YESAYA52
Ɣaa To Ɔ̃aɖi Yerusalem
1Ta, Zion ta!Pia ɔle lɛ arapia awe.O Yerusalem, ɔmagɛ̃siare sekelea,pia fɔ arapia wa nto alɛnyɔ.Mma loitu sirɛrɛ̃ gu mma loisekeleiisibabo i fɔ ame kuiyikuiyi.2Mikpakpa ɔsebu miɖi so iso;O Yerusalem ta ya, sɛ i igaraiyara iso.Zion Ɔbirɔ̃gomi wɔ mamɔɛ̃ sisandeɖi ibɔra nɛ mpia-ɔ i simɔ sɛ.3Alasɔ Bosate sɔ,"Maitã kuira i mi iti masu maɣa mi,ne ɔso maaɖi mi ku kuso idaatã."4Alasɔ Bosate Wɔ Nsiguso sɔ,"Iɖeakatɔ̃ ne wũ kaɖe ɔkɛlɛ Egipte karɔ̃ iso ɔsɛ maasɛ i mmɔ;kama ne, ma Asiriase ɔwedza ma anyɛ siefe.5Bosate sɔ, "Kiniɔ ne be ka nto lobara i ngbe?"Maɔkɔ wũ maturi maruigu siefe kerefiɛ mma nto maɖe ma iso to mabara ma aɣiãra.""Iyi ɔɖuɖu nemasɛ masopara wũ iyere ɖaa.6Ne ɔso wũ maturi to maatsue wũ iyere,fiɛ i iyi nɛmɔ ne mato maatsuesɔ Mme loɣɛ ne losɛ koko.Aĩ, Mme loɖe."7Mma nsɛ mafɔ itɔ̃me bielea i abe iso to maabama ngba iɖi to ilɛnyɔ kere.Ma nsɛ mapɛ isobuɛ imomo,fiɛ masɛ mabɔ itɔ̃me bielea.Masɛ maɖi silɔ i iɖi iso,maɣere Zion sɔ,"Fɔ Ɣaa to ɔɖe sigara!"8Kã atsue si anɔ! Fɔ madzuɛ̃se silɔ to sikɛlɛ kato.Ma ɔɖuɖu to maka aka ku isoɣɔ masakanya.Ɔwi wɔ Bosate sɛ ɔkpese ɔba Zion ne,maanya ku ma mɔmɔ anɔmi.9Mi Yerusalem akpakpi,mi ɔɖuɖu mikpɛ isoɣɔ kuka teteree.Alasɔ Bosate ɔɔpia ɔ̃ maturi kɔrɔ̃ i kayiri,ɔ̃ɔɖi Yerusalem.10Bosate to ɔ̃abɛ ara i ɔ̃ kɔrɔ̃ sekelea isoi nɖebi ɔɖuɖu anɔmi ame.Karɔ̃ kuwirikɔ̃ ɔɖuɖu aanyabo Ɣaa iɖi.11Mirui, mirui, mibɔrɛ i mmɔ!Midaapɛgu kuira nɛ loisekele!Mibɔrɛ i ɔ̃ ame si mikpa,mi ma nsɛ misore Bosate iyo arɔi.12Ɣɛɛ si mito mirui ne, midaayasoisoɣee midaatere ise mirui.AlasɔBosate to ɔ̃aɖe mi katɔ̃,fiɛ Israel Ɣaa aadzuɛ̃ mi kama ana.Ɔɖabo Wɔ Nto Ɔwe Inyɛ
13Nyɔ lo, wũ ɔɖabo to ɔ̃abara ara ku iwola;makɔlɛ wũ kato, ɔ̃afɔ iyere fiɛ ɔ̃aɖe ɔsiare.14Maturi gbodzoo ɔnya wũ ibara ma ɣii-ɔ̃ kuseme ɔnina kuɖo ɔturi awune ɔrere kɔraa,iaɖa kɔraa fiɛ ɔturi aanya sɔ ɔturi ɔɖe.15Kumɛɔ nɖebi gbodzoo to maanyɔ wũiabara ma ne.Magara to maapia kanya ibɔra ala ɔ̃ ɔso.Alasɔ nnɛ maiɣere ma, iɖe mato maanya,fiɛ nnɛ mainɔ manɔ, karɔ̃ maanɔ.The Seed Company