1 SAMUEL9
Saul Ɔba Ɔ̃asarɛgu Samuel
1Ranase ɔwɛ̃ ɔwe i Benyamin kamele ame. Ɔ̃ iyere loɖe Kis, ɔ̃ ɔse loɖe Abiel fiɛ ɔ̃ ɔɖe Zeror ɔbibirɛrɛĩ. Zeror ɔse ɔɖe Bekorat, Afia wɔ lobɔrɛ i Benyamin kamele ame ɔɖe Bekorat ɔse.2Ɔwe ɔbibirɛrɛĩ ɔwɛ̃ ɔɖe kapoporoi ga lobua kare situri gɔ kuwɛ̃ iisire situri ɔɖo wũ i Israel mabi ndɛ̃ fiɛ marɔ wũ sɔ Saul. Ɔɖe ɔturi wɔ lobua ɔkɔlɛ gɔ matsɔra ɔwe i ɔ̃ imɔiti fiɛ kuwɛ̃ iiwe ɔkategu wũ i Israel kaɖe ame.3Ɔwi ɔwɛ̃ ne, Kis wɔ nɖe Saul ɔse mafirimu ɔyu. Ne Kis ɔɣere ɔ̃ ɔbi Saul sɔ, "Kɔ ɔɖabo ɔwɛ̃ bua so iso si mikɛlɛ miabie mafirimu mibɔ."4Ne ɔso ɔmɔɛ̃ ɔri ɔsɛ ɔ̃anyɔnyɔ Efrayim kabemi karɔ̃ iso gu Salisa awo ame ɣɛɛ mainya ma. Makɛlɛ Salim ibuiti ame ɣɛɛ mainya ma. Makɛlɛgu i katɔ̃ masɛ maabie ma i Benyamin ibuiti ame ana ɣɛɛ mainya ma.5Gɔ mabo Zuf ibuiti ame ne, Saul ɔɣere ɔɖabo wɔ ɔsɛgu sɔ, "Ba, tã bokpese bokɛlɛ kaa, si iiɖe ngbɔ ne, wũ ɔse to ɔ̃aɖaa so i bo iso bowũ, gɔ iisibaɖe i mafirimu iso."6Ɣɛɛ ɔɖabo ɔtã wũ mmuai sɔ, "Nyɔ, Ɣaa ame ɔturi ɔwɛ̃ wɔ maturi sɛ mawarɛ gbaã pia i ɔmagɛ̃ wɔgbe ame fiɛ irabiara nɛ ɔɣɛ sɛ iba i ne ame. Tã bokɛlɛ mmɔ kiniɔ, siainyɔ ɔto ɔ̃aɣere bo ngbegɔ isɛ boaki."7Ne Saul ɔkarɛ ɔɖabo sɔ, "Mme kuso boatã wũ si bosɛ? Araɖea wa boto i bo sikoto ame ɔɔro. Bona kuira boatã Ɣaa ame ɔturi. Be boba?"8Ne ɔɖabo ɔtã Saul mmuai ana sɔ, "Nyɔ, sikãfudza ibi se me. Loasu ne lotã Ɣaa ame ɔturi si ɔ̃ate bo ngbegɔ isɛ boakɛlɛ."9(Ɔwiɔ i Israel ne, si ɔturi ɔrere ɔsɛ sɔ ɔ̃akarɛ ira ɔnɔ i Ɣaa kɔrɛ ne, ɔto ɔ̃aɣɛ sɔ, "Ba si bokɛlɛ boanya kanyaara," alasɔ nwɔ masɛ makpere sɔ kanyaɖidze nɔme ne, kanyaara makpere wũ ku ɔwi wɔmɔ ame.)10Ne Saul ɔɣere ɔɖabo sɔ, "Ilɛ, ba si bokɛlɛ. Ne ɔso mamɔɛ̃ ɔri makɛlɛ ɔmagɛ̃ wɔ ame i Ɣaa ɔturi ɔwe.11Gɔ masɛ mato maya kabemi makɛlɛ ɔmagɛ̃ ame ne, masarɛgu mabitɛ mawɛ̃ gɔ masɛ maaɖu ndu. Ne makarɛ mabitɛ sɔ, "Kanyaara pia i ngbe?"12Matã mmuai sɔ, "Aĩ, ɔpia. Ɔɖe mi katɔ̃ kere ɔsɛ ɔto ɔkɛlɛ. Mitara ngba kato. Kiniɔ ame kere ɔba ɔ̃abo i bo ɔmagɛ̃ ame alasɔ ɔmagɛ̃ ame maturi to maasɔrɛ ara i kasɔrɛkɔ̃ ku nɔme.13Kumɛgɔ ame miabo i ɔmagɛ̃ ame kere, mito mianya wũ fiɛ ɔ̃akɛlɛ ɔ̃aɖe ara i kasɔrɛkɔ̃. Maturi iito maaɖe ara gbɔgbɔɔgbɔ ɔba, alasɔ ikote sɔ ɔ̃afere kusɛkusɛ i