Kaiwo Riwangsoai26
1Toyari kawari na wemunudangfo tuti metang na kutu eting fitantanangfo,tonanai kontai inontarai mano wiro miaya we aunawi kahafoi, wiro mei we omi wei kaha.2Toyari romu sinsumiri tuti romu anggadi baya usifo towana-tonina tuti wiro uminohi na kahofafo kaha,tonanai kontai kaiwo kangganifo wiro tete inontarai mano wiro dohong sarawa kahafoi.3Kudanei mani rubati tuti keledainei mani rabiti na wai na rahanangfoi,tonanai kontai inontarai mano wiro miaya we aunawi kahafoi mani boi kurungfoi na aiboi.4Wiro roa we inontarai mano wiro miaya we aunawi kahafoi, toyari ne kaiwo bonggoi medurafo fanai,ambori wiro nemutarai kariri kaha.5Roa we inontarai mano wiro miaya we aunawi kahafoi kariri ne bonggoifo,ambori dohonao deitarahio mantauni sewaine.6Mandoni dino demi inontarai mano wiro miaya we aunawi kahafoi we deisaha kaiwo arera mani,toyario ferangkutu mantauni awengfoi tuti dunung fi memu.7Toyari inontarai mano fiaya, ne aweng wape fananahang wiro wefia kaha,tonanai kontai inontarai mano wiro miaya we aunawi kahafoi medu kaiwo riwangsoafo.8Womi we inontarai mano wiro miaya we aunawi kahafoi mani wiro wefia kaha,netarai toyario kamieifoi kepang na kartafelifoi ampefe wiro defai kaha.9Inontarai mano wiro miaya we aunawi kahafoi medu kaiwo riwangsoafo mani wiro wefia kaha,netarai toyari inontarai mano meyeru fiating ababo disang warangfoi.10Mandoni dino demi inontarai mano wiro miaya we aunawi kahafoi tuti inontarai aisei mano dama tuti dawaha we uru fi mani, i ambori niari inontarai bitoya esobu dadira,netarai toyari inontarai mano dana funomai tuti inontarai bitoya ewe kahai.11Inontarai mano wiro miaya we aunawi kahafoi niari ne bonggoifo pampang,toyari fiawera daraberahi dang ne mamutafoi aha.12Boti inontarai mano deitarahio mantauni sewai,bounauwi mani dadira sewa weru bounau inontarai mano wiro miaya we aunawi kahafoi.13Inontarai mano ureng marirafoi niayai na munufo terai,medu deyo, “Singa manei niayai na borieifo, dohonao kiri yau na rang rabuangfe.”14Toyari rahutu dari na ne engselifoi,tonanai kontai inontarai mano ureng marirafoi bebariri na fata dena naifoi.15Inontarai mano ureng marirafoi sa warangfo rarang rewangguaifoi,wape wiro miaya we yuai warangfo to borongfo kaha.16Inontarai mano ureng marirafoi deitarahio mantauni dino sewai sewa weruinontarai ituo itoroa na maifo.17Inontarai mano kiontai ria inontarai siai ne mamunafoi mani,netarai toyario inontarai mano tefu fiawera da funomai tarandaungfoi.18Toyari inontarai wefiauwou danaato denggararu tuti ming inontarai,19tonanai kontai inontarai mano tetofa inontarai siai,tuti medu deyo, “Manta imei teraifa.”20Masino aimasa kai mani, adia fafe,masino inontarai mano deiriri funong inontarai bereri mani, mamunafoi fiotourai.21Toyari ke niari karaiseng denggararu tuti aimasa niari adia denggararu,tonanai kontai inontarai mano serawe kaiwo mani niari adia mamunafoi denggararu.22Airiri funong inontarai mani toyari fiang maing,ampefe inontarai emaya we etongnaifa.23Toyari babeu kahofao tiabau tofarai tabuni na peraki ambori denteng,tonanai kontai madu kaiwo mamisi wape nemirorong kerira.24Inontarai mano enerireuafoi medu kaiwo mamisi,wape sang neo karirafo na enerorongfoi.25Masino ne kaiwofo fanahang mani, wiro roasoi fanai,weo enerorongfoi sefangna karirafo.26Masino dediwa enerirewafo na tetofa,wape inontaraifoi kiai ambori ewati fi karira niarifo.27Mandoni dino sirai kamirei we inontarai siai mani, mantauni ambori saukahari,tuti mandoni dino dedoi kamiei we wiatawang inontarai siai mani, kamieifoi ambori daraberahi wiatawangni aha.28Mandoni dino tetofa inontarai siai mani, enerireu inontarai nani,tuti kaiwo sefangna tatofa mani kia karirafo.
The Seed Company