YESAYA54
Bosate Kuɖɔɛ Kutã Israel
1Bosate sɔ, "Ɔlɛma, ka kuka,fɔ wɔ loiɣe ɔbi anya;kpɛ kuka si aka kɔ̃ ku isoɣɔ,fɔ wɔ kuɣe iiɖoɖo kunya.Alasɔ fɔ wɔ nse lɛ ɔlɛma fiɛ manyua-ɔ masɛfɔ mabi ɔsi maɖo ɔrɔ̃go wɔ nyiri kurã."2"Bara fɔ akpayo amɔsi anabarã fɔ ikpayo sikati si sibɛ,daasɛgu ngba kama;ka wã ɣedzagu siwɛ̃,tã kusɔdzirikupɛa si kuwe ɔle.3Alasɔ aato aabɛ akɛlɛ kasɛ biara i karɔ̃ iso.Fɔ ɔkparɛ to maafɔ karɔ̃ ga i maturi mama si iso kiniɔfiɛ mato maasɛ i ma simagɛ̃ dzɛ marui manyua ame.4"Daanigã, aibaɖe kunuarɛ.Daanigã isopa fiɛ maibasopara-ɔ.Ato aaɣara fɔ sibitɛ ɔwi kunuarɛfiɛ aisibanyigi fɔ sikpisere ame isoma.5Alasɔ fɔ ɔrã nɖe fɔ Baradze -Bosate Ɔlesate nɖe ɔ̃ iyere -Israel Ɔsekelea nɖe fɔ Ɖidze;ɔ̃ masɛ marɔ sɔ karɔ̃ ɔɖuɖu iso Ɣaa ne.6Bosate to ɔ̃akpere-ɔ ɔkpesegu-ɔ ɔbɔlɛ ɔre wɔ manyua masɛ fiɛ ɔpia i isoma ame awe.Fɔ Ɣaa sɔ, ɔɔse lɛ ɔbitɛ wɔ mayiri,kere ne ɔ̃ ɔrã ɔsɛ̃ wũ ne."7"Lonyua-ɔ losɛ ɔwi kɛkɛĩ,ɣɛɛ ala nnyainyɔ gbodzoo ɔso ne, loakpesegu-ɔ lobɔ.8Bosate fɔ Ɖidze sɔ,lorɛ̃ sikpã gbaã ɔluwɛ̃,ne lokɔla wũ anɔ ɔwi kurukutu ne.Ɣɛɛ ala wũ kayiribielea ga nna katuĩ ɔso ne,loanyɔ-ɔ nnya."9"I wũ kɔrɛ ne, ise lɛ Noa ɔwi awe,ɔwi wɔ lokã ndamu sɔ ndu mɛ lofɔ karɔ̃ iso ku Noa ɔwi igbã, iisibaba kuiyikuiyi ana.Ne ɔso loɔkã ndamu sɔ loisibanagu-ɔ sikpã,lonyagalagu-ɔ kuiyikuiyi ana.10Atoasɔ abe gu abemito aati fiɛ aarɔ̃ kɔraa ne,loibasɛ̃-ɔ ku wũ ɔnukuare kuɖɔɛ,ɣee loibatu wũ isobuɛ ndamu."Bosate wɔ nsɛ ɔnyɔ-ɔ nnya loɣɛ ne.11"O ɔmagɛ̃siare wɔ lowe inyɛ, awɛ ɔwɛwɛrɛ̃ fiɛ kuwɛ̃ na ɔ̃apia-ɔ kɔrɔ̃ i kayiri,loaledza-ɔ itsue ku ata wa lofɔ kuɣa,fiɛ loasu ata wa mba kuɣa lopia fɔ sikaĩ.12Loasu ata wa lorɛtɛ lotsue adzarara losia i ɔmagɛ̃ abere iso,loasu ata wa lobua afɔ kuɣa ato afiɛ lobara fɔ kuyogodɔ̃,fiɛ loasu ata wa lofɔ kuɣa ato alɛnyɔ lotsue fɔ abere ɔɖuɖu.13Bosate to ɔ̃ate fɔ mabi ɔɖuɖu ara,fiɛ isobuɛ gbodzoo aaɖe ma ire.14Mato maasu ara bɔlɔlɔa ibara masɛra-ɔ teteree.Kuwɛ̃ iibayika-ɔ ɔbɔ karɔ̃,kuira na iapia-ɔ ifɔ̃.Ifɔ̃ ku iti ikpakpa aadzorogu-ɔ;iibabore imatã-ɔ.15Si ɔrere ɔta kakpã i fɔ iso ne, iiɖe wũ kɔrɛ ibɔrɛ.Ɔrere wɔ loata kakpã i fɔ iso aatã iti.16"Nyɔ lo, Mme nɖe nwɔ lobara torese.Mme nsɛ lofuri akaĩ ɔwiri awarafiɛ Mme nsɛ lotore ikpira nɛ loawɔra ara.Fiɛ Mme nɖe nwɔ lobara raninase sɔ ɔnina ara;17ikpira kuiwɛ̃ nɛ maasu mata maya-ɔ iso iibabara karabara.Ato aaɖi ate ɔbiara wɔ loasu itɔ̃me i fɔ iso sɔ nnɛ ɔto ɔɣɛ iiyi.Nnɛgbe nɖe Bosate maɖabo kaɖekɔ̃ ne,fiɛ ne nɖe ibɛ nɛ lobɔrɛ i wũ kɔrɛ."Kumɛɔ Bosate ɔɣɛ ne.The Seed Company