Ruka22
Eputa urubia ro Iesu kopia gabo gemodobowauti-rimo
1Iedi tau ro nato Isiraere urubia Patapata Beredi Kiaupai Tato Soriomu kosioidiro tau aupise ia se gowamo-ro. Isiraere urubia ro Kimasaudai Soriomu to asorotiti-mo.2Ina Godi ra urubia ra turituri awawo urubia, Mose sabi kitamudiro urubia mutu Iesu opia ri gabo egea se giosora-rimo. Mabu neio urubia ro kiwia rie nou tere ro giwati.3Ina iedi tau ro Satani Iudasi Kerioti dubu nou niro turi to aise godoro nu nou ro goworohuti. Iudasi nu Iesu 12 kitiodorai dubu ata nou se ie.4Taie Satani beda tau ato godoro Iudasi aboto, nu iato aise gemobodiai Godi ra urubia ra turituri awawo urubia aboto, ibose Tarena Moto kemotoi awawo urubia aboto. Nu neio mutu geremowauti Iesu sapuwo to nou ro beda sosoro ama-apoi-ri.5Neio ro nedi owera ro na-girorowai-rimo neio auna kamade goi-rimo. Taie neio ro ibo, ‘Iesu oro ro namadi-owaboi-ri nimo aboto, oro mani nato anamadimo-omia-ri.’6Ina Iudasi ro ubi to aise gomidai nedi tanaro ro nou kosioidiro sapuwo to. Nou ro mea tau gosora urubia tato moro ato Iesu orobai ri ina apoi ri neio aboto.Kimasaudai soriomu kowasoro dubu teibo ro gemododiai-rido
7Iedi saiki ro na-gorowateai-ro, Kimasaudai Soriomu saiki ro gereredea. Iedi tau ro nato kisioidiro ie Patapata Beredi Kiaupai Tato Soriomu. Ibose kimatowo sapuwo to sipisipi kainakaina nato kiopiauti ie, Mose edi sabi owera ro nou kibodoro aboto.8Taie Iesu ro Pita ra Ioane ra aboto nato gutura, ‘Nitiro ba-dou-do Kimasaudai Soriomu sapuwo to ohona ba-dimododiai-do.’9Ina Iesu neitiro ro ibo gemowameai-rido, ‘Oro ubi na-owamo neitiro ro kosioidiro aboto beda moro ato namado-osioidiro-ri?’10Ina neitiro Iesu ro ibo gimowameai-ma, ‘Nitiro iedi sabowa ro neito namado-orowateai-ri, nitiro ro amado-owea ri ata dubu obo bageto mutu moto to namadi-idiai-ri. Iedi dubu ro nitiro ro aise ba-dobodoro-do beda moto to odoro edi moto ro neito ba-dou-do.11Ibose nitiro ro moto abera amado-owea-ri nu ibo ba-demowapotai-do, “Nimo kitamudiro dubu ibo utura-die, ‘Apira urubia ibi gugu modobo ato a-owamo ra? Mo Kimasaudai Soriomu ohona kowasoro urubia mutu iato anamadimo-osioidiro-ri.’”12Nitiro nou ro umoro ama-iwai-mari auna ibi gugu ohu ato towamo, imese nakomu sirio iato modobo ato iamo. Nitiro ro Kimasaudai Soriomu ohona iato ba-dimododiai-do.’13Neitiro ito na-gasiriai-rido, Iesu ro beda sosoro owera garo imese tanaro sirio ibose to gororosioidiro-rimo. Taie iato neitiro ro Kimasaudai Soriomu ohona iedi moto ro iato aise gimododiai-rido.Abera Naramu ohona kiho
