Kaiwo Riwangsoai24
1Wiro enemurorong kerira we inontarai mano eharira fosa ene fifo fanai,wiro maya we wemaniwowiri riasa fanai.2Weo manta enemitituaitai we etahatawang inontarai siai,tuti eboromi rawafo manta emadu we todoni enari inontarai siai esobu dadirafo.3Munufoi baungni na awaifo,na nemitituai kariri neo maifo mani munufoi doa pepayai,4tuti na nemu boitawangnai werorongfowau ambori woni fianggeng mahikai tuti ne harga dadai nemu munufoi ne rorongfo.5Inontarai mano sewaifo mani wemambiriu,i mani wemambiriu sewa weru inontarai mano ne mambiriu we niari fi na maifoi.6Nanai aino wobu wiwiaing akawuruwori momuna ki,tuti ambori wobu wawoafo, masino taramuo aunau na mantainau bitoya.7Inontarai mano webonggoifoi dadira we deitawang kaiwo awaifo,tuti wiro fiobai borong we medu fio beng we inontarai na kutu fianduhi riasafo.8Mandoni dino enetituai kariri neo karirafo pampang mani,inontarai ambori esahui we mano tetofa biriu dine.9Fi kiaio inontarai webonggoifoi samafo mani kia sasari,tuti inontarai mano deikaherawa mani ambori inontarai enemirirewi.10Masino wiro murising kaha na kutu dadirafo mani,wiro nemu mambiriuwa fea kaha.11Masino eha inontarai mano wiro dohong sarawa kaha manei we emuni mani, tawing inontarai nani,inontarai mano sobu aiboi mararehafoi masino wiro dohong sarawa kahafoi mani, wiro tuati mireha fanai.12Wiro modu fafiarai boyo, “Wiro yeroanso inontarai nani kaha!”Boitarahio Allai wiro deitawang fi kiaio nariri nani kahae?Boitarahio wiro Deti kariri wau tuti wiro Deitawang fio enemutituaitawa kahae?Wiro tonana kaha, I ambori dohong berahai kariri fio nari kawuruampo.13Nehu kaisung ne wau, bang aniwa ne maing weo denteng we wau,tuti aniwa ne maingnei memisi we boromuwai.14Tonanai kontai awainei mani, denteng we nemu barangfo,masino nemu awai mani, ambori wobu neo bengfo na rahida bo da ahama wani ki,tuti fio enemutawangnafo ambori wobuaifa.15Wiro nari toyario inontarai kerira mano sang neo karirafo we kiamanana inontarai mesifoi ne munufoi,wiro tota ne katai niayai naifoi fanai.16Weo masino inontarai mesifoi sawai we beitu, ambori doari aha,wape masino inontarai kerirafoi saurarang neo karirafo mani, wiro doari ahang kaha.17Wiro furaise fanai masino nemu aitetafoi sawaifa,wiro enemurorong mirising fanai masino sobu karirafo,18ambori Yahwei wiro deti wau mani weinontarai karira tuti enerireu fio nariwa paria,tuti wiro Dohong aiboi we nemu aitetafoi kaha.19Wiro kasou weo inontaraio enari karirafo fanai,ete wiro enemurorong kerira we inontarai mano eharira fosa fanai.20Weo wiro mahikai feai we inontarai eharira nesa na rahida bo da ahama wani kaha,inontarai eharira fosa mani ambori enetarai toyario padamarang fefe.21Nehu arikang ne wau, roaso Yahwei tuti womi wei tuti mananufoi,wiro kontai ria inontarai mano etapa surufo fanai.22Weo unari neo karirafo na tantuma,tuti wiro inontarai manei deitawangna kaha, aiboi fianai aino ambori urohongnai we inontarai mano etapa surufo.23Kaiwo siai na inontarai mano sewaifoi sonina.Masino wiro boarahana kaha mae tauwe manei, nana mani wiro beng kaha.24Ampefe masino modu we inontarai kerirafoi weo wiro niari sarawa kaha,nana mani inontarai fosa ambori eteikanggani wau, tuti kaiwasa fosa enemirireu wau.25Wape masino bohong aiboi we inontarai mano dohong sarawafoi mani, inontarai ambori esomi we wau,tuti wau ambori wobu moang.26Ampefe kutu kaiwo mani modu na mai, nari inontarai enemirorong mirising toyario faung nemu maniwowiri,ambori enemuwawuti.27Nari romi tuti tanang fiang akawuruwo,paria nemu fi ru na wanaifa kai,mayeai baung nemu munufoi.28Wiro modu funong inontarai siai fanai weo niari sarawaifa, masino wiro boti tera kaha,tuti wiro kaiwo tatofafo dariai na boromuwa kariri i fanai.29Wiro modu boyo, “Deikanggani yau kawuru ampa, ampefe yau kontai imeikanggani aha.Yau ambori yohong berahai wei aha, toyari fio niari we yaufo.”30Na rabuang bo ira na romi inontarai ureng marirafoikontai romi angguri inontarai mano wiro enetituai kariri neo mai kahafoi,31yeti romifoi kawurua sifuo ninoi weababo,ne kahofafo mani ninoi sa funomafoi tebung weduarai,tuti ne worefoi miru kawuru ampa.32Yeti sauaraifa tuti enehutituaitai kaririaifa,tuti isobu aunau na fio yetioai ninaifa.33Masino imadu yeyo, “Ah, yena kuteai akawuruwo, urehu mamong,iminohi ikafa warahu tuti yena kuteai terai.”34Na kutu yenafo, na tantuma nehu pari fi, toyari inontarai kerira da kawuru ma kia nehu fianggengfoi kiai,tuti nehu fianggeng demoyara kaha, toyari inontarai mano na nefi mamunafo dewa nehu fianggengfoi kiai weru yau.
The Seed Company