to iato imidirotiti tuturu tau to.

¹⁰Taie nou umoro na-goi ibo gereipi abora gumuni ta-goi-dumo. Nou ro keba sowake dubu nato gemeiriai pari kemeauri urubia aboto, arua gereipi gumuni imade ri, ina iwou ri nou aboto. Kaupoti nu neio ro na-gowea-rimo nu aise gado-rimo tu ia se gemeiriai-rimo ata nakomu tato.¹¹Ina iato pari abera ro ata sowake dubu gemeiriai, ina nu neio ro atu sosoro ibose to gado-rimo. Ibose neio ro nou aboto ata siripo tanaro gosioidiro-rimo, tu ia se gorowameai-ro pari namutuna aboto.¹²Ina netewa didi tau giwai nou ro ina ata sowake dubu iato gemeiriai-ro. Nedi sowake dubu ro neio ro temeteme gomia-rimo. Taie iato geherai-rimo pari goro rido ibose nu tu ia se gorowameai.

¹³Taie pari kiauri dubu ro kimaragoidiro to ibo, “Mo ro abora beda tanaro anama-osioidiro-ri? Modobo ie mo ia simara ubi mere nou kemeiriai. Neio ro nou ubauba mino to oworohuti-ri pua, mea mino to amadimo-oworohuti-ri.”

¹⁴Taie nu ioudo na-gou-ro, neio ro nu muso rido gowea-rimo, neio atu moro to na-garadabuai-rimo, neio ro ibo, “Modobo pua nedi pari ro nou ro imese moro to kirahidimai, mesuai-rimo taie pari nimo do to nato ama-ararapoi-ri.”¹⁵Neio ro iato na-gado-rimo kara goro rido aise geherai-rimo iato gopia-rimo.
Ina pari abera ro beda tanaro ama-osioidiro-ri nedi urubia ro neio aboto?¹⁶Nu ioudo namadi-ou-ri neio nou ro ama-iopiauti-ri, ina edi pari ro amia urubia aboto ama-iapoi-ri.’
Urubia ro Iesu edi totomu ro na-girorowai-rimo, neio ro ibo, ‘Modobo ia pua nedi tanaro ro kororosioidiro!’

¹⁷Kaupoti Iesu na-girarowea neio aboto nou ro ibo, ‘Ina Tarena Buka owera maumo beda sosoro hatiamo, Moto keremari urubia ro edi nadi ro na-gowatebetai-rimo kakate moro ato na-owamotiti, edi nadi ro moto nou ro kowotoi ie.

¹⁸Urubia edi nadi ro nou ro kihumo ato, neio temeteme aise kiauri ie, ibose edi nadi ro na-weretei-die urubia nou ro kipatauti ie.’

¹⁹Mose sabi kitamudiro urubia, ina Godi ra urubia ra turituri urubia, duriomoro awawo urubia, neio ro na-girorowai-rimo Iesu ro edi totomu ro na-gimowauti, iato neio gabo giosora-rimo Iesu samo to korobai aboto, koto to owou ri. Mabu neio ta-geremasibai-rimo ibo Iesu ro edi totomu ro na-gimowauti pari kemeauri urubia sapuwo to, io neio giwauti. Kaupoti neio tere ro giwati modobo pua urubia sosoro gabo ato Iesu korobai.

Takesi mani kiaremo modobo ra gabamani aboito

²⁰Taie Iesu neio ro idomari to gemaipirio-rimo nou ro edi tanaro ro na-gisioidiro. Ibose neio ro arua karatigi urubia ta-gituputai-rimo, iato gimeiriai-rimo Iesu aboto. Neio Iesu nasa urubia ie, ina namuturubi to garatigi-rimo. Neio maumo ubi a-giamo ibo Iesu ro utura ri ata ubauba owera, ina Gabamani Dubu aboto nato owou rie.²¹Taie edi karatigi urubia ro Iesu nato garatoro-rimo ibo, ‘Kitamudiro dubu, nimo umoro tinoititi-dumo oro ro edi owera ro na-iarotiti, ibose na-itamudirotiti morobise ie. Oro ro ibo pua arua urubia se kiwarebai ina arua urubia kiwarebai tato. Oro ro imese sirio tau to irowautiti Godi edi morobise gabo ro nou sapuwo to.²²Ina nimo ma-dimowapotai-ro modobo ra nimo ro takesi mani kiaremo gabamani aboto?’

²³Kaupoti neio edi karatigi tanaro ro Iesu ro umoro ta-goi. Neio ubi ie nou ro karasaubuti owera utura ri. Ina Iesu ro ibo,²⁴‘Mani iopu neito ma-dowou-rimo. Nu etu asaso ra, ina etu masiro ro owamo?’

²⁵Taie neio ro ibo, ‘Roma gabamani eputa dubu masiro Sisa, nou asaso iateidiro masiro mutu.’
Iesu ro neio ibo gimowameai, ‘Ina beda nakomu ra Sisa masiro mutu modobo ie Sisa kemowameai. Ina Godi ro beda nakomu iaiwo-die modobo ie Godi kemowame.’

²⁶Taie karatigi urubia ro edi poinai gemedea-rimo Iesu nou ro korobai modobo pua. Nou ro edi owera to gimowauti nou neito eremamuai rie. Kaupoti neio ro korobai modobo pua, neio imese sirio se aborabora ro girobai. Neio ata ro owera aro pua imese gasio se gemowadau.

