২ কোরোন্থি7
1আকো সোতা ও কুং ব্যারোবাই, কাবিহিংপা ই প্রতিজ্ঞা নিওয়াকো সোতা জুপা আসা লাংবেহিং মেংতাওয়াতা পুরাওয়া তাংসা নুওয়াংবিসো য়াংবিহা তানাং য়ুংসি আসা সেংজাসো চুসুংমসা পুরা পবিত্র জিংপুমসা হোসি।2কাবিহিংয়া নাবিকো তুংসিংতা য়ুংকো জায়গা পিচা। কাবিহা হাংসুহিংনে মেংতাপা মোজোয়াংতো। কাবিহা হাংসুহিংনে মাবিগারেয়াংতো। কাবিহা হাংসু দিংঙাহিংপারে ফাইদা মালাংয়াংতো।3নাবিহিং দোষি তিংপাকো কা ই জাংওয়া মোকো, হাংপাতানাহা কা নাবিহিংয়া নাগাইসোরাং জাংপুনতেমি নিও, কাবিকো তুংসিংতাহা নাবিকো সোতাহা এসেপাকো জায়গা নিও, কাবিহা নাবিহিংপাহা চিত্তা সিকোরে আসা বাচেকোরে তৈয়ার নিও।4নাবিকোতা কুংহা টেবো ভরসা নিও আসা নাবিকো তোইতা কাহা সিওপারাং গর্ব জোদিংয়ো। নাবিহিংপা কাহা সিওপারাং সান্ত্বনা মুংচামি নিও আসা কাবিকো তাংসা কোইচ্যাওয়াতা কা সিওপারাং গাগ্রুপা নিও।5হাংপাতানাহা কাবি মাকেডোনিয়াতা ওয়াংপুনতেনুকো নোইতারে কাবিকো জুপাহিংয়া হাইরে সাওয়া মামুংতো, আদো তাংসাসো কাবিহিংয়া কোইচ্যাওয়া ওয়াংমি নিমগা, বাইরেসোহা স্যাসুওয়া আসা তুংসিং নাপোসোহা সিওপারাং চুসুংওয়াদাং নিমগা।6আদো তুংসিংতা দুঃখ নিমবিহিং সান্ত্বনা পিচাওয়া সেংজাহা তিতোস ওয়াংনুওয়া কাবিহিংয়া সান্ত্বনা পিচায়ে।7আকো ওয়াংওয়াকো সোতা মেংচে মোকো, আদো আকুহা নাবিসো মুংওয়া সান্ত্বনাসোহা কারে সান্ত্বনা মুংচায়ে। কাহিংয়া ন্যাসারাং দোসপাকো নাবিকোহা সিওপারাং ইচ্ছা নিনত্যাহা তাওয়া আকুহা কাবিহিং ল্যায়ে। নেহা নাবিহা তুংসিংরে চিচাপুয়ে আসা কুং কাটু জিংপুনত্যাহা তাওয়া কা হিংয়ে, ই তাংসা নুওয়াং হিংমসা কাহা সিওপারাং য়াংতাপা নিও।8য়দি কামি আপনিকো চিঠিসো নাবিহিং শোক জোপাপুদো কুং তুংসিংতাহা পশ্চতাপ মোতো। কাহা গেদিংয়ো, আকু চিঠিসোহা নাবিহিংয়া আম্যইজিংদো শোক জোপাপুইয়ে। ই গেমসা কাহিংয়া পশ্চতাপ জিংদো নেহা কাহা য়াংতামি নিও।9নাবিহিং শোক জিংপুয়ে তামসা কা য়াংতাওয়া মোকো, আদো নাবিকো শোকসোহা নাবিহিং পশ্চতাপ জোপায়ো তামসাগা, হাংপাতানাহা নাবিহা সেংজাহিং নোমসা শোক জোয়ো, আসা কাবিকোসোহা নাবিহা হাইরে খতি সহায়মঘ্যইতো।10হাংপাতানাহা সেংজাহিং নোমসা শোক জোনাহা মুক্তিকো সোতা পশ্চতাপতা পুরামগা, আসা আউতাহা পশ্চতাপ মাজিংমগা, আদো বাসিমতিকো শোকসোহা সিদিংতা পুরামগা।11নাবিহিং পরেওয়া দুঃখসোহা সেংজাহা হাং জোমমে, প্যারাপাকো জো, ই কোইচ্যাওয়াসোহা নাবিহিংয়া আজিপ্পা বানাইয়ে, দোষ মোতো তামসা তিংপাকো হতার জোপায়ে, নাবিহিংয়া হাসেকো সেদ্রাংপামমে, হাসেকো শোক জোপামমে, হাসেকো কাহিং ন্যইকো ইচ্ছা জিংমমে। নাবিকোতা পাপ জোমবিহিংয়া দন্ড পিচাকোরে মন জিংপুয়ে। ই তাংসাসোহা নাবিকোতাহা হাইরে দোষ মোতো তামসা তিংপায়ো।12আকো সোতা কাহা ই চিঠিহা হাংসু গলতি জোমমে আসা হাংসুকো তোইতা গলতি জিংপুমে তামসা লাওয়া মোকো, আদো নাবিহা সেংজাকো নাগাইতাহা কাবিহিংয়া হাসেকো জেজেংপা জোমমে, আকু তিংপাকোরাং কা লামগা।13আকো সোতা কাবিহিংয়া সান্ত্বনা মুংমি নিও। কাবিহিংয়া সান্ত্বনা মেংচে মোকো, নাবি তাংসাকোসো তিতোসহা গাগ্রুওয়া মুংচাওয়াকো সোতা কাবিরে সিওপারাং গাগ্রুওয়া মুংচামি নিও, হাংপাতানাহা নাবিকোসোহা আকো তুংসিংহা তিমেপা জিংমি নিও।14কাহা তিতোসহিংপা নাবিকো বিষয়তা পুংটা জোয়ে আসা নাবিহা কাহিংয়া নিরাশ মোজোপাতো। কাবিহা নাবিহিংপা হাত্রংদো আজিপ্পা য়্যইয়ো। এপা জোমসারাং কাবিহা তিতোসহিংপা জোওয়া পুংটারে আজিপ্পারাং জিংপুয়ো।15নাবিহা তিতোসহিংয়া সন্মানসো স্বাগত জোয়ো, আকো নুওয়াং হিংকো নাবি তাংসা তৈয়ার জিংয়ো। ই তাংসা নুওয়াং প্যারাপামসা তিতোসহা নাবিহিংয়া ন্যাসারাং সিওপা জেজেংপা জোয়ো।16কাহা য়াংতাদিংয়ো, হাংপাতানাহা কাহা নাবিকোতা পুরা ভরসা একো ছুমি নিও।
The Seed Company