1 SAMUEL10
Samuel Ɔsɔla Saul Nnɔĩ Lɛ Igara
1Ne Samuel ɔsu nnɔĩibui ne ɔfere Saul nnɔĩ i iti iso. Ɔpɔrɛ wũ ɔpia so ne ɔɣere wũ sɔ, "Bosate ɔɔsɔla-ɔ nnɔĩ sɔ si aɖe tɔ̃ɖedze atã ɔ̃ kaɖekɔ̃.2Si arui i wũ kɔrɛ nɔme ne, ato aanya marɛrɛ̃ inyɔ i ngbegɔ marɔ sɔ Raxel ikpibiɔ kɔrɛ i Zelza i Benyamin kume iso. Mato maaɣere-ɔ sɔ, "Maɔnya mafirimu ma asɛ ato anyɔnyɔ. Kiniɔ ne fɔ ɔse iisito ɔbu iti ame i ma iso ɣɛɛ ɔto ɔɖaa so ala fɔ ɔso ɔto ɔɣɛ sɔ, "Be loabara fiɛ loanya wũ ɔbi?"3"Iyɔ si ata i mmɔ ne kɛlɛ katɔ̃ gbɔgbɔɔgbɔ asɛ aabo Tabor kudziri siare kɔrɛ. Marɛrɛ̃ itɛ ma nsɛ mato makɛlɛ Betel maasumu Ɣaa to maasarɛgu-ɔ i mmɔ. Ɔwɛ̃ to ɔ̃ala kutepuĩ kosoi kutɛ, ɔnyɔare to ɔ̃ala maboɖoboɖo itɛ fiɛ ɔtɛare to ɔ̃ala wain bɔikoakpo ɔwɛ̃.4Maato maya-ɔ fiɛ maasu maboɖoboɖo inyɔ matã-ɔ si afɔ.5"Ne kama si asɛ Ɣaa kabemi i Gibea kɔrɛ, ngbegɔ i ma Filistise makpakpɛ̃dze ɔbara kasɛkɔ̃. Gɔ asɛ si aabo i ɔmagɛ̃ ame ne, ato aasarɛgu Ɣaa kanyamaɖidze ikuri nɛ lobɔrɛ i kasɔrɛkɔ̃ fiɛ masɛ mato maba. Mato masa siwɛ̃ masango gu akasa gu aroi gu masango i ma katɔ̃ fiɛ maala maɔɖikanya.6Bosate Siwarã to siaba i fɔ iso ku ɔle, fiɛ fɔ wũ aatsɛ kanyaiɖi ku ma; sito siafirikiri-ɔ akpese ɔturi mama kɔraa.7Si ara wagbe ɔba i ne ame ne, bara ibiara nɛ aɖɔɛ, alasɔ Ɣaa piagu-ɔ.8"Ɖe me katɔ̃ si ala ɔɔkɛlɛ Gilgal. Nto loaba i fɔ kɔrɛ loasɔrɛ araifɛ̃ isɔrɛ gu isobuɛ isɔrɛ lotã Bosate. Tuĩ ya me ayi akɔdzɛ gbɔgbɔɔgbɔ loaba loaɣere-ɔ ara wa aabara."Nnɛ Samuel Ɔɖi Kanya Ɔsɛ Ɔba I Ne Ame.