14Edi tau ro ta-gorobai Iesu nu kitiodorai urubia mutu moto goro ato atu moro ato ta-gorowomititi, edi Kimasaudai Soriomu ohona ro nou iho rie.15Taie Iesu iato gutura neio aboto, ‘Tuturu tau to mo auna ubi ro owamotiti Kimasaudai Soriomu ohona kiho nio mutu, mabu mo ido temeteme anama-iwia-ri.16Ina nio mo ro mimowapotai-ro ido ata Kimasaudai Soriomu ohona ata mo ro iho-ri pua, womu tato Kimasaudai Soriomu maumo momuo se namadimo-ororosioidiro-ri Godi ro kiwaboi tanaro maumo ato.’17Iesu ro waini obo panikere na-gomidai-ro eso owera iato garo Godi aboto. Nou ro ibo, ‘Nedi waini obo ro panikere ato na-omidiro kodio to ba-demosuwo-mo.18Ina mo ro ibo mimowapotai-ro ido mo ro waini obo odio-ri pua womu tato Godi ro kiwaboi tanaro neito namadi-orowateai-ri.’19Iesu ro ina patapata beredi na-gomidai-ro nou ro iato gekekeouti, eso owera na-garo taie nu kitiodorai urubia erere se iato gimio. Nou ro ibo, ‘Nu mo durupi ie ba-diho-mo, mo ro nio sapuwo to anama-aiwai-ri. Nio ro idaibo sosoro tanaro ba-disioidirotiti-mo mo kemaragoidiro sapuwo to.’20Ina iedi patapata beredi ro kiho na-giporeai-rimo, Iesu ro panikere na-gomidai-ro nou ro ibo gimowapotai nu kitiodorai urubia, ‘Nedi waini obo ro na-omidiro mo ro orio hodo nasaubiai urubia aboudo mo karima nama-isuputi-ri. Nedi orio hodo kemasaubiai ro mo karima nama-isuputi-ri nio sapuwo to ie neido ama-aratamuai-ri.’Mo beda dubu ro anama-apoi-ri
21Iesu ro ibo, ‘A-wowea-bimo, nibi mo mutu na-iho-bimo mo nibi ata ro ubauba urubia aboto anama-apoi-ri. Nedi dubu ro nama-apoi-ri nu namutuna to aratigi.22Keba se Godi ro gabo ta-gisioidiro, Imese Urubia Kiauri Dubu mo nouse ie mo ro anama-araburai-ri. Kaupoti edi kapoi dubu ro nou aboto, auna ia ubauba tanaro ama-ororosioidiro-ri.’23Taie kitiodorai urubia nakara se nato geremodoruti-birimo ibo, ‘Neibi nato na-nomidiro-bimo nedi tanaro ro nou aboto, neibi ata ro ama-osioidiro-ri.’Oro modobo ie sowake dubu to kararapoi
24Iesu kitiodorai urubia neio nakara se owera to nato gororobai-rimo ibo, ‘Nimo etu ata ro ama-omidiro-ri auna to.’25Kaupoti Iesu ro neio ibo gimowameai, ‘Godi umoro tato urubia erere duriomoro ato na-irowomidirotiti neio eputa urubia mutu e. Urubia neio ro auna se imagegeaititi-dumo. Nedi eputa urubia ro auna ubi ie neio ubi tanaro se kisioidiro. Neio ubi ie mea kiwarebai urubia to kiasoro.26Kaupoti nio ro idaibo tanaro isioidiro ate! Eputa dubu to etu ro kararasoro ra nio abato nu modobo ie sopu to korowororuwo. Ina keba to etu ro otoi nu modobo ie sowake dubu to kararasoro. Nedi owera ro nio ro ma-dimaragoidiro-mo!27Auna dubu etu ra? Beda dubu ohona kemowou ra, o ohona etu ro kemowou ra? Nio ibo imaragoidiro-dumo beda dubu ohona kemowou