Kaiwo Riwangsoai25
Salomoi ne kaiwo riwangsoai siai fea aha
1Kaiwo awai feai aha na mananu Salomoi, neo Hiskiai mananu Yehudai ne mano eru fi weifoi etoi riwangnai aha finina.2Inontarai nesa efiai Allai, weo niari fiea mani Dediwarai werusa,wape inontarai nesa efiai mananu nesa weo kaiwo dadirafo mani eteisaharai kasau.3Toyari rora faisi ne dedaifo tuti nunei ne berorongfo,tonanai kontai wiro tawaitawang mananufoi fio enetituaitafo kaha.4Ufirurang rarikafoi weru perakifoi,ambori mano niari perakifoi, niari fio mahikai sewa fea.5Tonanai kontai mantainau eharira fosa wiro tuasa etohong aunau karirafo we mananufoi fanai,ambori mananufoi ne parentafo papayai na kutu niari neo maifo.6Wiro ruai enemurorongwai na mananu arongfo fanai,ete wiro nari wau nemutarai toyario inontarai fiabai na kutu boari ria inontarai baba fosa fanai.7Weo mananufoi demi wau munohi na katai inontarai baba fosa mani, mahikai sewa werudohong mamaya wau na earomifo.8Masino boti inontarai siai manei niari fiea mani, wiro wukahera ro we inontarai mano kiutu kaiwofo we boisaha fianai aino botioafo tuti bonggewa inontarai nani fanai.Dohonao mumayafe, masino inontarai siai manei deinawiai weo wauno wiro modu mai kahafe,fianai aino nari ahane?9Masino nemu maniwowiri manei mukasou muru mani, mumadu ruhiai na muru terai,tuti dohonao boisaharai we inontarai fau fosa kariri ne kaiwo adiwarafo fe,10ambori wiro enerireu wau kaha, na kutu taraoai we wau modurifo,tuti wiro deiriri karirafo we wau kaha.11Kaiwo inontarai manei medurai tete ne rahidafo mani,toyari aibong emasi na rewanggoai peraki.12Kaiwo uarai na inontarai mano sewaifoi mani ne harga dedai, toyari emasi keisori tuti fimarandinai emasiwe inontarai mano tarangfo miaya we taraoaifa.13Toyari mereha denunanang dohong wawasa na kutu wemunudangfo,tonanai kontai we mangfata mano enerorong pepayafoi,i dohong faraise we inontarai mano yufi weifoi na kutu demifo.14Kafafe tuti wanang unayane, wape metang bereri,tonanai kontai we inontarai mano dererai we dohong fikahutufo, wape wiro dohongna kaha.15Masino enemurorongwai tawani mani, nari inontarai mano wemambiriufoi yoaso wau,tuti masino taperemuwai medu na kaiwo fanahang mani, inontarai mano nungkamiei mitubarufoi nariria wiro dapa wau kaha.16Masino wobu aniwa ne maing mani, wiro bang fuba karera fanai,dohonao momosi paria tuti mayeai mani momutafe.17Wiro ro pampang to nemu maniwowiri ne munufoi fanai,dohonao deuwau tuti wiro miaya we wau kahafe.18Masino modu wiro mai kariri nemu maniwowirifoi we inontarai mano kiutu kaiwofoi mani,nemutarai toyario aiboi, umbe sondu tuti ato reisao miungni.19Enemutawang inontarai mano wiro roasoi kahafoi we fiata wau na kutu obu dadirafo mani,nana mani netarai toyario mama fiang na deremu bereri tuti ro na awemu pirahai.20Rohi rarung faraise we inontarai mano enerorong fituayai mani,toyari bisu ne ansungfo na kutu daunanangfo,tuti wari cuka to ne kahaifoi.21Masino inontarai mano enerireu waufoi wewisi mani, bohong fiang feai dang,tuti masino arong tataha mani, bohong mereha feai dunung.22Weo na tonanane mani, wau nariria deitawangnai we dohong sarawaifa tuti mimaya,tuti Yahwei ambori dohong bera nemu bengwa.23Toyari kafafe memantiti wedaya metang,tonanai kontai taperemio deiriri fi adiwarafo we inontarai bitoyafoi mani, wedaya inontaraifoi kesou.24Mesiri wau nayai na munu borieifo mani, mahikai sewa werumunohi ria wiwing mano memuna biriufoi.25Toyari mereha deunanang we inontarai mano arong tatahanei,tonanai kontai taramio kaiwo mahikaifo da na katai wairoifo ma.26Inontarai mesi mano enerorong finahang tuti suang we inontarai kerira mano sahatawanifoi,i mani netarai toyario inontarai mano niari rarika we mereha urengno mirarebanafoi.27Bang aniwa ne maing bitoya karera mani, nanai wiro beng kaha,tuti rurai we wobu kaiwo fiai bitoya mani, nanai kontai wiro beng kaha.28Inontarai mano mantauni wiro sawani na ne kasoufo kaha mani,netarai toyari bendario wiro ne pari wore dariweduari.The Seed Company