EZEKIEL28
Kanyaiɖi Ita Iya i Tiro Igara Iso
1Bosate itɔ̃me ɔba me sɔ,2"Ɔturi awune ɔbi, ɣere Tiro ɔɖeisoi sɔ, 'Nnɛgbe i Bosate Wɔ Nsiguso to ɔɣɛ ne:" 'I fɔ ɔtu katoikɔlɛso ame neasɛ aɣɛ sɔ, "ɣaa ɔwɛ̃ loɖe.Losi i ɣaa ɔwɛ̃ sigaraiyara isoi sipo ndɛndɛ̃."Ɣɛɛ ɔturi awune kere aɖe fiɛ aiɖe ɣaa ɔwɛ̃,atoasɔ asɛ abu sɔ aɣe iwola lɛ Ɣaa ɔwɛ̃.3Aɣe iwola aɖo Daniel?Ku iwɛrɛra kuiwɛ̃ iiwɛrɛ-ɔ?4Iki i fɔ iwola gu karɔ̃inɔ ameɔɔna ara karana atã so.Ne ɔɔna sikãrɛtɛa gu sikãfudza akpeafu i fɔ arakukɔlakɔ̃.5Iki i fɔ kusɛ̃ siare i kuɣaiɖe ame neɔɔɣe fɔ karana asia.Ana ne, ala fɔ karana ɔsofɔ ɔtu ɔɔkɔlɛ so kato.6" 'Ne ɔso nnɛgbe i Bosate Wɔ Nsiguso to ɔɣɛ ne:" 'Ala asɛ anyɔ sɔ aɣe iwola,aɣe iwola lɛ ɣaa ɔwɛ̃.7Nto loba loakpadzɛ̃ mafɔ lobɔ mata maya-ɔ iso.Kaɖe ga mba ɔtile kaɖo i nɖebi ame.Mato maakpadzɛ̃ ma apɛmi masia i fɔ kulɛ gu fɔ iwola isofiɛ maawɔra fɔ kulɛ ifiɛ.8Mato maakpasera-ɔ mapia i iwo ame.Ne ato aakpi kukpi nyanyariãi sipo ndɛndɛ̃.9Iyɔ ne ka ato aaɣɛ sɔ, "ɣaa ɔwɛ̃ loɖe,"i mma loɖue-ɔ anɔmi ame?Ato aaɖe ɔturi awune kere, iiɖe ɣaa ɔwɛ̃,i mma loɖue-ɔ nrɔɔ̃ ame.10Ato aakpi ature kukpii mafɔ nrɔɔ̃ ame.Bosate Wɔ Nsiguso sɔ, Mme loɔɖeika.' "Tiro Igara Ikpase
11Bosate itɔ̃me ɔba me sɔ,12"Ɔturi awune ɔbi, pia isomanɔ nrɔɔ̃ ise i Tiro igara iso si aɣere wũ sɔ, 'Nnɛgbe i Bosate Wɔ Nsiguso to ɔɣɛ ne:" 'Fɔ loɖe ira nɛ loyi pelepele igbã,ayigu iwola fiɛ fɔ kulɛ ɔyi.13Awe i Ɣaa kawĩ,Eden ame.Itafukuɣa biara:rubin, topas gu emerald,krisolit, oniks, Yaspis gusafir ɔkɛrɛ-ɔ.Fɔ ara wa masɛ gu nwa maɣedza ne, sikãrɛtɛa masu mabara wã.Maledza wã ku iyi nɛ mabara-ɔ.14Masɔla-ɔ nnɔĩ lɛ kerubi wɔ nsɛ ɔdzuɛ̃ ira,alasɔ kumɛɔ lobara-ɔ ne.Awe i Ɣaa kube sekelea iso.Asɛ aki i atafɔkuɣa wa nto afiɛ ndɛ̃.15Iɣɛrɛ kuiwɛ̃ iiwe i fɔ nsɛgbai isoita i iyi nɛ mabara-ɔgbɔgbɔɔgbɔ manya ɔtile i