ra, nu auna dubu e. Kaupoti mo nio mutu nato na-nirohotiti mo nio ohona kimoworoho dubu sosoro ie.28Mo nio mutu na-nirohotiti sirio koko tau ta-niaurititi, ina mo nio ro emeseretiti pua nio mo abato aupise iateidirotiti.29Ina mo Godi ro beda sosoro napoi-ro eputa dubu to ararasoro ri, nio mo ro ibose to anama-iapoi-ri eputa urubia to ararasoro ri.30Ina noudo ie nio ia ro amadimo-odoro-ri mo edi kiwaboi maumo ro neito soriomu ohona atu se iato anamadimi-iho-ri. Ibose Isiraere edi 12 gu ro na-iamo nio neio eputa urubia to amadima-ararasorotiti-ri, eputa urubia sea to nio ro ama-irowomidiro-ri.’Kimibiria iasepere mamo
31Iesu ro ibo, ‘Saimoni! Saimoni! Owera neito ma-dirowidiro-ro! Satani ro Godi aboudo umoro owera ta-imidai-ro ibo nio nou ro ama-iwaibirio-ri. Satani ro nio aboto idaibo sosoro kiwaibirio tanaro nou ama-isioidiro-ri, pari kisioidiro dubu woiti iopu rido takamai kiamotuti beda sosoro ra idaibo sosoro ama-ihoduti-ri.32Godi mo ro ta-nararatoro oro modobo pua kimibiria kiaseperai. Oro mo aboto namadi-erewesegerai-ri, oro kimibiria borubi nato ba-diwarebai neio kimibiria pupuwo ba-dimowaititi.’33Ina Pita ro Iesu ibo gemowameai, ‘Abera Naramu, oro dibura to namadime-edea-ri mo ibose to anamadime-edea-ri. Oro namadimo-opia-ri mo ibose to anamadimo-opia-ri.’34Taie Pita Iesu ro ibo gemowameai, ‘Kakaba owera kowaroho duwoduwo ato ido to ama-utura-ri tauo keba se mo oro ro netewa didi tau to anama-aratiouti-ri. Oro ro ama-utura-ri nedi duwo ro nato ibo, “Mo umoro pua Iesu.”’Modobo ie umoro umoro to koroho
35Iesu ro ibo nou kitiodorai urubia aboto, ‘Nio mo ro edi tau ato nitiodarai nio mani pauso tato, keta popo tato, tamaka tato tu kawakawa nimeriai. Ina nio ohona kiroidiro namabu mutu modobo ato iamo pua ra?’Ina kowasoro urubia ro ibo, ‘E e, nimo ohona kiroidiro namabu mutu modobo ato giamo.’36Kaupoti neio Iesu ro ibo gimowapotai, ‘Abora tanaro ata sosoro ie woki sorosoro to gi-oroho-ri. Nio ro nedi namabu teibo ro nou ba-diwou-mo mani pauso, keta popo nou se ba-dimidai-mo. Ibose oro etu ra giri tato nama-ou-ri oro ro beda durupi suana iwou ba-mowahodorai-mo ina giri neito ba-derememidai.37Tarena Buka ato owera ibo tiamo, Nu sabi kisebo dubu sosoro amadimo-oworohuti-ri. Nio mo ro ibo nimowapotai iedi Tarena Buka owera ro mo aboto morobise to ba-mororosioidiro. Io, owera sirio mo sapuwo to Godi ipusu owera urubia ro na-gisioidiro-rimo tau aupise ou-die neio mo aboto amadimo-ororosioidiro-ri.’38Ina kitiodorai urubia ro ibo, ‘Abera Naramu neito ma-dirarowea-ro, nimo abato netewa teibo giri teibo tiamo-ma.’
Ina Iesu ro ibo, ‘Io modobo ie, taie.’
