২ কোরোন্থি8
1ডুওয়া এবাই আসা হুম্রিবাই, সেংজাহা মাকেডোনিয়াকো মন্ডলিহিং অনুগ্রহ জোওয়াকো তোইতা নাবিহিংয়া কাবি জাংকো কেংমগা।2আবিহা সিওপারাং কোইচ্যাওয়াতারে আপনিকো টেবো গাগ্রুওয়া প্রমাণ জোমসা তিংপায়ে। আবিহা জোরোংদো তুংসিং ওয়েমসা দান পিচায়ে।3আবিহা আপনিকো ছুওয়া সেইরোমা সিওপারাং পিচায়ে, আকুরে আপনিকো ইচ্ছাসো পিচায়ে।4এপারাং দান পিচামসা আবিহা কাবি য়হুদিয়াতা নিমবি খ্রীষ্টকো দিংঙাবিকো য়ুজ্রুওয়াতা ভাগ লাংকো মৌকা মুংকো তামসা সিওপারাং জাংচায়ে।5কাবিকো নোকোরে-মোনোওয়া নুওয়াং আবিহা জোয়ে। নাগাইহা আবিহা আপনিহিং প্রভুকোতা স্যইয়ে আসা সেংজাকো ইচ্ছাতা কাম জোকো আপনিহিং কাবিকো খুইতা স্যইপুয়ে।6তিতোসহা নাবিকো প্যাকোতা ই দান জুওয়া কাম শুরু জোওয়াকো সোতা আকু পুরা জোকো কাবিহা আকুহিং নিংপুয়ে।7নাবিহা দেংওয়াতা, ঝিপাওয়াতা, দুংজিতা, দোসরাহিং প্যারাপাওয়াতা আসা কাবিকো জেজেংপা জোওয়া তাংসা নুওয়াংতা পুপুউ নিও। এপা জোমসারাং ই জেজেংওয়াসো দান পিচাওয়া সেওয়াতারে নাবিহা পুপুউ জিংকো তাওয়া কাবিহা ইচ্ছা জোমগা।8ইহা কা নাবিহিংয়া লিংপাং বানাইওয়া মোকো, আদো লেরাহা য়ুজ্রুকো সিওপারাং ইচ্ছা নিও, ইতা ল্যামসা নাবিকো জেজেংওয়া আজিপ্পা কোমে না মোকোমে, কা মোরোওয়া।9য়োংকো প্রভু ইশু খ্রীষ্টকো অনুগ্রহ জোওয়াহা নাবিহা গেমিরাং নিও, আকুহা পুপুউরোমা পুপুউ জিংমসারে নাবিকো সোতা আকুহা জোরোংপুয়ে, আপনি জোরোংমসারাং নাবিহিং পুপুউ বানাইকো তামসা আকুহা এপা জোমগা।10আনিংমাকো শুরু জোওয়া কাম পুরা জো তামসা কা নাবিহিংয়া সল্লাহ পিচারোওয়া। নাবিহা কাম শুরু জোওয়া মেংচে মোকো, আদো নাবি হানি টেবো ইচ্ছাসো কাম শুরু জোমমে, নেহা নাকো ছুওয়া সেই আকু ইচ্ছাবেপারাং পুরা জো।11নেহা নাবিকো শুরু জোওয়া কামরে পুরা জোপুই। আত্রংহা নাবিহা পিচাকোহা সিওপারাং ইচ্ছা নিমগা আসা ছুওয়া সেই ন্যাস্যা পিচামসা আপনিকো ইচ্ছা পুরা জো।12নাবিমি পিচাকো সিওপারাং ইচ্ছা নিনাহা নাবিকোতা হাইনি, আউসোরাং পিচাওয়া সেংজাহা য়ুচামগা, আদো নাবিকোতা মোতোওয়া নুওয়াং মোকো।13নাবিহিং ব্যা পুউপামসা দোসরাহিংয়া ফেলেংপা জোকো কুং ইচ্ছা মোকো, আদো তাংসাহিং দাদাপা ব্যা জিংকো।14ই সময়তাহা নাবিহিংপাহা তেংকোইপা নিও আসা মাতামবিহিং পিচাকোহা এনতাওয়ারাংগা। নোইতা নাবিহিং মেতেংপা জিংপুনুওয়া আবিহা তেংক্যইপা য়ুজ্রুরোওয়া। এপামি জিংনাহা নিহদ্যাসারাং য়ুজ্রুকো চুরোওয়া আসা তাংসা দাদাপা জিংপুরোওয়া।15তাংজিকো হিগাতা এপা লামি নিও, “উইসে য়োমবিহিংনে সিওপা মাজিংতো আসা অস্যইস্যই য়োমবিহিংনে মাতেংপা মাজিংতো।”16নাবিকো তোইতা সেংজাহা তিতোসকো তুংসিংতা কুং ত্যাবাওয়া ইচ্ছা পিচায়ে। ইকো সোতা কা সেংজাহিং গারানি তারোওয়া।17হাংপাতানাহা আকুহা কাবিকো জাংওয়াকো সোতা মোকো, আদো আকো আপনিকো ইচ্ছারে এসেপাকো টেবো নিমগা, আকুহা আপনিকো ইচ্ছাসো নাবিকোতা ওয়াংমগা।18এনতাওয়া দেরেং হিংপাওয়াতা মিং নিও আসা তাংসা মন্ডলিবিরে তাচাওয়া ইচো এহিং কাবিহা আকুহিংপা নিংপুদাংয়ো।19জেজেংপা জোমসা পিচাওয়া দান জুওয়া কামতা কাবিহিংপা চিত্তা তেইওয়া-য়ুংওয়া ই এহিংয়া মন্ডলিবিরাং জেংমগা। ই কাম কাবিহা প্রভুকো আদরকো সোতা দোসরাহিং য়ুজ্রুকো সিংদুওয়া কাবিকোতা নিও তাওয়া তিংপাকো সোতা জোমগা।20ই টেবো দানতাহা হাংসুরে দোষ তিংপাকো মাছুকো তামসা ই তাংসা দানহা কাবিহা এনতাপা চালাইমগা।21সেংজাকো নাগাইতা মেংচে মোকো, আদো দিংঙাকো নাগাইতারে এনতাওয়া কাম জোকো কাবিহা প্যারাপামগা।22আবিহিংপা কাবিকো এহিংনে নিংপুদাংমি নিও, কাবিহা ই এহিংয়া উইসে জাঁচ জোয়ো আসা হাত্রংদো কাবিহা আকুহিংয়া কাম জোওয়াতাহা জোসিলো তিংয়ো, আকো তোইতারে নেহা আকুহা নাবিকো তোইতা সিওপারাং ভরসা এমি নিও, আকো সোতা আকুহা য়ুজ্রুকোরে ইচ্ছা নিও।23তিতোসহা কুং ব্যারোগা আসা কাহিংপারাং নাবিহিং য়ুজ্রুওয়া কাম জোমগা। আকুহিংপা ওয়াংপাওয়া দোসরা এহিংনে খ্রীষ্টকো সন্মানকো সোতা মন্ডলিবিহা নিংপুমগা।24নাবিহা আবিহিংয়া আপনিকো জেজেংওয়াকো প্রমাণ পিচা আসা কাবিহা হাংপা নাবিকো তোইতা পুংটা জোমমে তাওয়া নুওয়াহা মন্ডলিবি তিংকো ছুকো।
The Seed Company