YESAYA55
Ɣaa Sɛ Ɔbara Kayiribielea
1"Mi ma ɔɖuɖu kutukã to, miba,miba miafɔ ndu;Mi ma nna sikã kɔraamiba miaɣa aɖera si miɖe!Miba miaɣa ndã gu inyɛndukuso ɣɔa, kuɣa na iso.2Be ɔso mito minina sikã i nnɛ loiɖe araɖea,fiɛ mito minina ɔle i nnɛ maisɛ mami iso?Minɔ, mikã atsue kukaakɔ, si miɖe ira nɛ nlɛ,fiɛ mi sosina ame aalɛ ku aɖera sɛɛ miana isoɣɔ.3Minɔ si miba i wũ kɔrɛ;minɔ wũ itɔ̃me si miawe ngbã.Loanyigu mi kanya ku ndamu mɛ loase ɔwi daaro,loasu kuɖɔɛ lotã mi lɛ ndamu kuɖɔɛ gɔ lotã David awe.4Nyɔ lo, loɔtã ɔɖe aɖansiɛ ɔtã nɖebi,fiɛ lobara wũ tɔ̃ɖedze gu kpãrɛrɛĩkpakpa lotã nɖebi.5Gbaã ne, ato aakpere nɖebi mɛ aiɣe,fiɛ nɖebi mɛ loiɣe-ɔ atere ise maba i fɔ kɔrɛ.Ito iaba ne ame ala Bosate fɔ Ɣaa,Israel Ɔsekelea ɔsoalasɔ ɔpia-ɔ kuwarɛ."6Ala nwagbe ɔso ne, bie Bosate gɔ aawo wũ ɔnya,kpere wũ gɔ ɔbore ɔmatã-ɔ.7Ɔtilese si ɔnyua ɔ̃ nsɛgbaisi ɔturi nyanyariã si ɔnyua ɔ̃ adzuni nyanyariã.Tã ɔfiriki ɔkɛlɛ Bosate kɔrɛ, si ɔ̃abara wũ kayiribielea.Ɔfiriki ɔkɛlɛ bo Ɣaa kɔrɛ alasɔ ɔ̃asu akpi ɔtsɛ.8Alasɔ Bosate sɔ,"Wũ adzuni iiɖe mi adzuni,fiɛ mi siri iiɖe wũ siri.9"Kumɛgɔ i kato ɔkɔlɛ kaɖo karɔ̃ ne,ngbɔ i wũ siri ɔkɔlɛ siɖo mi siri nefiɛ ngbɔ i wũ adzuni ɔkɔlɛ aɖo mi adzuni ne.10Lɛ kumɛgɔ i kado gu snosɛ apɛ abɔrɛ i kato neaisɛ akpese akɛlɛ kato,sɔ aipia karɔ̃ ndu.Isɛ itã sɔ ɔraɖui ɔre ɔmɔɔtã kpɛ̃dze abi gu raɖese araɖea ɔɖe.11Ngbɔ i itɔ̃me nɛ lobɔrɛ i wũ kanya ame sɛ ise ne.Iibakpese iba i wũ kɔrɛ ikunu,ɣɛɛ iabara iwiri lɛ kumɛgɔ lobiefiɛ karabara ga ɔso losese ne aaba ne ame fiɛ."12Mito miabɔrɛ mikɛlɛ ku isoɣɔfiɛ miasɛ mi ɔri i isobuɛ ame.Abe gu abemiaapia kuka ika nrɔɔ̃ i mi katɔ̃fiɛ adziri wa i iputu ameaapɛ arɔ̃kpasa.13Adziri kɔlɛa wa mba ɔle aare i miyu kasɛkɔ̃ kanya,fiɛ anya aare i kuposɛ̃ kanya.Ara wagbe aabɔ kuwarɛ siare kutã Bosate iyere,aaɖe inyigira gu ikparĩ daaronɛ maibamɔɛ̃ maɖi."The Seed Company