AGBÃ14
1Ɔrɔ̃go wolai sɛ ɔtsue ɔ̃ iyo,ɣɛɛ ku ala nrɔɔ̃ i ɔrɔ̃go kadzunisɛĩ sɛ kabiɛ ɔ̃ ire.2Ɔturi wɔ nsɛ ɔsɛ ngbã bɔlɔlɔa sɛ ɔnigã Bosate,ɣɛɛ nwɔ nsɛ ɔsɛ ngbã nyanyariã sɛ ɔnyɔ wũ pupurii.3Kadzunisɛĩ ikaɖe sɛ ikpadzɛ̃ ipɛ ɔdziri ibɔ wũ,ɣɛɛ mawolai ɔnyagɛmi sɛ ɔdzuɛ̃ ma.4Si manantsuĩ na ne, araɖeibui sɛ ise ikunu,ɣɛɛ ɔraɖui gbodzoo ina sɛ ibɔrɛ i nantsuĩrɛrɛ̃ ɔle ame.5Aɖansiɛ nukuarese iisɛ ɔla sila,ɣɛɛ aɖansiɛ ladze sɛ ɔla mila.6Aɣiãrase sɛ ɔbie iwola ɣɛɛ ɔ̃isɛ ɔnya ne,ɣɛɛ inɔkpa se pɔkɔsɔɔ itã nwɔ lonɔ ara karɔ̃.7Rera so kama i kadzunisɛĩ kɔrɛ,alasɔ aibanɔ inɔkpa i ɔ̃ kanya.8Kawolai ɔkpɛ nɖe sɔ ɔ̃aɣara so ɔtsue nnɛ ɔ̃abara karɔ̃,ɣɛɛ kadzunisɛĩ sɛ ɔsɔsɔla so.9Kadzunisɛĩ sɛ ɔbara aɣiãra i ikpi iyira iso,ɣɛɛ Ɣaa sɛ ɔna isoɣɔ si ɔturi ɔbara isɛɛ.10Ɔturi mɔmɔ nɣe ibo gu ibɛbɛrɛ nɛ mpia i ɔ̃ ɔtu ame,fiɛ ɔturi mama iibawo ɔnagu wũ ne isoɣɔ.11Mato maawɔra ɔtilese iyo,ɣɛɛ ɔturi sɛɛ ikpayo to iamɔ.12Ɔturi to ɔnyɔ sɔ ɔri wɔ iso ɔsi ngbã lɛ,ɣɛɛ i kawirikɔ̃ ne isɛ ikɔ wũ ipia i kukpi ame.13Si mato mama sima kɔraa ne, ibo sɛ iwe i ɔtu ame,ne isoɣɔ aawo ɔwirigu isoma.14Nwɔ nna kafɔkaɖe to ɔ̃afɔ kuso gɔ lokotegu wũ i ɔ̃ siri nyanyariã iti,ne ɔturi sɛɛ to ɔ̃afɔ ɔ̃ kuso ana.15Kadzunisɛĩ sɛ ɔfɔ itɔ̃me irere ɔɖe,ɣɛɛ kawolai sɛ ɔdzuĩ ɔ̃ inene ame kukaakɔ.16Ɔturi wolai sɛ ɔnigã Bosate fiɛ ɔsɛ ɔre iranyanyariã kama,ɣɛɛ kadzunisɛĩ sɛ ɔsia so ara fiɛ ɔ̃isɛ ɔsu kuira i ira iso.17Ɔturi wɔ nsɛ ɔna sikpã malamala sɛ ɔbara adzunisɛ̃ra,ɣɛɛ masɛ matsiri nwɔ nsɛ ɔkososo ku adzuni.18Kadzunisɛĩ kaɖekɔ̃ nɖe ɔ̃ adzunisɛ̃ra,ɣɛɛ kawolai sigaraikoto nɖe inɔkpa.19Maturi nyanyariã sɛ mabɔitikarɔ̃ matã maturi sɛɛ,fiɛ matilese sɛ mabɔitikarɔ̃ i maturi bɔlɔlɔa kayogodɔ̃.20Wɛrɛba magbamikui ana kɔraa sɛ matsiri wũ,ɣɛɛ ranase ba malaa gbodzoo.21Ɔturi wɔ nsɛ ɔnyɔ ɔ̃ ɔnyii pupurii sɛ ɔbara ikpi,ɣɛɛ so sɛ siɣɔ nwɔ nsɛ ɔbara maɣiãni kayiribielea.22Mma nsɛ maɖo iranyanyariã iisɛ maɣɛrɛ ɣɛɛ?Ɣɛɛ mma nsɛ maɖo isɛɛ ne, nnyainyɔ gu ɔnukuare nɖe ma ɔkpɛ.23Kubɛ ipia biara sɛ kubɔ kusia,ɣɛɛ akaɖe kere kere sɛ abɔ siwɛrɛba.24Mawolai karana nɖe ma sigaraikoto,ɣɛɛ madzunisɛĩ ne, adzunisɛ̃ra nɖe ma ɔkpɛ.25Aɖansiɛ nukuarese sɛ ɔɖi ngbã,ɣɛɛ aɖansiɛ ladze sɛ ɔsɔsɔla maturi.26Nwɔ nsɛ ɔnigã Bosate ba ɔlekasɛkɔ̃,fiɛ iaɖe katarikɔ̃ ɔtã ɔ̃ mabi.27Bosate kunigã ɖe itubiɔ nɛ nsɛ itã ngbã,isɛ iɖi ɔturi ibɔrɛgu i kukpi kata ame.28Maturi gbodzoo kusime ɖe igara kuwarɛ,ɣɛɛ si maturi na ne igarabibirɛrɛĩ na ɔle.29Ɔturi wɔ nsɛ ɔɣara so ba karɔ̃inɔ kukaakɔ,ɣɛɛ ɔturi wɔ nsɛ ɔna sikpã malamala sɛ ɔɖi adzunisɛ̃ra kayi.30Adzuni wa nsi i karɔ̃ ku isobuɛ sɛ itã sosina ngbã,ɣɛɛ kanɔbɛbɛ sɛ katã akui ɔbu.31Ɔturi wɔ nsɛ ɔwedza mawɛrɛba inyɛ sɛ ɔtia ma Baradze;ɣɛɛ ɔturi ɔrere wɔ nsɛ ɔbara maɣiãni kayiribielea sɛ ɔwarɛ Ɣaa.32Si kukpakpi ɔba ne, matilese sɛ marɔ̃,ɣɛɛ ɔturi bɔlɔlɔa ba katarikɔ̃ ta kukpi ame kɔraa.33Iwola ɔfɔ kasɛkɔ̃ i nwɔ mba karɔ̃inɔ adzuni ame,fiɛ ɔsɛ ɔtã matsue wũ ta i madzunisɛĩ ndɛ̃.34Sibɔlɔlɔ sɛ sikɔlɛ kaɖe kato,ɣɛɛ ikpi ɖe kunuarɛ itã kaɖe biara.35Igara sɛ ɔna isoɣɔ i ɔɖabo wolai iso,ɣɛɛ ɔsɛ ɔna sikpã i ɔɖabo wɔ nsɛ ɔbɔ kunuarɛ iso.
The Seed Company