fɔ ame.16Iki i fɔ kuɣaiɖe nɛ loɣa ikpa ame ne,ayigu amumuɣɔ,ne abara ikpi ne.Ne ɔso losa-ɔ ku kunuarɛ lobɔrɛgu i Ɣaa kube iso.Ne lotɛ̃-ɔ ɔri, kerubi wɔ nsɛ ɔdzuɛ̃ ira lo,lobɔrɛgu i atafɔkuɣa ifiɛ ndɛ̃.17Fɔ ɔtu ɔkɔlɛ so katoala fɔ kulɛ iti.Ne anina fɔ iwolaala fɔ ikɛrɛso ɔso.Ne ɔso lofuĩdza-ɔ lowuĩ i karɔ̃.ne loɖi-ɔ losɛ sɔ magara si manyɔ-ɔ.18Iki i fɔ akpi gbodzoo gu ɔnukuare idaaɖe kuɣaiɖe ame ne,apia fɔ kusɔrɛkɔ̃ ɔgu.Ne ɔso lotã ɔtɔ ɔbɔrɛ i fɔ ame,ne ɔtsuedza-ɔ ne.Ne lobara-ɔ akpese ndɔ̃ i karɔ̃i mma ɔɖuɖu nto manyɔ-ɔ anɔmi ame ne.19Nɖebi ɔɖuɖu mɛ lotsue-ɔ nesitsue ɔbɔrɛ ma i fɔ iso.Ɔɔba aabo kawirikɔ̃ nyanyariãfiɛ aisibawe kuiyikuiyi.' "Kanyaiɖi Ita Iya i Sidon Iso
20Bosate itɔ̃me ɔba me sɔ,21"Ɔturi awune ɔbi, tara fɔ anɔ sɔ̃ Sidon, si aɖikanya ata aya wũ iso22si aɣɛ sɔ, 'Nnɛgbe i Bosate Wɔ Nsiguso to ɔɣɛ ne:" 'Lotsiri-ɔ lo, Sidon,fiɛ nto loaɖi wũ ikpawaĩ kayi i nnɛ loto loabara-ɔ ame.Mato maatsue sɔ Mme nɖe Bosate,si lokpadzɛ̃ wũ kutsuefiɛ loɖi so lote sɔ losekele i ɔ̃ kame.23Loto loasese kukpakpi i ɔ̃ isofiɛ nto loatã ima ɔbore i ɔ̃ sivurã iso.Mato maaɖue maturi mafere i ɔ̃ ame,ku ipɛmi i ɔ̃ iso i kasɛ biara iso.Iyɔ mato maatsue sɔ Mme nɖe Bosate ne.24" 'Israel maturi iisibawe magbamikui matsirise ma nse lɛ kuposɛ̃ gu agba wa itsue nsɛ abo. Iyɔ mato maatsue sɔ Mme nɖe Bosate Wɔ Nsiguso ne.25" 'Nnɛgbe i Bosate Wɔ Nsiguso to ɔɣɛ ne: Si losa Israel maturi kanya lobɔrɛgu i nɖebi mɛ ame masame mapia ne, nto loaɖi so lote sɔ losekele i ma ndɛ̃ i nɖebi anɔ. Iyɔ Israel maturi to maasɛ i ma mɔmɔ karɔ̃ iso, nga lotã wũ ɔɖabo Yakob.26Mato maasɛ i mmɔ i kaɣɔ ame, ne mato maatsue ayo makpɛ̃ wainnkpɛkɔ̃. Mato maasɛ i kaɣɔ ame, si lokpadzɛ̃ ma magbamikui ɔɖuɖu ma lonyɔ ma pupurii maɖaa ma kutsue. Iyɔ mato maatsue sɔ Mme nɖe Bosate ma Ɣaa ne.' "The Seed Company