AGBÃ18
1Ɔturi wɔ loisɛ ɔɖɔɛ maturi ne ɔ̃ ɔnɔwɛ̃saã ɔkpɛ kama ɔsɛ ɔti;ɔ̃isɛ ɔkã kuka kukuwɛ̃ atsue.2Kadzunisɛĩ iisɛ ɔna isoɣɔ kuiwɛ̃ i ara karɔ̃inɔ iso,ɣɛɛ ɔsɛ ɔna isoɣɔ i ɔ̃ mɔmɔ adzuni gu nnɛ ɔ̃aɣɛ iso.3Si ɔturi ɔbara aranyanyariã ne, masɛ manyɔ wũ pupurii,fiɛ si kunuarɛ ɔmɔɛ̃ ɔturi ne isopa ka loaba.4Ɔturi awune kanya ame atɔ̃me ne, ɔpo wodoroa aɖe,ɣɛɛ iwola itubiɔ ɖe ngbegɔ i ndu sɛ mibɔrɛ pipiipi.5Iilɛ sɔ aaya i ɔtilese kamaɣee awarã ɔturi wɔ loiɣɛrɛ apia i atɔ̃mekaɣɛkɔ̃.6Kadzunisɛĩ kanya ame atɔ̃me sɛ abɔ wũ kulu,fiɛ ɔ̃ ikaɖe sɛ ibɔ ipɛ.7Kadzunisɛĩ kanya nsɛ kapia wũ i iwɔ ame,fiɛ ɔ̃ kanya ɖe kata ga nsɛ kaɖi wũ.8Ituriraɣɛse atɔ̃me se lɛ aɖera wa mba ɔmɛrɛ̃ awe;asɛ abo ta ɔturi mina kame ame.9Ɔturi wɔ lobara karɔ̃fɛfɛ̃ i ɔ̃ karabara ame ne,raninase ɔnyii ɔɖe.10Bosate iyere ɖe adzarara wa mba ɔle,ɔturi bɔlɔlɔa sɛ ɔtere ɔkɛlɛ wã ame fiɛ ɔsɛ ɔwe i kaɣɔ ame.11Ranase ɔmagɛ̃siare wɔ mba ɔle nɖe ɔ̃ karana,masɛ manyɔ kã lɛ ibere kɔlɛa ɔkpã wɔ nto ɔdzuɛ̃ wũ awe.12Fiɛ ɔturi aakpase ne, iteso sɛ iwe i ɔ̃ ame,ɣɛɛ karɔ̃ibɔso sɛ iba fiɛ kuwarɛ.13Ɔturi wɔ nsɛ ɔtã itɔ̃me mmuai gɔ ɔ̃ikã atsue ɔnɔ tɔtɔ ne,ne nɖe ɔ̃ adzunisɛ̃ra gu kunuarɛ ne.14Ɔturi siwarã nsɛ simɔɛ̃ wũ sila i ɔnyɛ ame,ɣɛɛ si siwarã ɔfɔ igbɛ ne, ɔriinyɔ siina.15Nwɔ nsɛ ɔnɔ ara karɔ̃ sɛ ɔna inɔkpa;fiɛ ɔturi wolai sɛ ɔbie inɔkpa.16Ɔturi karatã sɛ kabusi ɔri katã wũ,fiɛ isɛ ikɔ wũ ikɛlɛgu maturi nyaa anɔ.17Ɔturi wɔ nsɛ ɔɖe katɔ̃ ɔkɛlɛgu ɔ̃ itɔ̃me sɛ ɔte lɛ nwɔ ɔkpɛ loya;gbɔgbɔɔgbɔ ɔturi mama ɔba ɔ̃akarɛ wũ atɔ̃me.18Kareremi sɛ katã kulu ɔɖaɛfiɛ kasɛ kakpura mma nto makpɛ̃gu so teteree ndɛ̃.19Ɔnyii wɔ maɣɛrɛ ne ɔɣɛgu so ɔɖo ɔmagɛ̃siare wɔ mba ɔle,fiɛ kulu ibara ba ɔle lɛ ɔlekasɛkɔ̃ kuyogodɔ̃ gɔ mapia ibɔrasɛ̃dziri awe.20Ɔturi kanya idziribi to iatã wũ ɔmifiɛ nnɛ ɔɣɛ to iaba i ɔ̃ ngbã iso ɔmi.21Kukpi gu ngbã pia i ɔnyagɛmi nrɔɔ̃ ame,fiɛ mma loɖɔɛ ne to maaɖe ne idziribi.22Ɔturi wɔ lona ɔrɔ̃go sɛɛ ɔyiri ne, ɔna ira nɛ nlɛ,fiɛ ɔsɛ ɔna nnyainyɔ ibɔrɛ i Bosate kɔrɛ.23Wɛrɛba sɛ ɔpɛ nrɔɔ̃ itã kayiribielea;ɣɛɛ ranase sɛ ɔtã itɔ̃me mmuai ku ada.24Kulaa gbodzoo ipia sɛgu kukpi;burise ɣɛɛ ne, ɔsɛ ɔpɛ ɔmatã ɔɖo ta ɔnyiibi mɔmɔ kɔraa.
The Seed Company