Iesu Godi mutu geremowauti-rido Getesemeni pari Ato
39Iesu Ierusarema sabowa na-gemeserai nou imese gioro Oribi Podo ohu to kowasoro urubia mutu, nu sirio tau ibo irowatititi.40Nu ito na-gorowateai taie kowasoro urubia nou ro nato gimowapotai, ‘Nio Godi ba-dararatoro-mo ibo, “Koko kiwaibirio tanaro aboudo, oro ro modobo ie nimo kiwagareawado.”’41Taie Iesu ro kowasoro urubia iedi moro ro nato aise gimeserai-biro, nou neibi aboudo na-giaubai emia ro egea mere se gemopai. Taie nu iato kauhio teibo to aise girimusubua Godi aboto iato gararatoro. Nou ro ibo,42‘Abera oro ubi koi ato idaibo sosoro ba-mororosioidiro-mo. Modobo ra nedi ubauba tanaro ro kororosioidiro tato mo aboto? Kaupoti ibo pua mo simara ubi ato kosioidiro, oro ubi ato aise ba-mororosioidiro-mo.’43Ina iato sowake urio ro gorowapotai-ro Adiri sabowa rido Iesu pupuwo owai ri.44Iesu edi tau ro nato auna ia mibo ro gahidimai, ina auna ia se Godi aboto iato gararatoro. Nou ro edi kararatoro owera ro na-garo nu auna ia kahane to gorowati, ina edi kahane ro karima sosoro kisuputi idaibo sosoro gisuputi goto to.45Nu edi karatoro owera ro beda tau ato goporeai nu iato kowasoro urubia aboto aise gorowameai-ro. Neio nou ro norou kirobu moro ato giwia, mabu neio mibo kimaragoidiro mutu giwatabuti.46Taie nou ro ibo neio aboto, ‘Nibi adimo ato se gimaudutai-bimo. Diriribua-bimo modobo ie nibi Abera Godi kararatoro pupuwo kimia-ibi sapuwo to. Ina awawo kiwaibirio tanaro na-wou-dioumo nio koko se modobo ato ama-orowotoi-ri.’Iesu sirio urubia ro gorobai-rimo
47Iesu isana kowasoro urubia owera gimowauti, iato tuturu to pua urubia sirio na-gou-rimo Iesu aboto. Edi urubia sirio ro Iudasi ro gimudo-ro, Iudasi nu Iesu 12 kitiodorai dubu ata nouse ie. Ina nu Iesu aboto na-gorowateai taie nou ro aise gosomeai.48Kaupoti Iesu ro ibo, ‘Iudasi, Imese Urubia Kiauri Dubu oro ro na-osomeai idaibo oro ro ta-wapoi nasa urubia aboto.’49Iedi moro ro nato iedi urubia ro na-gorowotoi Iesu gomo ato neio ro na-gowea-rimo etou tanaro ro amadimo-ororosioidiro-ri, neio ro ibo, ‘Abera Naramu, modobo ra nedi urubia ro nimo ro giri to kiado?’50Taie ata dubu giri se gopodia-ro nato ti-gotoi Godi ra urubia ra turituri auna dubu, nu edi sowake dubu ro tumodi gare nou ro aise gowatua.51Iesu ro ibo, ‘Aai idaibo tanaro dimeserai-mo!’Taie nou ro edi sowake dubu ro gare aise gemadoborea.52Iesu orobai ri nedi urubia ro neio ro gou-rimo Godi ra urubia ra turituri awawo urubia, Tarena Moto kemotoi awawo urubia, ina Iu duriomoro kiauri urubia. Iesu ro neio ibo gimowapotai, ‘Nio neito na-wou-dioumo gamini ra giri ra mutu mo ado ri a-wou-dioumo? Nio ata dubu ata mo ro a-nopia ra?53Mo nio mutu dose eremiri pua, nio sirio saiki Tarena Moto ato ta-nitamudirotiti. Mo nio ro nato ba-norobai-rimo, kaupoti nio nakara moro eremowea-diomo abora nio tau e mo aboto ubauba tanaro kisioidiro aboto. Duwoduwo maumo ato ubauba tanaro idaibo sosoro isioidirotiti-dumo.’