9Gɔ Saul ɔpɛ ɔfiriki si ɔrui i Samuel kɔrɛ ne, Ɣaa ɔtã Saul ɔtu kuseme ɔfiriki i ɔ̃ ame, ne akparĩ ɔɖuɖu wa i Samuel ɔɖeika ɔba i kame ku ikpɛnɛ nɛmɔ.10Gɔ Saul gu ɔ̃ ɔɖabo ɔbo Gibea ne, Ɣaa kanyamaɖidze ikuri ɔba maasarɛgu wũ. Ɣaa siwarã ɔba i ɔ̃ iso ku ɔle ɔluwɛ̃ ne ɔ̃ wũ ɔbua ma ɔɖikanya i ma ndɛ̃ ne.11Ɔwi wɔ i mma ɔɖuɖu lotsue wũ saa ɔnya sɔ ka ɔto ɔɖikanya ku kanyamaɖidze ne, makarɛ so sɔ, "Be igbã iɖe loɔba i Kis ɔbibirɛrɛĩ iso? Saul ana ka mpia i Ɣaa kanyamaɖidze ndɛ̃?"12Ɔrɛrɛ̃ ɔwɛ̃ wɔ lobɔrɛ i mmɔ ɔkarɛ sɔ, "Nna nɖe mmagbe ɔse ?" Ne ɔso nnɛgbe ɔkpese simai masɛ maɣɛ i ma ndɛ̃ ɖaa sɔ, "Saul ana ka ɔpia i Ɣaa kanyamaɖidze ndɛ̃ ?"13Gɔ Saul ɔɖikanya ɔro ne, ɔkɛlɛ kasɔrɛkɔ̃.14Saul ɔsekoso ɔnya wũ gu ɔ̃ ɔɖabo ne ɔkarɛ ma sɔ, "Lɛ mise?"Saul ɔtã mmuai sɔ, "Bose i mafirimu kabiekɔ̃; ɣɛɛ gɔ boito bonya ma ne, bokɛlɛ Samuel kɔrɛ."15Saul ɔsekoso ɔɣɛ sɔ, "Ɣere me itɔ̃me nɛ i Samuel ɔɣere-ɔ."16Saul ɔtã mmuai sɔ, "Ɔtã botsue gbaã sɔ maɔnya mafirimu." Ɣɛɛ ɔ̃iɣere ɔ̃ ɔsekoso nnɛ i Samuel ɔɣɛ ɔsegu sigaraiɖe iso.17Samuel ɔkpere Israel kaɖe ɔsakanya i Mizpa i Bosate anɔ.18Ne ɔɣere ma sɔ, "Bosate Israel Ɣaa sɔ, 'Lokɔ Israel lobɔrɛgu i Egipte karɔ̃ iso, fiɛ lofɔ mi lobɔrɛgu i ma Egiptese nrɔɔ̃ ame. Loɖi mi lobɔrɛgu i inyɛwe ame i sigarakuɖekɔ̃ ɔɖuɖu kayirinɔ.'19Ɣɛɛ kiniɔ ne miɔsɛ̃ mi Ɣaa wɔ nsɛ ɔɖi mi ɔbɔrɛgu i mi atikpi gu amɔrɛã ɔɖuɖu ame. Ne miɣɛ sɔ, 'Ooɣo, sɛ igara tã bo.' Ne ɔso kiniɔ ne miba i Bosate anɔ i mi kumele gu nlɛ ame."20Gɔ Samuel ɔtã Israel kumele ɔɖuɖu ɔbore miba katɔ̃ ne, Benyamin kamele maɖi i kareremi kanya.21Ne Samuel ɔtã Benyamin kamele ɔbɔrɛ maba katɔ̃ i ma nlɛ kanya ne, na kareremi ɔsia i Matri kalɛ ne. Katsɔrakɔ̃ ne kareremi ɔsia ne maɖi Saul Kis ɔbibirɛrɛĩ. Ɣɛɛ gɔ manyɔnyɔ wũ ne mainya wũ.22Ne ɔso makarɛ Bosate ira ana mabua sɔ, "Ɔturi wɔmɔ ne ɔ̃ɔba i ngbe?"
Ne Bosate ɔtã mmuai sɔ, "Aĩ, Saul ɔkɔla so i ato ndɛ̃."23Ne matere masɛ maaɖi wũ mabɔ. Gɔ ɔya i maturi ndɛ̃ i mmɔ ne, ɔkɔlɛ ɔɖo maturi tsɔra ɔɖuɖu.24Samuel ɔɣere maturi ɔɖuɖu sɔ, "Nya ɔrɛrɛ̃ wɔ i Bosate ɔɖi i ngbe. Kuwɛ̃ iikategu wũ i kaɖe ɔɖuɖu ame.
Ne maturi ɔsia kulu teteree sɔ, "Iɣii iiɖuu! Igara si ɔsɛ ngbã dzoroo!"25Ne Samuel ka ɔɖi sigaraiɖe kubarara asɛra ɔte maturi. Ɔtsɛrɛ mɛ ɔsia i ɔko iso ɔsu ɔsɛ ɔ̃asɛ i Bosate anɔ. Ne Samuel ɔɖi maturi ɔri, ɔbiara ɔkpese ɔkɛlɛ ɔ̃ aɖe ne.26Saul ɔ̃ wũ ɔkpese ɔkɛlɛ ɔ̃ aɖe Gibea. Makpãrɛrɛĩ mawɛ̃ ma situ i Bosate ɔpɛgu ɔkɛlɛgu wũ.27Ɣɛɛ maludze mawɛ̃ ɔɣɛ sɔ, "Nda i nwɔgbe igbã aawo ɔɖi bo?" Manyɔ wũ pupurii maibɔ wũ karatã kukawɛ̃. Ɣɛɛ Saul ɔlokanana.
The Seed Company