AGBÃ12
1Ɔturi wɔ nsɛ ɔɖɔɛ ikpadzɛ̃ ne ɔsɛ ɔɖɔɛ inɔkpa,ɣɛɛ nwɔ lotsiri iyira ne, itɔ ɔɖe.2Bosate sɛ ɔnyɔ ɔturi sɛɛ nnya,ɣɛɛ Bosate sɛ ɔtã kasɔla siriita ɔturi ipɔ.3Ɔturi iibawo ɔsɛra so iki i ɔtile ame,fiɛ maibawo ɔturi bɔlɔlɔa ɔrui i ɔ̃ kasɛkɔ̃.4Ɔrɔ̃go wɔ mba nsɛgbai sɛɛ ɖe igaraikoto i ɔ̃ ɔrã iti.Ɣɛɛ ɔturire wɔ nsɛ ɔbɔ kunuarɛ se lɛ iɖa bua i ɔ̃ ɔrã ikui ame awe.5Ɔturi bɔlɔlɔa siriita ɔya,ɣɛɛ ɔtilese kuka ɖe kasɔla.6Ɔtilese atɔ̃me wɛrɛ asia si aafere ima i karɔ̃,ɣɛɛ ɔturi sɛɛ ikaɖe sɛ iɖi ɔturi.7Masɛ mawuĩ ɔtilese i karɔ̃ kere ɔsiina,ɣɛɛ ɔturi sɛɛ iyo sɛ iya teteree.8Ɔturi iwola kanya masɛ male wũ,ɣɛɛ masɛ manyɔ ɔturi wɔ mba adzuni lalaa pupurii.9Ilɛ sɔ aiɖe kuira ɣɛɛ aba ɔɖabo,iɖo sɔ aabara so ɔturi siare ɣɛɛ ana araɖea kuawɛ̃.10Ɔturi bɔlɔlɔa sɛ ɔnyɔ ɔ̃ mabɔi iso,ɣɛɛ ɔtilese kayiribielea ga loɖo ɖe ɔtile.11Ɔturi wɔ nsɛ ɔkpɛ̃ ɔ̃ ɔwĩ sɛ ɔna araɖea gbodzoo,ɣɛɛ ɔturi wɔ nsɛ ɔsiai i ara wa loire kuira kama ne, ɔna adzuni.12Ɔtilese kubie nɖe ɔturi nyanyariã kakpãramɔɛã;ɣɛɛ ɔturi bɔlɔlɔa ɔɖu sɛ ɔre iti.13Ɔturi nyanyariã akaɖe lalaa nsɛ amɔɛ̃ wũ lɛ kata awe,ɣɛɛ ɔturi bɔlɔlɔa sɛ ɔtere i imɔrɛ̃ kanya.14Atɔ̃me wa ɔturi ɔbusi kanya ɔɣɛ nsɛ abɔ wũ isɛɛfiɛ karabara ga ɔturi ɔsu nrɔɔ̃ ɔbara nsɛ kabɔ wũ kusia.15Kadzunisɛĩ ɔri ɔya i ɔ̃ mɔmɔ anɔ,ɣɛɛ kawolai sɛ ɔkã kuka atsue.16Kadzunisɛĩ sɛ kaɖi kã sikpã kate ɔluwɛ̃,ɣɛɛ kawolai iisɛ katã sitia mmuai.17Aɖansiɛ nukuarese sɛ ɔɣɛ kanyakaɣɛ gbaã,ɣɛɛ aɖansiɛ ladze sɛ ɔla mila.18Kasusu idaabara atɔ̃me sɛ atsue ɔturi lɛ ipɛmi awe.Ɣɛɛ kawolai atɔ̃me sɛ abɔ ɔturi isosarɛ.19Ɔnukuarese atɔ̃me sɛ awe ɔwi ɖaa,ɣɛɛ ladze mila sɛ miwe ɔwi kɛkɛĩ kere.20Kasɔla pia i mma nto mabie inyanyariã ibara kasusu ame,ɣɛɛ mma nsɛ mabie isobuɛ sɛ mana isoɣɔ.21Iraboa kuiwɛ̃ iisɛ iba i ɔturi bɔlɔlɔa iso,ɣɛɛ matilese ɔyigu kukpakpi.22Maladze ɖe inyanyara i Bosate anɔ,ɣɛɛ ɔsɛ ɔna isoɣɔ i maturi ma mba ɔnukuare iso.23Ɔturi wolai iisɛ ɔtara kanya i ɔ̃ inɔkpa iso,ɣɛɛ madzunisɛĩ sɛ malakulu i adzunisɛ̃ra iso.24Nwɔ nsɛ ɔpia ɔdzegere kɔrɔ̃ nsɛ kuɖe sigara,ɣɛɛ ndã ibara sɛ iwiri i sisande karabara ame.25Iyasoiso sɛ ibɔ ɔturi karɔ̃,ɣɛɛ katetere ipia atɔ̃me sɛ apia wũ isoɣɔ.26Ɔturi bɔlɔlɔa sɛ ɔdzuɛ̃ so i ɔ̃ kulaaipia ame,ɣɛɛ matilese ɔri sɛ ɔkɔ ma ɔyura.27Dãdze iisɛ ɔna kaputubɔi ɔfɛ̃,ɣɛɛ ɔturi wɔ mba ɔdzegere sɛ ɔna karana ga lofɔ kuɣa.28Ngbã pia i ara bɔlɔlɔa ibara ɔri iso,fiɛ ɔturi wɔ loki i ɔri wɔgbe iso iisɛ ɔkɛlɛ kukpi ngbe.
The Seed Company