Pita ro Iesu garatio
54Iesu urubia ro na-gorobai-rimo taie nu imese gowaboi-rimo Godi ra urubia ra auna ia dubu moto to. Nu Pita ro musomuso se gobodoro-ro.55Pita ito na-gorowateai neio era mabu ato gorowomidiro era ta-gaduruti-rimo era ro giaso.56Ata sowake besere ioudo na-gou-ro Pita nou ro ioudo a-geibimo-ro era pina woroworo ato na-gomidiro. Sowake besere ro ibo, ‘Nedi dubu ro Iesu mutu ta-irohotiti.’57Kaupoti Pita bagea owera gutura. Nou ro ibo, ‘Mo umoro pua oro beda dubu ato aro-die.’58Ina egea mere se ibo gorowomidiro iato ata dubu ro ibo, ‘Oro ata nou se ie Iesu mutu ta-irohotiti-do.’Ina Pita ro ibo, ‘E e mo pua io.’59Ina tau egea mere se ta-gadomaidiro ata dubu pupuwo to ioudo gutura-ro. ‘Morobise ie nu Iesu mutu ta-irohotiti-do mabu nu Gariri dubu e.’60Kaupoti nu Pita ro ibo gemowameai, ‘Urubia dubu, mo ata umoro tato ie oro beda owera to aro-die!’
Pita owera karo oporeai pua iedi tau ro nato kakaba owera nato gutura-ro.61Abera Naramu ioudo na-girarowea-ro nu idomari teibo imese Pita ato se giwotobowa-maro. Taie Pita ro kimaragoidiro to nato giwia Iesu ro keba se beda owera garo-ro, ‘Kakaba owera kowaroho duwoduwo ido to amadi-utura-ri tauo kebase mo oro ro netewa didi tau to anama-aratiouti-ri.’62Taie nou ro edi owera ro kimaragoidiro to na-gimagareai nou ro nirimagare to gomidai. Taie nu iato kara goro rudo aise gosuruo-ro auna idobi to gorowati.
Urubia ro Iesu a-gemasosowado-rimo
63Iesu edi urubia ro gemotoi-rimo nu neio ro aise gemasosowado-rimo ina iato gado-rimo.64Nu woidomari obotama to aise gowasiai-rimo. Neio ro ibo iato garo-rimo nou aboto, ‘Oro Godi ipusu owera dubu ra, a? Nimo aboto morobise to ma-dorowapotai-ro ibo abora oro etu ro ado!’65Neio ro ibose Iesu aboto sirio ubauba ia owera ta-garowado-rimo.Iesu awawo eputa urubia aboto gowou-rimo
66Iedi saiki ro na-gowaroho duriomoro kiauri urubia, Godi ra urubia ra turituri awawo urubia, ina Mose sabi kitamudiro urubia, neio atu moro to nato garadabuai-rimo. Taie Iesu neio aboto kemotoi urubia ro aise gowodoro-rimo koto owera aro ri.67Eputa urubia ro Iesu nato gemodowa-rimo ibo, ‘Nimo oro ro dimowapotai-ro! Oro Godi ro kohodowa dubu nou se ra?’Ina neio Iesu ro ibo gimowameai, ‘Nio mo ro nama-imowapotai-ri nedi owera ro nio ro imibiria-ri pua.68Ina nio mo ro nama-imodowa-ri mo wisa owera nio ro emowameai-ri pua.69Kaupoti nedi tau ro neido na-waratamuai Imese Urubia Kiauri Dubu nu imese pupuwo ia Godi nu edi tumodi sapuwo ro nato amadi-omidiro-ri.’70Neio ro ina atu se nato gutura-rimo, ‘Ina oro Godi mere ra?’
Neio Iesu ro ibo gimowameai, ‘Nio edi owera to utura-dioumo io mo nou se ie.’71Neio atu se ina nato gutura-rimo ibo, ‘Nedi dubu ro ubauba owera nakara se tutura-die, ina mabu boira nimo ro ubauba na-nemosora-dumo? Nu nimo ro simara gare to noti nemororowai-dumo!’