EZEKIEL29
Kanyaiɖi Ita Iya i Egipte Iso
1I ikɔ iweova i ma Yudase kuwa kuweova iyi iweonyɔare iso ne, Bosate itɔ̃me ɔba me sɔ,2"Ɔturi awune ɔbi, tara fɔ anɔ sɔ̃ Egipte Igarakpakpa iso si aɖikanya ata aya i ma gu ma Egiptese ɔɖuɖu iso.3Ɖeikagu wũ si aɣere wũ sɔ, 'Nnɛgbe i Bosate Wɔ Nsiguso to ɔɣɛ ne:" 'Lota loɣɛ-ɔ iso, Egipte Igarakpakpa,bɔisiare wɔ nrɛ i fɔ kuworei ndɛ̃.Asɛ aɣɛ sɔ, "Nil ɔwore ɖe wũ ɔre.Mme lobara wũ lotã so."4Ɣɛɛ nto losu kugodai lopia-ɔ i fɔ aregba amefiɛ loatã afara wa i fɔ kuworei ame ɔpɛ kumatã i fɔ awoloba iso.Loto loakpadzɛ̃-ɔ loɖi i fɔ kuworei ndɛ̃,ku afara ɔɖuɖu wa mmatã i fɔ awoloba iso.5Nto loanyua-ɔ losɛ i fafuĩ ame,mi gu afara ɔɖuɖu wa i fɔ kuworei ame.Mito miarɔ̃ mifere i karɔ̃ ga nfere kakpa isofiɛ maibamala mi ɣee maibasu mi i mmɔ.Nto loasu mi lotãkarɔ̃ iso mabɔisiare gu ɔwiri ame kurodzai lɛ aɖera.6Iyɔ mma ɔɖuɖu nsi i Egipte karɔ̃ iso to maatsue sɔ Mme nɖe Bosate." 'Ɔɔse lɛ tsatsakua ɔsɛdziri atã Israel kaɖe.7Ɔwi wɔ mamɔɛ̃-ɔ mala ku ma nrɔɔ̃ ne, abɛse ne atsue ma amɔiti, gɔ mapiɛtɛ-ɔ iso ne, afɛ̃ ne mafɛ̃ kama ne.8" 'Ne ɔso nnɛgbe i Bosate Wɔ Nsiguso to ɔɣɛ ne: Nto loakpadzɛ̃ ipɛmi losia-ɔ iso fiɛ mato maaɖue fɔ maturi gu ma mabɔi.9Egipte karɔ̃ to kaakpese ikpakpi karɔ̃. Iyɔ mato maatsue sɔ Mme nɖe Bosate.
" 'Ala aɣɛ sɔ, "Nil ɔwore ɖe wũ ɔre, mme lobara wũ ɔso."10Ne ɔso lotsiri-ɔ fiɛ lotsiri fɔ kuworei, fiɛ nto loabara Egipte karɔ̃ ɔwɔ gu kakpese ikpakpi gu fafuĩ ita i Migdol ikɛlɛ Aswan, ikɛlɛ ta Kus kume iso.11Ɔturi awune kuwɛ̃ ɣee bɔi kuwɛ̃ kukpa iibaki i kame mafe, kuwɛ̃ iibawe i mmɔ itã akɔ sina.12Loto loabara Egipte karɔ̃ kakpese ikpakpi i nrɔ̃ mɛ lonina ndɛ̃. Ne ɔ̃ simagɛ̃siare to siakpese ikpakpi itã akɔ sina i simagɛ̃siare dzɛ mawɔra ndɛ̃. Ne nto losamera ma Egiptese lopia i nɖebi ndɛ̃ fiɛ loasa ma lofere i nrɔ̃ ame.13" 'Ɣɛɛ nnɛgbe i Bosate Wɔ Nsiguso to ɔɣɛ ne: Akɔ sina kawirikɔ̃ ne, nto loasa ma Egiptese kanya lobɔrɛgu i nɖebi mɛ ame masame mabo.14Nto loaɖi ma lobɔrɛgu i kafɔrɔ̃ ame lokpesera ma lobɔ i Egipte Kakpagɛkɔ̃, i ma mawa karɔ̃ iso. Mmɔ mato maaɖe sigarakaɖekɔ̃ dzɛ lofɛ̃ ne.15Sito siaɖe sigarakaɖekɔ̃ dzɛ lofɛ̃ siɖo fiɛ siisibatara so kato i nɖebi mama iso kuiyikuiyi ana. Loto loabara sɛ̃ sifɛ̃ sɔ siisibaɖe nɖebi mama iso kuiyikuiyi ana.16Egipte iisibaɖe ngbegɔ i Israel mabi aasiaiti iso. Ɣɛɛ iaɖe ikpi inyigira itã ma sɔ maisibabie kabuai mabɔrɛgu i Egipte kɔrɛ. Iyɔ mato maatsue sɔ Mme nɖe Bosate Wɔ Nsiguso.' "
Igara Nebukadnezar To Ɔ̃amɔɛ̃ Egipte
17Iyi ɖeakatɔ̃ i ma Yudase kuwa kuɖeakatɔ̃ ame i ikɔ sinyɔikɔdzɛva ame ne, Bosate itɔ̃me ɔba me sɔ,18"Ɔturi awune ɔbi, Babilon igara Nebukadnezar ɔsɛgu ɔ̃ makpakpɛ̃dze ikuri ku anɔmi rɛtɛa ɔsɛ ɔ̃akpɛ̃ Tiro teteree, iti biara ɔbɛbɛ fiɛ imɔiti biara ana ɔbɛbɛ. Ɣɛɛ ma gu ɔ̃ makpakpɛ̃dze iina ku kuso kuwɛ̃ i kakpã ga ɔta i Tiro iso ame.19Ne ɔso nnɛgbe i Bosate Wɔ Nsiguso to ɔɣɛ ne: Nto loba loasu Egipte lopia i Babilon igara Nebukadnezar nrɔɔ̃ ame fiɛ ɔ̃asore Egipte karana ɔruigu. Ɔto ɔ̃ayu fiɛ ɔ̃amɔɛ̃ ara i karɔ̃ ame lɛ kuso itã ɔ̃ makpakpɛ̃dze ikuri.20Loɔsu Egipte lotã wũ lɛ kuso itã ɔ̃ kubɛ alasɔ ma gu ɔ̃ makpakpɛ̃dze ɔbara ne matã me, Bosate Wɔ Nsiguso loɣɛ.21"Iyi nɛmɔ ne nto loatã isa ɔre itã Israel iyo. Ne loabusi-ɔ kanya aɖeika i ma ndɛ̃. Iyɔ mato maatsue sɔ Mme nɖe Bosate."The Seed Company