isɔrɛ iso; ne kama fiɛ mma makpedza aaɖe ara. Mikɛlɛ, alasɔ mito mianya wũ i mmɔ kiniɔ."14Ne ɔso makɛlɛ ɔmagɛ̃ ame, gɔ masɛ maabo kere ne, manya Samuel, ɔsɛ ɔto ɔba i ma kɔrɛ isɛ gɔ ɔ̃ɔɣo ɔri ɔto ɔkɛlɛ kasɔrɛkɔ̃.15Kiniɔ ne iyi nɛ lofe fiɛ Saul aaba ne, Bosate ɔɔɖi nnɛgbe ɔte Samuel sɔ,16"Kɔrãkaɖe ku ɔwi wɔgbe ame ne, nto loasese-ɔ ɔrɛrɛ̃ ɔwɛ̃ lobɔrɛgu i Benyamin karɔ̃ ame. Sɔla wũ nnɔĩ si ɔkpese tɔ̃ɖedze ɔtã wũ kaɖe, Israel. Ɔto ɔ̃aɖi wũ kaɖe ɔbɔrɛgu i ma Filistise nrɔɔ̃ ame. Loɔnyɔ wũ kaɖe nnya, alasɔ ma kaku ɔɔbo i wũ kɔrɛ."17Ɔwi wɔ i Samuel ɔnya Saul ne, Bosate ɔɣere Samuel sɔ, "Ɔrɛrɛ̃ wɔ iso loɖe-ɔ ika i ngbe ne. Ɔ̃ loaɖe sigara i wũ kaɖe iso ne."18Saul ɔsɛ ɔbore ɔbo Samuel i kayogodɔ̃ kabɔrɛnya ɔkarɛ wũ sɔ, "Lotã-ɔ iti, aawo me ɔɣere ngbegɔ nɖe kanyaara iyo?"19Samuel ɔɣere Saul sɔ, "Mme nɖe kanyaara ne. Miɖe me katɔ̃ mikɛlɛ kasɔrɛkɔ̃, nɔme ne miaɖegu me ara. Kɔrãkaɖe kaya ne, loatã-ɔ ɔri arui fiɛ loaɣere-ɔ ara ɔɖuɖu wa mpia-ɔ i iti ame.20Mafirimu ma loyu ayi atɛ ngbe ɣɛɛ ne, daaɖaa so i ma iso; alasɔ maɔnya ma. Ne kama ne, mi gu fɔ ɔse iyomaturi ɔɖuɖu i Israel mabi ɔɖuɖu to mabie."21Saul ɔtã mmuai sɔ, "Benyamin kamele, kakosoi i Israel kaɖe ame lobɔrɛ. Wũ kalɛ ana nɖe kakosoi i Benyamin kamele ɔɖuɖu ame. Be ɔso ato aɣere me itɔ̃me nɛgbe igbã?"22Ne Samuel ɔkɔ Saul gu ɔ̃ ɔɖabo mabo i iyo kame, ne ɔtã ma kasɛkɔ̃ i ɔpɔrɔ̃ iti, i mma makpedza ndɛ̃ - maaɖe lɛ maturi sitɛ.23Ne Samuel ɔɣere ɖerawadze sɔ, "Su sina dzɛ loɣere-ɔ sɔ sise ise bɔ."24Ne ɔso ɖerawadze ɔsu sina kukpa gu ara wa lobua iso ɔbɔ ɔ̃asɛ i Saul katɔ̃. Samuel ɔɣɛ sɔ, "Nya sina dzɛ maɖi masɛ-ɔ i ngbe; su si awe. Maɖi sɛ̃ masɛ-ɔ itã ɔwi wɔgbe, ita i ɔwi wɔ loɣɛ sɔ, 'Loɔkpedza maturi.' " Ne ɔso Saul ɔɖe ara ku Samuel ikpɛnɛ nɛmɔ.25Gɔ maɔse i kasɔrɛkɔ̃ maba i ɔmagɛ̃ ame kama ne, Samuel ɔɖegu Saul ika i ɔ̃ iyo isã.26Mata ku kaya gɔ kuɣɛ̃ ka kubɔrɛ ne Samuel ɔkpere Saul i iyo isã ɔɣɛ sɔ, "Ledza so, si losɛ-ɔ ɔri." Gɔ Saul ɔledza so ɔro ne, ma gu Samuel inyɔ ɔɖuɖu ɔbɔrɛ i iyo marui.27Gɔ masɛ mato makɛlɛ ɔmagɛ̃ kawirikɔ̃ ne, Samuel ɔɣere Saul sɔ, "Ɣere ɔɖabo sɔ ɔɖe bo katɔ̃." Ne ɔɖabo ɔɖe ma katɔ̃ ɔkpa. "Ɣɛɛ fɔ ne, tuĩ kɛkɛĩ, si loɣere-ɔ atɔ̃me wa Ɣaa sɔ loɣere-ɔ."The Seed Company