Kaiwo Riwangsoai16
1Inontarai enetituaitai na enerorong fio de medurafo,wape taperengfoi medu fio Yahwei eneoafo.2Inontarai eteitarahio era na rangbo dohong arang maifoi,wape Yahwei dino titua kariri nemirorongnei denteng ete bererie.3Bohong fio nariwa kai we Yahwei,ambori fio tamawa wobuaifa.4Yahwei niari fianggengnei kiai kariri neo Enetituaitafo,kontai Meinenang rahida we dohong aiboi we inontarai kerirafoi.5Inontarai mano tewafoi Yahwei enerireuwi paria,tarai, inontarai nani wiro kiaharai weru aiboifo kaha.6Enemurorongwai pepayai tuti enemuwawu Yahwei mani, ambori Deyai nemu sarawane.Roaso Yahwei tuti womi wei mani, wau wiro nari ne karirane fanai.7Masino Yahwei Miaya we manei ne rangfo mani,Niari inontarai nani ne aitetafoi wiro ukasou uru ahang kaha.8Inontarai mano ne pari fi, wape niari neo bengfo mani, mahikai sewa weruinontarai mano ne ra bitoya, wape warang mai kaha.9Inontarai nesa enemitituai kariri rang ambori eranaifoi,wape Yahwei dino Deinawi rang bodoni dino eranaine.10Na mananu borongfo medu kaiwo kutuai na Allai,masino kiutu kaiwo mani, wiro dohong sarawa kaha.11Titua maraba tuti sayayai na mai mani, Yahwei miaya wea,Andino niari kamieinei kiai we titua maraba tuti sayayai na awayang fine.12Mananu nei enerireu inontarai mano niari karirafo,weo ne parentafo ambori papayai, masino inontarai enari neo maifo.13Kaiwo maifo dariai na boromio dohong mananu nei mirising,tuti enewawu inontarai mano medu antufoi.14Masino mananunei kesou fuba mani, wedaya inontarai sobu aiboi mararehafo,wape mano sewaifoi sona mananufoi enerorongfoi.15Mananu ureng mararising mani, wedaya inontarai etarang,tuti ne bengfo mani, toyari kafafe dohong metang we fitatangne.16Obu awai mani mahikai sewa weru obu masinei,tuti iriai we tafu kaiwo werorongfo mani, mahikai sewa weru perakinei.17Inontarai mano warang mai nei mani, da waroi weru rang kerirafoi,mandoni dino deitawang ne rangfoi mani, dewawu mantauni nuaninufoi.18Tewa paria nei mani, wedaya wobu karirafo,tuti wau ambori tawai, masino enemurorong dedai.19Arang na nemirorong tewawa ria inontarai mano ne pari fifoi mani, mahikai sewa werura ria inontarai mano etawa tuti obu fieai na fio etawarafo.20Inontarai mano enetituai nari kaiwo aunauwai weifo mani, ambori sobu mai,tuti inontarai mano yoaso Yahwei, ambori sobu maifo.21Inontarai mano tefu kaiwo werorongfo mani, ahui we inontarai sewai,tuti medu na mai mani, ne kaiwofo eroasoai.22Nemitituai kariri neo maifo mani, toyari mereha dohong arang we inontarai mano sewaifoi,wape inontarai webonggoifoi mani, sobu aiboi na mantauni ne bonggoifo.23Inontarai sewaifoi mani, enetituai kariri neo maifo akawuru wori medu ki,tuti fianai aino medurafo mani eroasoi.24Kaiwo manangfo mani toyari aniwa nemaing,mamisi we nemirorongnei tuti we rawang we neinane.25Inontaraifoi deitarahio ne rangfoi mimoya,wape reafo da we mararehafoi.26Inontarai mano wewisifoi, yu fi na mambiriu ambori dampi ki,weo enengfoi wiarora ampefe denggewari we yu fi.27Inontarai kerirafoi yurai pampang sera we rang we niari karirafo we inontarai siai,tuti kaiwo dariai na borongfo mani toyari adia niunung inontarai siai.28Inontarai mano tetofanei mani, wedaya mamuna,tuti mano deiriri funong inontarai mani, niari maniwowiri uwe boyarifo suru ukatate suru.29Inontarai mano warangansumafoi wewori tuti tetofa ne maniwowirifoi we niari sarawaifa,tuti kiari to rang kerirafoi30Mandoni dino tetofa na mei urengfo mani, sang neo karirafo,mandoni dino miri bororawa mani, niari neo karirafo kawuru ampa.31Numi baibua mani we sapewi mampofa denteng paria,inontarai mano da na rang mesifoi, ambori sobui.32Inontarai mano sawanifoi mani, denteng sewa weru mano wemambiriu sewafoi,inontarai mano wiro kesou ahera kahafoi mani, wemambiriu sewa weru inontarai mano dewa aitetafosa ene bendarifo.33Inontarai eteitarahio ehabi onde mani deinawi we ehutu kaiwofo,wape kaiwo kutuai na ondefoi mani, da na Yahwei terai.
The Seed Company