YESAYA53
1Nna lofɔ bo itɔ̃me ɔɖe?Nna i Bosate ɔɖi ɔ̃ ɔle ɔte?2Alasɔ ɔmɔ i ɔ̃ anɔmi ame lɛ kudziri ɔlɔmia wɔ nna ɔle,fiɛ ɔmɔ lɛ kudziri ɔɖu i karɔ̃ korea ame awe.Ɔna ku kuwarɛ fiɛ ɔ̃ito ɔlɛnyɔ sɔ boala boɔnyɔ wũ.Ɔ̃ito ɔlɛnyɔ kɔraa fiɛ ɔ̃abo bo anɔ bobie wũ.3Maturi awune ɔsɛ̃ wũ fiɛ manyɔ wũ pupurii.Ɔrɛrɛ̃ wɔ lowe inyɛ gbaã fiɛ ɔna ibo gbodzoo ɔɖe.Ɔse kere lɛ ɔrɛrɛ̃ wɔ kuwɛ̃ iibie sɔ ɔ̃anya ku anɔmi awe.Bonyɔ wũ pupurii fiɛ boibu wũ bopia i kuira ame.4Ɣɛɛ, i ɔnukuare ame ne ɔ̃ losore bo sinyɛfiɛ ɔpia iti ɔsore bo isoma.Ɣɛɛ bo ne, bonyɔ wũ lɛ nwɔ i Ɣaa ɔkpadzɛ̃ kutsue,ɔpɛ fiɛ ɔbara wũ amumuɣɔ.5Ɣɛɛ makpira wũ ala bo aɣɛrɛ iti,fiɛ mabibiɛ wũ i bo akpi iti.Kutsue gɔ makpadzɛ̃ wũ ɔtã bo isobuɛ,fiɛ ɔ̃ ayɛi ɔtã bo isosarɛ.6Bo ɔɖuɖu se lɛ masɛrɛ ma loyu ɔri awe,fiɛ bo ɔbiara ɔsu ɔ̃ mɔmɔ ɔri.Ne Bosate ɔsu bo ɔɖuɖu akpi ato ɔsia i ɔ̃ iso.7Mayika wũ mabɔ karɔ̃ fiɛ mabara wũ amumuɣɔ,ɣɛɛ ɔ̃ibusi kanya.Lɛ kumɛgɔ si makɔ sɛrɛrerɔ̃ibi maaɖoe,ɣee lɛ kumɛgɔ i sɛrɛrerɔ̃ ɔwe kanana, i siwɛrɛ̃makparɛ̃se nrɔɔ̃ ame ne,kumɛɔ ɔ̃ibusi ɔ̃ kanya ne.8Mayika wũ mabɔ karɔ̃ fiɛ maɣɛgu wũ itɔ̃me i ɔri wɔ loiya iso ne makɔ wũ maruigu.Kuwɛ̃ iibawo ira ɔɣɛ i ɔ̃ ɔkparɛ iso.Alasɔ maɖoe wũ maɖi i magbanadze karɔ̃ iso,fiɛ wũ maturi akpi iti mawuĩ wũ i karɔ̃.9Ɔwi wɔ ɔkpi ne, makuri ɔ̃ karɔ̃ mapia i maturi nyanyariã ndɛ̃,ne mabiara wũ i maranase kɔrɛ.Atoasɔ ɔ̃ibara ɔtile ɔnya,ɣee mila atɔ̃me iibɔrɛ wũ i kanya fiɛ.10Ɣɛɛ Bosate kuɖʋɛ kuɖe sɔ ɔ̃abibiɛ wũ fiɛ ɔ̃atã ɔweinyɛ.Ɔ̃ kukpi si kuɖe iɣɛrɛkuso isɔrɛ nɛ ame ɔ̃aki ɔ̃asu akpi ɔtsɛ ɔturi awunefiɛ ɔ̃anya ɔ̃ ɔkparɛ ɔ̃asɛ ngbã dzoroo.Iyɔ nnɛ i Bosate ɔɖo sɔ ɔ̃abara, aaba i ne ame iki i ɔ̃ kɔrɔ̃ iso.11Ɔ̃ ɔkala inyɛwe kama ne,ɔ̃anya ngbã ɔtɔ fiɛ iami wũ.Wũ ɔɖabo wɔ nsɛ ɔbara ara bɔlɔlɔa, nnɛ ame ɔki aabara maturi gbodzoo ara bɔlɔlɔa mabaradze,fiɛ ɔ̃apia iti ɔsore ma akpi.12Ne ɔso loatã ɔna kaɖekɔ̃ i maturi ma lofɔ iyere ndɛ̃,fiɛ ma gu malese aaɣɛ so kakpãramɔɛã,alasɔ ɔsu ɔ̃ ngbã ɔtã fala gɔ ɔkpi,fiɛ maka wũ mapia i makpibaradze ndɛ̃.Alasɔ ɔsore maturi gbodzoo akpi,fiɛ ɔtã iti i makpibaradze iti.
The Seed Company