AGBÃ19
1Wɛrɛba wɔ nsɛgbai nna iɣɛrɛlɛ ɔɖo kadzunisɛĩ ladze.2Ɔdzini wɔ ame inɔkpa na iilɛ,ɣee iilɛ sɔ ɔturi aakarara fiɛ ɔ̃ayu ɔri.3Ɔturi adzunisɛ̃ra nsɛ anina ara i ɔ̃ ngbã iso,ɣɛɛ ɔsɛ ɔna sikpã i Bosate iso.4Karana sɛ kakpadzɛ̃ malaa gbodzoo kabɔ ɔturi,ɣɛɛ wɛrɛba ɔlaa sɛ ɔrui ɔnyua wũ.5Aɖansiɛ ladze iibawe sɔ maibakpadzɛ̃ wũ kutsue,fiɛ nwɔ nsɛ ɔla mila iibawe fala kere.6Maturi gbodzoo sɛ mabara ara si mabo ɔɖeisoi anɔ,fiɛ ɔturi biara sɛ ɔpia kulaa ku nwɔ nsɛ ɔtã maturi ara.7Wɛrɛba manyiibi ɔɖuɖu sɛ marui manyua wũ.Kumɛɔ ame i ɔ̃ malaa ana kɔraa sɛ mare wũ kama ne.Atoasɔ ɔto ɔpia kubɛ ɔɖegu ma ika ne,kuira iisɛ ibɔrɛ ne ame.8Ɔturi wɔ nsɛ ɔtsue iwola sɛ ɔɖɔɛ ɔ̃ mɔmɔ;ɔturi wɔ nsɛ ɔnyɔ karɔ̃inɔ lɛ ira nyaa sɛ ɔna isaruɛ.9Aɖansiɛ ladze iibawe sɔ maibakpadzɛ̃ wũ kutsue,fiɛ nwɔ nsɛ ɔla mila to ɔ̃awɔ.10Iikote sɔ kadzunisɛĩ aɖe kayi ku ɔmɛrɛ̃,fiɛ iasɛ iaɖe sɔ ɔsande aaɖe ɔɖeisoi i makpakpaturi iso!11Ɔturi iwola nsɛ itã ɔɣara sofiɛ kuwarɛ kuɖe kutã wũ si maɣɛrɛ wũ kɔraa ne, ɔ̃isɛ ɔkpa anya.12Igara sikpã ina se lɛ dzata sifafã awe;ɣɛɛ ɔ̃ nnyainyɔ ɔse lɛ kuɖobiobio lopɛ kufere i sikua iso awe.13Ɔbi wɔ nɖe kadzunisɛĩ ɖe itikpi ɔtã ɔ̃ ɔse,fiɛ ɔre wɔ nɖe kalɔdze se lɛ kado wɔ nto ɔpɛ ɔ̃ito ɔnyua awe.14Ayo gu karana ɖe kaɖekɔ̃ ga lobɔrɛ i ɔbi maɣese kɔrɛ,ɣɛɛ ɔre wolai ne, ɔbɔrɛ i Bosate kɔrɛ.15Ndã ibara sɛ itã marɛ mirɛ siare,fiɛ dãdze ne, kukã nsɛ kukpɛ̃ wũ.16Ɔturi wɔ nsɛ ɔbara i mmara iso sɛ ɔsɛ ngbã,ɣɛɛ ɔturi wɔ loiwarɛ mmara, to ɔ̃akpi.17Ɔturi wɔ nsɛ ɔbara mawɛrɛba kayiribielea sɛ ɔnyɛ ira ɔtã Bosate.Ne Bosate to ɔ̃atã wũ kuso i nnɛ ɔbara iti.18Kpadzɛ̃ fɔ ɔbi, ala ne ame i ɔriinyɔ pia,ɣɛɛ daabara kuira nɛ abie wũ kukpi.19Ɔturi wɔ nsɛ ɔna sikpã malamala aafɔ ne kuso,alasɔ si afɔ wũ ne, ato aaledza ibara ngbɔ ana.20Kã kuka atsue si afɔ asɛra apia,iyɔ kawirikɔ̃ ne aato aatsue iwola.21Ɔturi sɛ ɔbara adzuni gbodzoo,ɣɛɛ nnɛ i Bosate sɛ ɔbie nsɛ iba i ne ame.22Ɔturi kubie nɖe ɔnukuare kuɖɔɛ.Ilɛ si aɖe wɛrɛba iɖo sɔ aaɖe ladze.23Bosate kunigã sɛ kutã ngbã.Iyɔ ɔturi aawe i isobuɛ ame, iraboa iibabara wũ.24Si dãdze ɔpia kɔrɔ̃ i irɔi ame ne,ɔ̃ibaɖi kɔ̃ ɔsu ɔpia i kanya ana kɔraa!25Pɛ aɣiãrase, kadzunisɛĩ to ɔ̃atsɛ iwola itsue;nyagalagu ara karɔ̃inɔse, ɔto ɔ̃atsɛ anɔikpa.26Ɔbi wɔ nsɛ ɔbara ɔ̃ ɔse ɔtile fiɛ ɔsɛ ɔsa ɔ̃ ɔnyi ɔɖi iyo ne,nwɔ nsɛ ɔbɔ kunuarɛ gu isopa ɔɖe.27Wũ ɔbi, si anyua atsueikã araite ne,aato aasɛnɛkɛ̃ i inɔkpa atɔ̃me kɔrɛ.28Aɖansiɛ ituripɛ̃ sɛ ɔbara aɣiãra i itɔ̃me nɛ loya iso;ɔturi nyanyariã sɛ ɔɖɔɛ itɔ̃me nɛ loikote iɣɛ.29Kutsueikpadzɛ̃ se kutã maɣiãrase;ipɛ se itã madzunisɛĩ kama.
The Seed Company