AGBÃ13
1Ɔbi wolai sɛ ɔkã ɔ̃ ɔse araite atsue,ɣɛɛ aɣiãrase iisɛ ɔkã iyira atsue.2Ɔturi sɛ ɔɖe ara sɛɛ ɔbɔrɛgu i ɔ̃ kanya atɔ̃me adziribi ame,ɣɛɛ nwɔ nna ɔnukuare sɛ ɔbie amumuɔ ibara.3Ɔturi wɔ lokososo kanya sɛ ɔdzuɛ̃ ɔ̃ ngbã,ɣɛɛ ɔturi wɔ nsɛ ɔɖe akaɖe malamala kere sɛ ɔbo i imɔrɛ̃ ame.4Ara sɛ akpɛ̃ dãdze ɔkã ɣɛɛ ɔ̃isɛ ɔna kuira,ɣɛɛ ɔturi wɔ mba ɔdzegere sɛ ɔna ara gbodzoo ɔmi.5Ɔturi bɔlɔlɔa ɔtsiri mila,ɣɛɛ ɔtilese sɛ ɔkpadzɛ̃ kunuarɛ gu isopa ɔbɔ.6Ara bɔlɔlɔa ibara sɛ idzuɛ̃ ɔturi wɔ nna iɣɛrɛ,ɣɛɛ aranyanyariã ibara sɛ itã kpibaradze ɔrɔ̃.7Ɔturi ɔwɛ̃ ɔbara so ranase, ɣɛɛ ɔna kuira;ɔmama ɔbara so wɛrɛba, ɣɛɛ ɔba karana gbaã.8Ɔturi karana nsɛ kaɖi wũ i ngbã imɔrɛ̃ ame,ɣɛɛ wɛrɛba iisɛ ɔnɔ ifura kuiwɛ̃.9Ɔturi bɔlɔlɔa ɔtɔ sɛ ɔsa kukaakɔ,ɣɛɛ mato maanidza ɔtilese ɔkaniɛ.10Iteso ne, alu kere isɛ ibɔ,ɣɛɛ mma nsɛ makã kuka atsue kɔrɛ masɛ manya iwola.11Sikã dzɛ mana i nasikãmala ɔri iso sɛ siro mala,ɣɛɛ nwɔ nsɛ ɔwe inyɛ ɔsa sikã kanya kɛkɛĩ kɛkɛĩ ne, sito siaɣe sisia.12Ɔriinyɔ nɛ lofe kama sɛ itã ɔtu ibo,ɣɛɛ ɔturi kubie gɔ loba i kame ɖe kudziri gɔ nsɛ kutã ngbã.13Ɔturi wɔ lonyɔ kuka pupurii to ɔ̃atã ne kuso,ɣɛɛ ɔturi wɔ lowarɛ mmaraisi ne ɔ̃afɔ ne kuso.14Kawolai araite ɖe itubiɔ nɛ lotã ngbã,isɛ iɖi ɔturi ibɔrɛgu i kukpi kata ame.15Ara karɔ̃inɔ sɛɛ sɛ ibɔ anɔibo,ɣɛɛ maturi ma nna ɔnukuare ɔri sɛ ɔwe ɔle.16Kawolai biara sɛ kabara ara ku inɔkpa,ɣɛɛ kadzunisɛĩ sɛ kaɖi kã adzunisɛ̃ra kayi.17Kpabo ɔtilese sɛ ɔbo imɔrɛ̃ ame,ɣɛɛ ɔnukuare ɔturi wɔ mapia katɔ̃me sɛ ɔbɔ isosarɛ.18Ɔturi wɔ losɛ̃ ikpadzɛ̃ ifɔ ne siwɛrɛba gu kunuarɛ nsɛ aba i wũ iso.Ɣɛɛ ɔrere wɔ lofɔ iyira ne masɛ mapia wũ kuwarɛ.19Ɔturi wɔ kubie loba i kame ne, ɔsɛ ɔna isoɣɔ gbaã,ɣɛɛ madzunisɛĩ ɔtsiri ngbɔ maanyua aranyanyariã ibara.20Ɔturi wɔ nsɛ ɔsɛgu mawolai sɛ ɔtsue iwola,ɣɛɛ ɔturi wɔ lopia kulaa ku madzunisɛĩ sɛ ɔwe inyɛ.21Kukpakpi sɛ kutere kusiai kpibaradze,ɣɛɛ isaruɛ nɖe ɔturi bɔlɔlɔa kuso.22Ɔturi sɛɛ sɛ ɔnyua kaɖekɔ̃ ɔsɛ ɔ̃ mabi gu ma mabi,ɣɛɛ masɛ makɔla kpibaradze karana masɛ ɔturi bɔlɔlɔa.23Ɔwi ɔmɔi wɛrɛba kaputuku nsɛ kalɛ araɖea gbodzoo,ɣɛɛ ara idaabara i ɔri iso sɛ ifɔ araɖea ɔɖuɖu wamɔ.24Ɔturi wɔ loisɛ ɔsu ɔpɛdziri i ɔbi iso ne, ɔtsiri ɔ̃ ɔbi;ɣɛɛ nwɔ nsɛ ɔɖɔɛ ɔ̃ ɔbi sɛ ɔpia kubɛ ɔkpadzɛ̃ wũ kutsue.25Ɔturi bɔlɔlɔa sɛ ɔna aɖera ɔɖe ɔmi kukaakɔ,ɣɛɛ kukã sɛ kukpɛ̃ ɔtilese.
The Seed Company