EZEKIEL30
Ɔkpibiɛnɔ Itã Egipte
1Bosate itɔ̃me ɔba me sɔ,2"Ɔturi awune ɔbi, ɖikanya si aɣɛ sɔ, 'Nnɛgbe i Bosate Wɔ Nsiguso to ɔɣɛ ne:" 'Biɛ si aɣɛ sɔ,"Ndzo mitã iyi nɛmɔ!"3Ala iyi nɛmɔ ɔɔbore imatã,Bosate iyi ɔɔbore ibo -adɔdɔ iyi,ɔwi wɔ nɖebi to miawɔ.4Ipɛmi to iaba iata iya i Egipte iso,ne ibo gu ibɛbɛrɛ to aaba i Kus maturi iso.Ɔwi wɔ i mma maɔɖue aarɔ̃ marɛ i karɔ̃ i Egipte.Matsirise to maasore Egipte karana maruigu.Ne mabibiɛ ɔ̃ sikaĩ mafere ne.5" ' Kus gu Put, Lidia gu Arabia ɔɖuɖu, Libia gu ndamu karɔ̃ maturi to maarɔ̃ i ipɛmi kanya ku ma Egiptese.6" 'Nnɛgbe i Bosate to ɔɣɛ sɔ," 'Mma mpia i Egipte kasɛ to maarɔ̃ne ɔ̃ ɔle wɔ ɔto ɔte so ala to ɔ̃abakarɔ̃.Ita i Migdol ikɛlɛ Aswan nematuri to maarɔ̃ i ipɛmi kanya i ɔ̃ kame.Bosate Wɔ Nsiguso loɣɛ.7"Mato maakpese ikpakpii akpakpi nrɔ̃ ndɛ̃.Ne ma simagɛ̃siare to siawei simagɛ̃siare dzɛ mawɔra ndɛ̃.8Si lotsue ɔtɔ lopia i Egipte amefiɛ ɔ̃ mabuaidze ɔɖuɖu ɔɔwɔ ne,iyɔ mato maatsue sɔ Mme nɖe Bosate.9" 'Iyi nɛmɔ iso ne makpabo to maabɔrɛ i wũ kɔrɛ, mawe i nduisoabuɛ ame mapia Kus ifɔ̃ i ɔ̃ kaɣɔ ifɔiɖe nɛ ɔba ame. Ibo gu ibɛbɛrɛ to aafɔ ma ku Egipte iwɔyi, alasɔ gbaã ito iaba.10" 'Nnɛgbe i Bosate Wɔ Nsiguso to ɔɣɛ ne:" 'Loto loawɔra Egipte karanaiki i Babilon igara Nebukadnezar nrɔɔ̃ ame.11Ma gu ɔ̃ makpakɛpɛ̃dze - ma mba ɔtile maɖo i nɖebi ame -mato maakpadzɛ̃ mabɔ sɔ mawɔra karɔ̃.Mato maata mabo i Egipte iso ku apɛmine maturi ma maɖue to maayi i karɔ̃ iso.12Loto loatã Nil kuworei ɔsɔ̃ne loanyua karɔ̃ losu lopia i maturi nyanyariã nrɔɔ̃ ame.Loto loanina karɔ̃ gu irabiara nɛ mpia i kã iso,iki i mafɔ nrɔɔ̃ iso.Mme Bosate loɔɖeika.Egipte Katoikɔlɛso Simagɛ̃siare To Siawɔ
13" 'Nnɛgbe i Bosate Wɔ Nsiguso to ɔɣɛ sɔ," 'Nto loawɔra arapɔafiɛ loatuĩdza kumiamia gɔ i Memfis.Ɔɖeisoi kuwɛ̃ iisibawe i Egipte karɔ̃ iso,ne loatã ifɔ̃ ɔfɔ karɔ̃ ɔɖuɖu iso.14Nto loanina Egipte Kakpagɛkɔ̃,lopia Zoan ɔtɔfiɛ nto loakpadzɛ̃ ma Tebese kutsue.15Nto loaɖi wũ sikpã teterea lofere i Pelusium iso,ngbegɔ nɖe Egipte ɔlekasɛkɔ̃.Ne loawɔra Tebes karana.16Nto loapia Egipte ɔtɔ,Pelusium to ɔ̃awana i ibo ame.Awɛ to abibiɛ Tebes.Memfis to ɔ̃awe i ibo ame sɔɔ̃.17Xeliopolis gu Bubastis maporoporoito maarɔ̃ i ipɛmi kanya.Ne simagɛ̃siare ame maturi to maakɛlɛ kafɔrɔ̃ ame.18Si loba nto lobiɛ Egipte ɔle ne,ito iaɖe Tapanxes idududu iyi.Mmɔ i Egipte iteso ɔle to ɔ̃aba katuĩ ne.Adɔdɔ to aaɣa afu wũ,ne mamɔɛ̃ ɔ̃ kumagɛĩ maturi makɛlɛgu i kafɔrɔ̃ ame.19Ne ɔso nto loakpadzɛ̃ Egipte kutsue,iyɔ mato maatsue sɔ Mme nɖe Bosate.' "Mabiɛ Egipte Igara Ɔle
20Kuwa ɖeakatɔ̃ iyi kɔdzɛva i ikɔ iweoɖeakatɔ̃ ame ne, Bosate itɔ̃me ɔba me sɔ,21"Ɔturi awune ɔbi, loɔfɛ̃ Egipte Igarakpakpa kɔrɔ̃. Mainyi kɔ̃ kuakpi ɣee mainyi kɔ̃ ku sidzirisɛi sɔ kuana ɔle kumɔɛ̃ ipɛmi.22Ne ɔso nnɛgbe i Bosate Wɔ Nsiguso to ɔɣɛ ne: Lotsiri Egipte Igarakpakpa. Nto loafɛ̃ ɔ̃ nrɔɔ̃ minyɔ ɔɖuɖu, kusɛɛ gu ngɔ maɔfɛ̃. Ne loatã ipɛmi ɔkpase wũ i kɔrɔ̃.23Nto loasamera ma Egiptese lopia i nɖebi ame fiɛ loasa ma lofere i nrɔ̃ ame.24Nto loapia Babilon igara kɔrɔ̃ ɔle. Ne loasu wũ ipɛmi lopia i ɔ̃ kɔrɔ̃ ame. Ɣɛɛ nto loafɛ̃ Egipte Igarakpakpa kɔrɔ̃, ne ɔto ɔ̃atɔrɛ̃ i Babilon igara anɔ lɛ ɔturi wɔ makpira.25Nto loapia Babilon igara kɔrɔ̃ ɔle ɣɛɛ Egipte Igarakpakpa nrɔɔ̃ to miafɛ̃ misalaka. Iyɔ mato maatsue sɔ Mme nɖe Bosate, si losu wũ ipɛmi lopia i Babilon igara kɔrɔ̃ ame fiɛ ɔsu ne ɔta ɔya i Egipte iso.26Nto loasamera ma Egiptese lopia i nɖebi ame fiɛ loasa ma lofere i nrɔ̃ ame. Iyɔ mato maatsue sɔ Mme nɖe Bosate."The Seed Company