AGBÃ20
1Ndã sɛ mibɔ aɣiãra, ndã kpokporoa sɛ mibɔ imami.Mma nsɛ manɛ fiɛ misɛ mikɔ ma miyura iiɣe iwola.2Igara sikpã teterea ina se lɛ dzata sifafã awe;ɔturi wɔ nsɛ ɔpia wũ sikpã sɛ ɔyura ɔ̃ ngbã.3Ɔturi wɔ nsɛ ɔkpɛ so ɔɖi i kulu ame ne, ɔsɛ ɔpia so kuwarɛ,ɣɛɛ kadzunisɛĩ biara sɛ ɔlɔ kalɔ mala.4Dãdze iisɛ ɔkpɛ̃ ɔwĩ ku ɔkpɛ̃wi;ne ɔso ɔraɖui ɔsɔrɛ̃wi ne ɔ̃isɛ ɔna kuira ɔsɔrɛ̃.5Ɔturi awune adzuni se lɛ ɔpo wodoroa,ɣɛɛ ara karɔ̃inɔse sɛ ɔɖi wã ɔbɔ.6Maturi gbodzoo sɛ maɣɛ sɔ maɖe manukuarese,ɣɛɛ lɛ aanya nukuarese ɔwɛ̃?7Ɔturi bɔlɔlɔa sɛ ɔsɛ ngbã mɛ nna iɣɛrɛ;kusɛkusɛ aaba i ɔ̃ mabiama iso.8Si igara ɔsɛ i ɔ̃ iyara iso si ɔɣɛ itɔ̃me ne,ɔsɛ ɔfɛ fiɛ ɔnya aranyanyariã ɔɖuɖu ɔɖiite.9Nna loawo ɔɣɛ sɔ, "Lokpa i ɔtu ame;losekele fiɛ ikpi na me iso."?10Akerera wa loiyi gu ara isusu ne loiyi ne,Bosate ɔtsiri wã anyɔ ɔɖuɖu.11Ɔbiɛtɛ kɔraa ne, ɔ̃ arabarara masu matsue wũ,si ɔ̃ nsɛgbai lɛ gu si mikote.12Kutsue gɔ nsɛ kunɔ ara gu inɔmi nɛ nsɛ inya ara ne,Bosate lobara wã anyɔ ɔɖuɖu.13Daaɖɔɛ sirɛ si iiɖe ngbɔ ato aamɔ wɛrɛba.Busi anɔmi si araɖea aawe-ɔ.14Raɣadze sɛ ɔɣɛ sɔ, "Kuɣa iilɛ, kuɣa iilɛ!"Iyɔ si ɔrui ne, ɔsɛ ɔle so i kuɣaiɖe iso.15Sikãrɛtɛa pia gu ata wa lofɔ kuɣa gbodzoo pia,ɣɛɛ kanya ga nsɛ kaɖi inɔkpa kaɣɛ ɖe ikɛrɛra nɛ lofɔ kuɣa iɖo fiɛ iibɔ.16Fɔ ɔturi wɔ loya i ɔfɔ kuso kama awu,si asu apia awoba ame si ɔya i ɔrɔ̃go wɔ ɔ̃iɣe kama.17Aɖera wa masɔsɔla ɔturi mafɔ ne, asɛ awe nwɔ losɔsɔla ɔturi ɔmɛrɛ̃,ɣɛɛ ne kama ne, kutai nsɛ kuyi wũ i kanya.18Bara adzuni iki i kuka sɛɛ ifɔ tɔtɔ ame.Fɔ kuka gu isɔ̃ra si ato aakpɛ̃ kakpã.19Ituriraɣɛse sɛ ɔɖi itɔ̃me wɛrɛa ɔɣɛ;ne ɔso daabara mawɛ̃ ku minukuarese.20Si ɔturi ɔgbarĩ ɔ̃ ɔse ɣee ɔnyi ne,ɔ̃ ɔkaniɛ aanyi i idududu kpirikpiria ame.21Kaɖekɔ̃ ga mayasoiso mafɔ ku karɔ̃kasɛkɔ̃ ne,kusɛkusɛ iisɛ kuwe i ne ame ku kawirikɔ̃.22Daaɣɛ sɔ, "Loatã-ɔ ikpi nɛgbe kuso!"Nyɔ Bosate ɔri, ne ɔto ɔ̃aɖi-ɔ.23Bosate ɔtsiri akerera wa loiyifiɛ isusura nɛ loiyi iisɛ iɣɔ wũ anɔ.24Bosate nsɛ ɔte ɔturi kukpa kanekɔ̃.Nda ngbɔ ɔturi aawo ɔ̃ mɔmɔ nsɛgbai karɔ̃ ɔnɔ?25Kata kaɖe sɔ ɔturi aasu ira ɔsɛ ise ɔtã Ɣaa ku siwafiɛ ne kama ɔ̃aba ɔ̃abara adzuni i ndamu mɛ ɔkã iso.26Igara wolai sɛ ɔfɛ fiɛ ɔnya maturi nyanyariã ɔɖiite,fiɛ ɔsɛ ɔtã manene ma iso ku kamɔipɛ kubore.27Bosate ɔkaniɛ sɛ ɔsa ɔbo i ɔturi awune siwarã ame;ɔsɛ ɔfiɛ ɔfere i ɔturi kame ame.28Nnyainyɔ gu ɔnukuareiɖe nsɛ atã igara kaɣɔ;fiɛ iki i kuɖɔɛ ame ne, ɔ̃ sigaraiyara ɣɛ teteree.29Maporoporoi ikɛrɛra nɖe ma ɔle,siɣaa i iti nɖe ɔkpakpa kuwarɛ.30Akama gu agbɛ sɛ afore iranyanyariã aɖi,fiɛ ipɛ sɛ iɖi nsɛgbai nyanyariã i ɔturi ame.
The Seed Company