Pamo urubia kireribua kemodowa owera ie

²⁷Sadusi urubia ro ibo imibiria-dumo pamo urubia neio ereitorowado-ri pua, imese moro to korowaburo ie ina keremiro owea-ri pua. Neio arua nato gou-rimo Iesu aboto, nu neio ro nato gemodowa-rimo²⁸ibo, ‘Kitamudiro dubu, Mose ro idaibo owera nou gisioidiro. Ata dubu karaburai ato, ina nou ro garamu orobo na-emeserai-die mere besere tato, ina nou neama ro ba-medea. Nou ro edi merebusere ro na-irasomai nou do pua, edi pamo dubu ro nou merebusere to kararasoro ie.²⁹Iedi tau ro nato 7 naminiramio ta-gorowomidiro. Ata orobo kebase naramu ro ta-gedea, nou mutu ta-imidirotiti-do iato edi dubu ro aise garaburai. Taie edi orobo ro nou ro mere besere tato gemeserai-ro,³⁰ina edi garamu orobo ro neama dubu ro aise gairiawado, nou mutu ibo wimidiro-do nou ro ata mere besere ata arasomai pua, taie iedi neama dubu ro aise garaburai.³¹Ina iato ata neama ro gedea iedi garamu orobo ro neitiro ibo wimidiro-do ibose nou ro ata mere besere ata arasomai pua. Taie edi dubu ro aise garaburai. Edi garamu orobo ro 7 naminiramio ro karemo to ti-goroporeai. Ina nu neio ro mere besere tato gemeserai-rimo.³²Taie edi orobo ro saro rido aise garaburai.³³Ibose Godi ro urubia pamo rido nama-iwoubua-ri, edi orobo ro etu orobo to ama-ararapoi-ri?’

³⁴Ina neio Iesu ro ibo gimowameai, ‘Kararemo owamo ibo sopu duriomoro urubia tanaro ie, osio busere kararemo, busere uramio ro kiaremo.³⁵Kaupoti etio ra Godi ro modobo urubia to na-giapoi keremiro ina kiwia aboto, Adiri sabowa ato araremo-ri pua.³⁶Neio iato modobo pua korowaburo mabu neio Godi sowake urio sosoro ama-irowomidiro-ri. Neio Godi merebusere to amadima-ararasoro-ri, mabu nedi urubia ro Godi ro kebase pamo rido ta-giwameai-ro.

³⁷Ina morobise ie nimo Mose ro keba se ta-nimowapotai-ro pamo urubia orio keremiro amadimi-iauri-ri. Iedi ota ro era ro na-gouho nou sapuwo to, Mose ro owera ta-gisioidiro Abera Naramu aboudo. Nou ro ibo, Aberaham, Aisaki, Iakobo mo neibi ro ti-nemowabutiti-bimo.³⁸Neibi ta-gorowaburo-birimo ina abora neibi keremiro ie. Godi abora neibi ro temowabu-bimo. Mabu imese sirio urubia teremiro-dumo Godi sosoro gabo ato.’

³⁹Taie arua Mose sabi kitamudiro urubia iato na-gorowotoi neio ro ibo Iesu aboto, ‘Kitamudiro dubu, oro edi wisa owera ro na-waro-die imese modobo ia ie.’

⁴⁰Ina nou ata ro kemodowa aboto modobo pua.

Godi ro kohodowa dubu Deibidi Naramu Abera ie

⁴¹Ina urubia Iesu ro iato gimodowa, ‘Mabu boira urubia ro Godi ro kohodowa dubu nu Deibidi mere to na-wasoro-dumo?⁴²Deibidi ro nakara se owera ta-gisioidiro Ohare Tarena Buka ato ibo, Godi ro ta-gutura mo Abera Naramu aboto, mo tumodi sapuwo ato oro ro ba-domidiro⁴³womu tato oro nasa urubia mo ro anama-itaumai-ri oro sairo mabu ato.

⁴⁴Godi ro kohodowa dubu Deibidi ro Abera Naramu to gasoro. Ina mabu boira arua urubia ro Godi ro kohodowa dubu Deibidi nasa to na-wasoro-dumo?’

Iesu ro urubia Mose sabi kitamudiro urubia sapuwo to gimowauti

⁴⁵Urubia sirio Iesu owera gare na-gemedea-rimo, taie nu iato aise gerewesegerai kowasoro urubia aboto nou ro ibo,⁴⁶‘Mose sabi kitamudiro urubia nio ro mea se dimowotoi-mo. Neio auna ubi ie ohona kimade moro ato koroho meamea namabu to keremeduti ie bagea neio urubia ro imowabu rie. Neio kodouti ato Iu urubia karadabu moto to neio keba moro kimaberawado ie. Neio auna ubi ie urubia ro meamea keta kimosouti orowomititi na.⁴⁷Ibose nedi urubia ro garamio mamio auna se isaubuti-dumo. Ina neio Godi aboto kararatoro ato tuturu kararato owera nou karowado ie urubia ro imowabu ri. Nedi urubia ro idaibo tanaro na-isioidirotiti-dumo, neio Godi ro ubauba temeteme timerebidiro-die saiki ata amadimo-owea-ri.’