Kaiwo Riwangsoai7
1Nehu kaisungne waune, rukepang nehu kaiwoaririne,tuti borara fianai aino yemi wau we narine, na enemurorongwai.2Rukepang fianai aino yemi wau we narine ambori barang,boitawang nehu kaiwo aunaune toyario boitawang uremu kamieiwa suru.3Wora nehu kaiwone kai na waramu kikehawa,tuti woi na enemurorongwai.4Modu we awaifoi boyo, “Rorohuwing diwau!”tuti modu we waitawangnafoi boyo, “Nehu munurorong diwau”.5Ambori ureitawang wau weru wiwing dirufoi,tuti weru wiwingno wiro nemu wiwing dine kaha, mano wewori enemurorongwai.6Na diru bei,yeti to boriei na wonggang kaititairuhifo na nehu munufoi,7na arikang esowaworuai mano wiro ewaitawang turura kaha fosa mani,yeti bariboai mano wiro enetituai kariri neo mai kahafoi manei niayai rahangsa,8i da kutu rangfoi,da to katai wiwing dirufoi minohi nayafo,9na kutu ramindena, rerai we diru,na diru mamantitifo.10Mayeai yeti wiwing manei da ma kenggung bariboaifoi,wiwingfoi sata ansung wiwing diru tuti enerorongfoi siangging paria,11i mani wiwingno da funomaifa tuti dapawaifa,awengfo wiro fanahang kaha na munufo,12katu mani da na rangrausi, tuti katu mani da na katai inontarai efau nayafo,da wa niayai na rang reafo demang we mang.13Ainanaya wiwingfoi fiaung bariboaifoi tuti niunahi,na wiro mimaya kahai, medu wei deyo,14“Rahida nini yohong korbani nunumi,ampefe ibai nehu kaiwo arerai we Yahwei kawuru ampa. Sea tarai feai watai na nehu munufoi we turang.15Nanai aino ira to boriei isera we wau,nina mani isobu wau ampa, ampefe roma turawa turampi.16Yau imainenang nehu fata yenanaifoi,na ireu kiamantatowarai na Mesiri.17Tuti nehu fata yenanaifoi ikafari kawuruana muri, gaharu tuti ai mamisio nunsai mamporifo.Ai muri18Ampefe roma turena ruhiai awao aha bua,tuti tuwe andeisei ruhiai.19Weo nehu mangnei wiro minohi na mununei kaha,dontai to katai wairoi,20kia doi aderi bei,rerai we embai nei kiai wori arahi daraberahi ki.”21I wewori bariboaifoi na kaiwo wawori,tuti yurai we weworiri na kaiwo mamisi.22Na tantuma bariboaifoi da riati,toyari sapio kari to katai mungnifo,tuti toyari inontarai webonggoio ewora awengfo na wai besi we sobu aiboifo,23donio wiro deitawana kaha we atofoi defaiti enerorongfoi,i netarai toyari romu sifo ahera to waiteparifo,tuti wiro niruainso karirafo kaha.24Ampefe nehu kaisung ne mea, metaramio yau,tuti metarami sauao kaiwo imadurai na borohune.25Dohonao enemurorongwai daria wiwingfoi ne rang foife,tuti dohonao kia wau roriati na ne rang kerirafoife.26Weo wiwing nini kawurua wedaya inontarai bitoya etawai tuti eharira,tuti kawurua wedaya mang bitoya paria emarareha.27Ra to ne munufoi mani ra to raimeri,ra to rorong mararehafoi.
The Seed Company