1 SAMUEL11
Saul Ɔɖe Ma Amonse Iso
1Igara Naxas, Amonse ku ɔ̃ makpakpɛ̃dze ɔsɛ maaki malɔ Yabes ɔmagɛ̃ i Gilead ibuiti ame. Ne Yabes maturi ɔɖuɖu ɔɣere wũ sɔ, "Baragu bo kanyakawɛ̃ ku ndamu, si bowe i fɔ kayirinɔ."2Ɣɛɛ Naxas, Amonse ɔtã mmuai sɔ, "Loabaragu mi kanyakawɛ̃ ku ndamu i ira iwɛ̃ iso kere; ne nɖe sɔ loawere mi ɔbiara kuɖearɔ̃ inɔmi loɖi lopia Israel ɔɖuɖu kunuarɛ."3Ne Yabes matɔ̃ɖedze ɔɣere wũ sɔ, "Tã bo ayi akɔdzɛ, si bosese makpabo Israel mabi ɔɖuɖu kɔrɛ; si kuwɛ̃ na ɔ̃aba ɔ̃aɖi bo ne, boanyua so botã-ɔ."4Ɔwi wɔ i makpabo ɔba Saul ɔmagɛ̃ wɔ marɔ sɔ Gibea fiɛ maɣere maturi atɔ̃me wagbe ne, ma ɔɖuɖu ɔbiɛ kaku teteree.5Ɔwi wɔgbe ame kere i Saul to ɔkpese i sia, ɔsɛ i ɔ̃ manantsuĩ ma nto mapupuri karɔ̃ kama, ne ɔkarɛ sɔ, "Be nto maturi? Be ɔso mato mabiɛ?" Ne maɣere wũ atɔ̃me wa i Yabes maturi ɔɣɛ ne.6Gɔ Saul ɔnɔ ma atɔ̃me ne, Ɣaa Siwarã ɔba i ɔ̃ iso ku ɔle ne ɔfugu sikpã gbaã.7Ɔsu manantsuĩ inyɔ, ne ɔtutu ma ɔsu kusɛi ɔpia i makpabo mama nrɔɔ̃ ame maki i Israel karɔ̃ ɔɖuɖu iso, mato mapɛ imomo sɔ, "Kumɛgɔgbe mato maabara ɔturi ɔrere manantsuĩ, si ɔ̃ibasiai Saul gu Samuel masɛ maakpɛ̃ ne." Ne Bosate ɔtã ifɔ̃ ɔmɔɛ̃ maturi, ne ma ɔɖuɖu ɔbɔrɛ masikanya lɛ ɔturi ɔwɛ̃.8Ɔwi wɔ i Saul ɔsa ma kanya ɔro i Bezek ne, Israel marɛrɛ̃ ɔɖe kukpi alafa atɛ fiɛ Yuda mare ɔɖe kukpi sitɛ.9Maɣere makpabo ma loba sɔ, "Miɣere Yabes i Gilead marɛrɛ̃ sɔ, 'Kɔrãkaɖe si iaɣo kakɔme gɔ kuɣɛ̃ sia kerebee ne mito miana iɖi.' " Gɔ makpabo ɔsɛ maaɣere Yabes maturi itɔ̃me nɛgbe ne, mana isoɣɔ gbaã.10Ma Yabese ɔɣere ma Amonse sɔ, "Kɔrãkaɖe ne boto boatã iti iyɔ si ka miawo bo nnɛ miɖɔɛ ɔbara."11Kaɖesɛã ne, Saul ɔɣɛ ɔ̃ maturi ɔpia i akuri atɛ ame; ɔɖesɛrã ne mata mabo ma Amonse kasɛkɔ̃ maɖoɖoe ma ikɛlɛ kakɔme kerebee. Mma lokuti magbanadze ɔsame gɔ ma maturi inyɔ kumawɛ̃ iisiwe masakanya.Masia Saul Ita Lɛ Igara
12Ne Israel mabi ɔɣere Samuel sɔ, "Mabe lokarɛ sɔ, ' Saul loaɖe bo igara?' Miɖi maturi mamɔ mibɔ bo si boɖoe ma."13Ɣɛɛ Saul ɔɣɛ sɔ, "Maibaɖoe ɔturi kuwɛ̃, alasɔ Bosate ɔɖi Israel kaɖe nɔme."14Ne Samuel ɔɣere maturi sɔ, "Miba, si bokɛlɛ Gilgal si bosɛ boaɖi kayi bosiaita sɔ Saul nɖe bo igara."15Ne ɔso maturi ɔɖuɖu ɔkɛlɛ Gilgal. I Bosate anɔ i mmɔ ne, maturi ɔsiaita sɔ Saul nɖe igara. Mabara isobuɛ asɔrɛ fiɛ Saul gu Israel mabi ɔɖe iyi siare.The Seed Company